Htû̌sò̌htò̌ 55 - Kawyaw New Testament

Kòyò dǒ sû̌khô shaǎmi̤shaǎyô̤̌ lû̌û nutôpwa̤ ata̤kwicaba

Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Khwǐdawi̤ ata̤sǎ nutôkǔ mî̌ dǒ Hebrǔ ta̤sǎwǐ, dě ta̤sǎwǐ nutôshǒ mî̌ a ǐ kòyò ta̤sǎya phlôphǎ. Dě bǎ sǎwǐ sô̌sô̌kû̌ mahalasa ta̤sǎwǐ.

¹ Ǒ Cǒmaradû̌, ganǎ̤de mò̌ he ta̤kwicaba. Dò̌tûklû̌ tǎ̤ he ta̤kwihtò̌ nanu mǎ̤.

^2-3 Ganǎ̤de dě hî̌shěshu mò̌ he. Pwa̤sǎkhě he tokhlǒ hî̌bò he, kòyò phû̌mò̤̌ ma̤jî̌ma̤jû̌ bò he akhû̌akhî, he sǎphlǒpî̌, agû̌agè̌ jî̌jî̌ he. Asî bè̌htò̌bò ta̤shuphǔshèwè dǒ helô̤. Asî sǎphlǒdû̌ he dě a sǎkhěkhû̌khwè bò he.

⁴ He sǎphlǒ gònò̤̌gòglè. Ta̤sita̤hǎmǎ hèbǎ he, he ǐsha shû̌phôhtò̌.

⁵ Ta̤ǐsha kû̌ ta̤gònò̤̌gèglè ô̌tewe̤bǐ bò he. Ta̤gònò̤̌gèglè sǎǐsha glè̌ ma̤pè̤̌ bò he hǒ.

⁶ He hî̌ kû̌, “He sǎyṳ dî̌geô̌ pô̤̌ htû̌lǐ̤. “He glè̌ wî̤cû̌ dǒ ayî̤, cû̌ô̌kǔ sǎbò̌htò̌ pě.

⁷ “He glè̌ wî̤cû̌ yî̤. “He cû̌ô̌ dǒ gǎshashigǎkhû̌ pě.

⁸ “Pô̤̌khô he glè̌ hǎplǎ kû̌ gili̤sǎdû̌ plǎwi̤ ayanu, he khlè̌cû̌kè̌lǎ phwèphwè he gûlǎ̤ lǎ̤ô̌tûdûbǐ nutôkû.”

⁹ Ǒ Běcǎdû̌, ma̤shǔshushû̌shǎ, ma̤sǎphlǒpî̌kè bò kòyò jonǒ̤gana̤ hǒtokhlǒ ata̤hî̌bǎ. He kè̌shǐ ta̤po̤ kû̌ ta̤klǐta̤hǎ dǒ wî̤̌dû̌kû.

¹⁰ Lṳ̌mṳ̌khǐkhǐ lṳ̌mṳ̌shasha, asî htò̌lè te̤we̤ lô̌khô dǒ wî̤̌we̤dû̌khû̌. Ta̤phû̌mò̤̌shǐhtô kû̌ ta̤pò̤̌ta̤sha tokhlǒ ô̌ bò bǎ wî̤̌dû̌kû.

¹¹ Ta̤pî̌ta̤lṳ̂̌ ô̌htò̌bò bǎ wî̤̌dû̌kû. Ta̤ma̤numa̤cî̌ kû̌ ta̤lòhôǎ ô̌be tîpî̌꤮ bò bǎ klè̌dǒkû.

¹² Pwa̤hî̌phû̌mò̤̌ he mî̌ pwa̤sǎkhě he mè̤̌tô̤̌, a kè̌ mè̤̌ pwa̤sǎkhě he mî̌, he khòsǎdô bò̌ pwǎ. Pwa̤ma̤ takǎ he mî̌ he khuwè̤ mè̤̌tô̤̌, kè̌ he khuwè̤ nî̌, he khlè̌ô̌û̌ bò̌.

¹³ Kòyò nutôpwa̤ mî̌ na hǒ, namî̌ asô̌sô̌kû̌ he. Na cû̌cukhacu kû̌ he, he khô dǒ amô̤lǒ nutôpwa̤ hǒ.

¹⁴ Pa bǒsû̌khǎkhô mô̤nǐ̤wô̌bǎ lû̌û tôpwa̤ kû̌ tôpwa̤. Pa cû̌caba kû̌ kòyòsaprṳ̂ dǒ Cǒmaradû̌ ahǐkû.

¹⁵ Ta̤phû̌mò̤̌shǐhtô ô̌ dǒ pwa̤sǎkhě he tokhlǒ ahǐphòdǒkû, asîsǎphlǒkě akhû̌akhî, no ma̤pî̌ma̤lṳ̂̌ bò asî kû̌ ta̤si. No lò̤tě̤ si samṳkè bò asî dǒ lṳ̌gǎnǎdo.

¹⁶ Bǎbǎkǎlè he kwisǎyṳhtò̌ Cǒmaradû̌. Dě Cǒmara tûjû̌pwa̤ ma̤hǎplǎgekè he.

¹⁷ He glè̌ kookasha kwisǎyṳhtò̌ lû̌û lṳmṳ̌lîlî, lṳmṳ̌shasha, lṳmṳ̌hǎhǎ dě a ganǎ̤de he ta̤kwi.

¹⁸ Kòyò saprṳ̂ hèshě takǎ lô̌khô he bǎbǎkǎlè a gǔ ma̤hǎplǎgekè he dǒ ta̤shěta̤pě̤ akû, he bǎshabǎhtò tôcǒ tô̤̌.

¹⁹ Asî htû̌lè̌ ata̤ô̌htûpwa̤ tô̤̌. Asî ǐsha gû̌ kò Cǒmaradû̌ tô̤̌tô̤̌. Pô̤̌nukhû̌khî, Cǒmara dǒ a pǒ ta̤ tûjû̌pwa̤ nutôpwa̤ ganǎ̤de he ta̤kwi pě. Dě a no lò̤jû̌ kèbò asî pě.

²⁰ He sû̌khômô̤ nî̌ a cû̌shě sô̌ asû̌khô. A cǒ kû̌ ata̤olò̤ tô̤̌.

²¹ Ata̤hî̌bǎ nî̌ a bô̌plî khlo kû̌ asû̌abè̌ bǎbǎkǎlè ta̤sǎkhwè̌ tokhlǒnu a ô̌ dǒ asî sǎphlǒkû. Ayô̤̌nu a bô̌plî khlo kû̌ htô̌sû̌ bǎbǎkǎlè a htò sô̌sô̌kû̌ nò̌shî htò̌wô̌nu.

²² Bè̌htò̌bò nata̤wǐta̤ò̌ tokhlǒ dǒ Cǒmara tûjû̌pwa̤ alô̤nu. A kè̌pǒ̤ǐ tûû̌ na pě. A no lò̤jû̌kè kòyòcǒkòyòtè̤ tôkhò̌ tô̤̌.

²³ Ǒ Cǒmaradû̌, pwa̤ma̤si kòyò kû̌ pwa̤lòhǎlòhô tokhlǒnu na no pǔtǔkè alṳmṳ̌ni̤ lṳmṳ̌sa. Na no lò̤tě̤bò kòyòkhu phû̌mò̤̌ dǒ ta̤pî̌ta̤lṳ̂̌ ahǎkûyô̤̌ akû. He khû̌dayadě he yṳ̌ǎ pwǎtǒ̤ na nô̤̌pwǎ.