Htû̌sò̌htò̌ 49 - Kawyaw New Testament

Nǎla̤ǐ tǎ̤ ta̤dû̌yò̤̌htò̌sa mǎ̤

Phakû̌ri akhlialè tokhlǒ ata̤sǎwǐ htû̌sò̌htò̌. Dě ta̤sǎwǐ numî̌ pwa̤sǎwǐ ta̤tokhlǒ aikǒlǒkò kû̌ ta̤lṳhtò̌hôkûnu tôpwa̤ aya.

¹ Ǒ꤮ khlilèphû̌ lǒ̤bò sî, ganǎ̤de lô̌khô. Kòyò ô̌ dǒ hǎkhû̌ lǒ̤bò sî, dò̌ sînò̌kulǎ.

² Kòyò shû̌shokhò̌sho bǎbǎ, khû̌shiǎjǎ bǎbǎ, kòyòshèwè̤ bǎbǎ, kòyòdû̌yò̤̌ bǎbǎ ganǎ̤de lô̌khô.

³ He hî̌bǎ ayô̤̌ dǒ alǒbe kû̌ ta̤sî̌ta̤jò̌. He sǎphlǒ ata̤gènè̤ tokhlǒnu aphlôaphǎ.

⁴ He gǔ tô̤ǐphǐnṳ̌ pwa̤sî̌jò̌yô̤̌. He dǒ tǐtutegwe dě he gǔ shôbǐǐlṳ̌ bǎ kòyò kû̌ heyô̤̌sǎkhěkhô̌ yô̤̌mûyô̤̌sǎ.

⁵ Bǎ ta̤pò̤̌ta̤sha hèbǎ he akha bǎbǎ, kòyò ta̤sǔta̤plě ô̌ tokhlǒ ata̤ma̤jî̌ma̤jû̌ kòyònu a ô̌te̤we̤ he akha bǎbǎ he cû̌ ǐsha pe ma̤titè?

⁶ Kòyò nutokhlǒ mî̌ pwa̤ dǒ a sǎmǒhtò̌ ǐtûû̌ ata̤dû̌yò̤̌htò̌sa. A htû̌sò̌ǐ dû̌ ata̤dû̌yò̤̌htò̌sa nutokhlǒ.

⁷ Kòyò dǒ a ma̤hǎplǎge bò̌ kòyò ta̤htûpwa̤nu a ô̌ tôpwa̤ tô̤̌. Dǒ kòyò tôpwa̤ ta̤htûpwa̤ ayanu, a ǐ bò̌ Cǒmaradû̌ alě̤apwe̤ tô̤̌.

⁸ Ta̤htûpwa̤ alě̤apwî̤nu apwî̤dû̌ mî̌ca, kòyò ma̤hǎplǎge bò̌ kû̌ ru tôkhò̌ tô̤̌.

⁹ Pô̤̌khô kòyò tôpwa̤ gǔ ô̌htûpwa̤ bò̌ tûjû̌pwa̤, a glè̌pî̌glè̌sokè tô̤̌ ayanu, kòyò ma̤hǎplǎge bò̌ kû̌ ru tôkhò̌ tô̤̌.

¹⁰ Kòyò pṳ̂̌tôpwa̤ kè̌shǐ tě̤tě̤mè̤̌mè̤̌ kû̌ kòyò dǒ a sî̌khû̌sî̌jò̌ tokhlǒ mî̌ a si nò pwǎ. Kòyòkě tokhlǒ bǎbǎ, kòyòpè̌ tokhlǒ bǎbǎ, a bǎ si nò pwǎ. Asî lǒ̤bò nî̌ a bǎ dò̌kè ata̤dû̌yò̤̌htò̌sa dǒ kòyò ashǔshawa̤ ayapwǎ.

¹¹ Asî hǎkhû̌ tokhlǒnu a ô̌ ǐ kû̌ asîmi̤ tokhlǒ bǎbǎ, asî lṳ̌kû tokhlǒnu mî̌ asî hǐ tûjû̌pwa̤ talakhǎ. Asî lǎ̤ô̌ agûlǎ̤nu a htûkè asî phû̌li̤ lǎ̤ô̌ tûjû̌pwa̤ talakhǎ.

¹² Kòyò dû̌yò̤̌htò̌sa tôpwa̤ mî̌ mî̌ a ô̌yî̤ jò bǎ hǎkhû̌nu tûjû̌pwa̤ tô̤̌. Asî sô̌sô̌kû̌ ta̤phû̌ta̤wè̤ dǒ a si kèbònu.

¹³ Kòyò ǒò̌ dǒ a yṳ̌ǎ tûû̌ anǎ̤ nutokhlǒ bǎbǎ, kòyò dǒ a sǎphlǒpa kû̌ asî nutokhlǒ bǎbǎ, htû̌ asî klè̌ gutṳ̌ hî̌pě, a htûhtò̌ pô̤̌nu pěpě.

¹⁴ Lṳ̌gǎnǎdo kè̌pǒ̤ǐ tûû̌ asî pô̤̌ pwa̤kè̌sû̌phû̌, asî bǎ si sô̌sô̌bò pô̤̌ sû̌phû̌. Lṳmṳ̌lî akha kòyòcǒkòyòtè̤ pǒǐ asî pě. Asî nǎ̤glǒ glè̌lǒso kèbò dǒ lṳ̌gǎnǎdo bǎ a ô̌tapheyî̤ kû̌ asîhǐphò.

¹⁵ He khû̌dayadě Cǒmaradû̌ ma̤hǎplǎge he ta̤htûpwa̤ dǒ lṳ̌gǎnǎdo asîrîshû̌sho acǔdekû pě, a kaǎge he dǒ aô̌ pě.

¹⁶ Bǎ kòyò tôpwa̤pwa̤ dû̌yò̤̌ dě ata̤dû̌yò̤̌htò̌sa tokhlǒ sǔ sǔ a ô̌dû̌htò̌ akhanu, sǎplǎ̤ tǎ̤ tôcǒ mǎ̤.

¹⁷ Bǎ a si akhanu, a phǐcû̌nṳ̌jò nô̌ tôcǒ tô̤̌. Ata̤dû̌yò̤̌htò̌sanu a gû̌ cû̌jò nô̌ a dǒ lṳ̌kû tô̤̌.

¹⁸ Bǎ a ô̌htûpwa̤ akha a sǎphlǒmô̤ jî̌jî̌ anǎ̤, kòyò htû̌sò̌ǐ a bǎbǎkǎlè,

¹⁹ a gǔ si sô̌sô̌ kû̌ pwǎ amǒ̤phaphiphusî dǒwǐkha, a lò̤tě̤ kè dǒ ta̤khǐsiwi̤ agûlǎ̤ tûjû̌pwa̤ pě.

²⁰ Kòyò tôpwa̤pwa̤ dǒ a htû̌sò̌ ǐtûû̌ ata̤dû̌yò̤̌htò̌sa, a sî̌yaphlôphǎ gû̌ kòyò tô̤̌ tôpwa̤pwa̤nu, apî̌alṳ̂̌ sô̌sô̌kû̌ ta̤phû̌ta̤wè̤ pě.