Htû̌sò̌htò̌ 58 - Kawyaw New Testament

Kwicabahtò̌ Cǒmara dǒ a gǔ cî̌htò̌ kòyò phû̌mò̤̌

Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Dě bǎ sǎwǐ sô̌sô̌ Khwǐdawi̤ ata̤sǎwǐ dǒ ami̤ kû̌, ma̤pî̌kè ta̤mǎ̤ nutôkǔ. Dǒ Hebrǔyô̤̌nu, a kaǎ ta̤sǎwǐnṳ̌ kû̌ mî̌katama ta̤sǎwǐ.

¹ Pwa̤pǒta̤sî, sî hî̌bǎcǒhî̌bǎtè̤ mè̤̌caca sîyô̤̌ ya? Sî cî̌htò̌cǒ cî̌htò̌tô bǎ kòyò ya?

² Amè̤̌ nô̌ tô̤̌, dǒ sî sǎphlǒkûnu, sî gènè̤ còcè̌꤮ ta̤phû̌mò̤̌shǐhtô. Bǎ hǎkhû̌nu, sî pè̤̌ǎpè̤̌ô ma̤pò̤̌ma̤sha kòyò kû̌ sîcǔde.

³ Kòyòjî̌phû̌mò̤̌ tokhlǒ cû̌sǔnṳ̌plěnṳ̌ lô̌khô klè̌ dǒ a ô̌phijǎlò̤ lû̌khape. Asî jonǒ̤, hî̌bǎlòhǎlòhô pe dǒ amǒ̤hǒkû kha.

⁴ Asî ta̤hî̌bǎ tokhlǒ awè̤ahtò asô̌sô̌kû̌ wṳ̂̌su wè̤̌. Asî koo asô̌sô̌kû̌ wṳ̂̌gòlò̤ nò̌ku koo.

⁵ Pô̤̌nudě asî ganǎ̤de jòpe pwa̤tili̤ ǔpwe̤htò̌ pwa̤pè̌ wṳ̂̌ alě̤ nutô̤̌. Kòyò ǔpwe̤ǐ pwǐtè̌꤮ bǎbǎ asî ganǎ̤de jòpetô̤̌.

⁶ Ǒ꤮ Cǒmaradû̌, ma̤lagǎ kèbò mò̌ asîkhû̌khi. ǒ Cǒmara tûjû̌pwa̤, dela̤gǎ kèbò mò̌ khî talô tokhlǒ asèmè̤̌.

⁷ No hǎmǎ kèbò asî pô̤̌ shi lò̤ dě a lò̤tûlû̌ hǎmǎkè nu. Bǎ asî yè̤htò̌ dě a mṳ̂̌ khlǐ akhanu, no gǎla̤gǎ asî plǎ̤.

⁸ No sô̌sô̌kè asî kû̌ simǐ cû̌ mè̤yè̤ agûlǎ̤ ô̌lṳ̌ tashò̌phû̌nô̤̌ dě ahǎmǎkènu. No sô̌sô̌ pô̤̌tû̌ asî kû̌ phijǎphû̌ phû̌lò̤kè dě a kè̌shǐ nô̌ kû̌ kòyò lṳmṳ̌ tô̤̌nu.

⁹ Bǎ ta̤shǐshômṳ̌ sǐso, tô̤̌mî̌ ta̤shǐshô̌mṳ̌ khwe tokhlǒ gû̌u lǎ gopo̤ khôtô̤̌ mî̌pǐ̤kè akhanu, Cǒmara ma̤hǎmǎ phlǔkèbò kòyòkhu nutokhlǒ pě.

¹⁰ Bǎ kòyòcǒkòyòtè̤ tokhlǒ kè̌shǐ kû̌ Cǒmara ma̤ geshî̌shǔ asî akhanu, asî sǎlě̤sǎlò̤. Asî cǔbò lô̌khô akhò̌lôpô̤̌ kû̌ kòyòphû̌mò̤̌ nutokhlǒ asǐ.

¹¹ “Kòyòcǒtè̤ tokhlǒ nǐ̤bǎ mè̤̌caca ta̤ma̤nǐ̤khû̌kǎ pě.” “Cǒmaradû̌ dǒ a cî̌htò̌cǒ cî̌htò̌tô bǎ hǎkhû̌ hǒtôpwa̤nu a ô̌ mè̤̌caca kòyò hî̌ lô̌khô pô̤̌nu pě.”