Htû̌sò̌htò̌ 6 - Kawyaw New Testament

Bǎ ta̤pò̤̌ta̤sha hèbǎ akha, kwihtò̌ ta̤ma̤jè̌ dǒ Cǒmara tûjû̌pwa̤ a ô̌

Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Bǎ sǎwǐ ta̤sǎwǐ nuakhanu, bǎ dǒ lû̌kû̌ ta̤dǒta̤ǔ dǒ apli̤ tokhlǒ.

¹ Ǒ꤮ Cǒmara tûjû̌pwa̤, sǎphlǒdû̌ dě sǎhtǎdû̌da tǎ̤ he mǎ̤. Bǎ na sǎphlǒdû̌ he akha plè tǎ̤ he mǎ̤.

² Ǒ꤮ Cǒmara tûjû̌pwa̤, alò̤dô̌lò̤de mî̌ca he akhû̌akhî, gwèbǎǐ he. Ǒ꤮ Běcǎ, a sha bò hekhwǐhekhû̌ hǒ, ma̤hǎmǎ bǎ mò̌ he nî̌꤮.

³ He sǎǐsha mè̤̌mî̌ca. Ǒ꤮ Cǒmara tûjû̌pwa̤ na glè̌ cǐhtû yî̤pô̤̌ shěkhǎ pwǐ꤮ tè pěya?

⁴ Ǒ Cǒmara tûjû̌pwa̤, ma̤hǎplǎkèmò̌ he. Nata̤mô̤ nu ahǎbòjò tô̤̌ akhû̌akhî, ma̤hǎplǎkè mò̌ he.

⁵ Kòyò cû̌tǒ̤ dǒ lṳ̌gǎnǎdo nutokhlǒ, tôpwa̤꤮ kòyò sî̌ya pe na tô̤̌. Kòyò ô̌ dǒ lṳ̌gǎ nunî̌ kòyò htû̌sò̌htò̌ pe nô̌ na tôpwǎ̤꤮ tô̤̌.

⁶ He ta̤kookasha dě a sǎplǎ̤lò̤de mî̌ca he. Pṳ̂̌sasa hemǐ̤sǎshi lò̤tě̤dû̌ lò̤cô̌ bò he hugò̌. Pṳ̂̌hǎhǎ he hǎ dě a cô̌pwî̌ bò he lǎ̤da.

⁷ Dǒ pwa̤sǎkhě he ma̤hǎ dû̌wî̤ he akhû̌akhî, hemǐ̤sǎphě yô̌ bò, a pô̤lô̤̌ bò hǒ.

⁸ Cǒmara tûjû̌pwa̤ ganǎ̤de heta̤hǎta̤wô akhû̌akhî, ǒ kòyò dǒ a ma̤ ta̤phû̌mò̤̌shǐhtô, cû̌tepheyî̤kè kû̌ he.

⁹ Cǒmara tûjû̌pwa̤ ganǎ̤de heta̤kwisǎyṳ. Cǒmara tûjû̌pwa̤ yṳ̌ǎphî̌shěshu he ta̤kwicaba hǒ.

¹⁰ Lǒ̤bò pwa̤sǎkhě he tokhlǒ gǔ ǐsha sòwò̤̌ bò pě. Asî tiwǐgesô̌, dě tôplǎnô̤̌ amǐ̤sǎ pî̌tî̌kè pě.