Htû̌sò̌htò̌ 56 - Kawyaw New Testament

Ta̤kwicaba dǒ ta̤yṳ̌ǎ Cǒmara

Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû tôpwa̤ aya. Dě bǎ sǎwǐ sô̌sô̌kû̌ khwǐdawi̤ ata̤sǎwǐ dǒ ami̤ kû̌, htû̌li̤ ô̌ dǒ ayi̤ dǒ sǒmṳ̌dû̌lû̌ nutôkû. Dǒ Hebrǔyô̤̌nu, akaǎ ta̤sǎwǐnu kû̌ Mǐkatama ta̤sǎwǐ. Dě a sǎwǐ bǎ Phǐlǐsatǐ khlili tokhlǒ lṳ̂pṳ̂̌nṳ̌ asî wî̤̌katǎ akhanu.

¹ Ǒ Cǒmaradû̌, kòyò hèshě lô̌khô he akhû̌akhî, gwèbǎǐ mò̌ he. Pwa̤sǎkhě he nî̌ a hèma̤jî̌ma̤jû̌ he tônǐ̤mṳ̌hǎ.

² Pwa̤sǎkhě he nî̌ a hèshě he tônǐ̤mṳ̌hǎ. Kòyò saprṳ̂ bè̌htò̌yô̤̌ asǎphlǒ dě a hèshě he.

³ Bǎ he ǐsha akhanu, he yṳ̌ǎ nǎla̤ǐ tǒ̤ na nô̤̌.

⁴ He htû̌sò̌htò̌ǐ Cǒmaradû̌ ta̤olò̤ pṳ̂̌tômû. He yṳ̌ǎ nǎla̤ǐ Cǒmaradû̌, he ǐsha pe tô̤̌. Kòyòhǎkhû̌phû̌ pwǎnu a cû̌hèma̤ jò he hětè?

⁵ Pwa̤sǎkhě he tokhlǒ hî̌bǎ bǎsha kèbò he pṳ̂̌shěpṳ̂̌khǎ. Asî gènè̤ còcè̌ dǒ glè̌ma̤ phû̌mò̌shǐhtô he nô̤̌.

⁶ Asî ô̌plǒ lû̌û dě a ô̌û̌. Bǎ asî ô̌pǒ̤ glè̌ ma̤si he akhanu, he cû̌ bǎtè mî̌ asî ma̤kè̌bǎhe.

⁷ asî ma̤ ta̤phû̌mò̤̌shǐhtô akhû̌akhî no hǎplǎkè tǎ̤ asî mǎ̤. Ǒ Cǒmaradû̌, bè̌lṳ̌mò̌ nata̤sǎphlǒdû̌, no lò̤jû̌kè mò̌ asî.

⁸ Na wě̤mǎnǎ bò heta̤pò̤̌ta̤sha. Shû̌nṳ̌ nǐ̤bò hemǐ̤sǎshi dǒ napò̤̌kû. Ta̤hǒtokhlǒmî̌ dǒ nalî̤kûnu awě̤mǎnǎ bǎtô̤̌ ya?

⁹ Bǎ he kwisǎyṳhtò̌ Cǒmaradû̌ ta̤ma̤jè̌ akhanu, pwa̤sǎkhě he lò̤jû̌ khlè̌getîkhî sô̌ pě. Hǒomî̌ he sî̌ganǎ̤ kû̌ Cǒmaradû̌ ô̌ kû̌ he.

¹⁰ He htû̌sò̌htò̌ Cǒmaradû̌ ta̤olò̤ pṳ̂̌tômû. He htû̌sò̌htò̌ Cǒmara tûjû̌pwa̤ ta̤olò̤ pṳ̂̌tômû.

¹¹ He yṳ̌ǎ nǎla̤ǐ Cǒmaradû̌, he ǐsha pe tô̤̌. Kòyòhǎkhû̌phû̌ pwǎnu a cû̌hèma̤ jò he hětè?

¹² Ǒ Cǒmaradû̌, he bǎ ma̤lǒma̤be tûû̌ he ta̤olò̤. He lṳhtò̌tòhtò̌ na kû̌ he ta̤hî̌bwǐhî̌sîrî.

¹³ Na ma̤hǎplǎge he ta̤ô̌htûpwa̤ dǒ ta̤sita̤hǎmǎ akû. Na no htò̌tukhu lò̤khǔpo̤ he tô̤̌. Pô̤̌nudě he cû̌cukhacu kû̌ Cǒmaradû̌ kû̌ ata̤lî dǒ a ǐ pa ta̤ô̌htûpwa̤nu akû pě.