Htû̌sò̌htò̌ 51 - Kawyaw New Testament

Ta̤kwicaba dǒ ta̤plûkèta̤sǔ aya

Khwǐdawi̤ ata̤sǎwǐ htû̌sò̌htò̌. Dě a cû̌sǔnṳ̌ hto kû̌ Mǒ̤bateshîbǎ dě pwa̤pô̤ Khûneta hè dǒ lû̌ô̌ akhanu, a sǎwǐ ta̤sǎwǐ nutôshǒ. Ta̤sǎwǐ hǒo tôshǒ ta̤ tokhlǒ aikǒlǒkò dǒ ta̤lṳta̤htò̌hôkû nutôpwa̤ aya.

¹ Ǒ Cǒmaradû̌, pô̤̌ na ô̌ kû̌ ta̤mô̤ dǒ ahǎbòjò tô̤̌nu gwèbǎǐ he. Pô̤̌ na ô̌ kû̌ ta̤sǎyṳgwèbǎǐ shû̌ kòyònu ma̤plîkè mò̌ bǎ he ta̤cû̌tûlû̌khatûlû̌ nutokhlǒ.

² Cǔbòkè bǎ he ta̤sǔ, ma̤plîma̤phǔkè bǎ he ta̤plě.

³ He sî̌ganǎ̤ lò̤tûû̌ he ta̤cû̌tûlû̌khatûlû̌. He sî̌ganǎ̤ lò̤tûû̌ he ta̤sǔ pṳ̂̌tôplǎ.

⁴ He ma̤sǔ na hǒ. Ta̤ dǒ he ma̤hto tokhlǒ numî̌ aphû̌mò̤̌shǐhtô còcè̌ dǒ nayapwǎ. Pô̤̌nudě na hî̌bǎhtò̌ yô̤̌sǎnu atôabǎ. Na yṳ̂̌ he ta̤sǔnu acǒatè̤.

⁵ Hî̌mè̤mè̤̌ mò̌ mî̌ he ta̤sǔta̤plě ô̌ dǒ he ô̌phijǎlò̤ sakhû̌lû̌ akha penu. Heta̤sǔ ô̌ pe dǒ hemǒ̤ mǒ̤dohtò̌ he akha penu.

⁶ Hî̌mè̤mè̤̌ mò̌ mî̌ na sǎyṳ pwǎtǒ̤꤮ ta̤cǒta̤tè̤ dǒ he sǎphlǒgî̌kûnu. Ma̤pô̤̌nudě sû̌ǐ bǎ he ta̤sî̌ta̤jò̌ dǒ he sǎphlǒgî̌kûnu.

⁷ Phǐtephe bòkè he ta̤sǔ kû̌ Hǐsû̌lǎ dě he ma̤mṳ̂̌plî pě. Cǔbò mò̌ he, dě he bûsǔlǔkhlo shicòglǒ pě.

⁸ Dǐ ganǎ̤de sô̌ he ta̤sǎlě̤sǎlò̤, ta̤sû̌mô̤sò̌mô̤. No sǎlě̤sǎlò̤ sô̌ hekhwǐ dǒ na yǒla̤gǎkè lû̌û nutokhlǒ.

⁹ Htû̌tiwǐkhô̌kè na mǐ̤sǎ kû̌ he ta̤sǔ hǒo. Ma̤plîkè bò bǎ he ta̤sǔta̤plě.

¹⁰ Ǒ Cǒmaradû̌, bô̌lò̤ bǎ he sǎphlǒmṳ̂̌plî dǒ hekû. Shû̌nṳ̌ tèplè̌ sô̌ bǎ he sǎphlǒ dǒ aměagle.

¹¹ Wṳ̂̌hǎhtò̌cû̌ tephekè tǎ̤ he dǒ na lô̤mô̤̌ mǎ̤. Phî̌hǎhtò̌kè tǎ̤ na yôla plò̌shǐ dǒ hekûnu mǎ̤mǎ̤.

¹² Ǐ sô̌ he na ta̤ma̤hǎplǎge ata̤sǎlě̤sǎlò̤. Ma̤jè̌ sô̌ he dǒ he gǔ sǎphlǒshû̌ jûlě̤phǐ sô̌ nalě̤nayô̤̌nu.

¹³ He sû̌ǐ bǎ kòyò dǒ a cû̌tûlû̌khatûlû̌ naklè̌naklò nutokhlǒ pě. Pwa̤ma̤sǔphû̌ ti̤wǐ̤ getîkhîtô sô̌ dǒ na ô̌ pě.

¹⁴ Ǒ Cǒmaradû̌, Cǒmaradû̌ dǒ a ma̤hǎplǎkè he, ma̤hǎplǎge he kû̌ ta̤sǔ dǒ he cû̌ma̤si sǐlò̤ kòyònu. He sǎlě̤sǎlò̤ yî̤̌kǒ sǎwǐ htû̌sò̌htò̌ na ta̤ma̤hǎplǎge pě.

¹⁵ Ǒ Běcǎdû̌, no hî̌bǎ mò̌ he, dě he htû̌sò̌htò̌ na pě.

¹⁶ Hî̌mè̤mè̤̌ mî̌ na sǎyṳ kû̌ kòyò ma̤si lṳhtò̌ ta̤phû̌ta̤wè̤nu tôcǒ tô̤̌. Tô̤̌mî̌ he lṳhtò̌ hto na hǒ, ta̤shû̌u lṳhtò̌ mî̌ na sǎphlǒ ô̌ nô̌ tô̤̌tô̤̌.

¹⁷ Ta̤lṳta̤tòhtò̌ dǒ a tô Cǒmaradû̌ asǎphlǒ numî̌, yò̤lǎ̤plǎdî̌ ǐ ata̤ma̤sǔ nuhǒ. Ǒ Cǒmaradû̌, kòyò dǒ a yò̤lǎ̤plǎdî̌ ǐ ata̤ma̤sǔ kû̌ kòyò dǒ a shò̌lò̤ asǎphlǒ tokhlǒnu, na htè̌shěshu asî tô̤̌.

¹⁸ Kè̌dû̌ ǐ Sǐû khôlô dě ma̤wô̌ǐ mò̌ a. Bô̌htò̌ tònòwô̌ sô̌ mò̌ Wî̤̌yarǔshôle wî̤̌we̤dû̌.

¹⁹ Ma̤pô̤̌nu tǒ̤ mî̌ nasǎphlǒ tôbǎ kû̌ ta̤lṳ̌tòhtò̌ dǒ acǒatè̤, ta̤shû̌u lṳhtò̌ kû̌ ta̤shû̌u lṳhtò̌ tôdobò. Htodě nakòyò tokhlǒ gǔ lṳhtò̌ pṳ̂̌phadû̌ dǒ nata̤lṳta̤tòwǎ̤khû̌ pě.