Htû̌sò̌htò̌ 48 - Kawyaw New Testament

Wî̤̌sǐû mî̌ Cǒmaradû̌ awî̤̌dû̌

Phakû̌ri akhlialè tokhlǒ ata̤sǎwǐ htû̌sò̌htò̌.

¹ Cǒmara tûjû̌pwa̤ mî̌ adû̌htû mî̌ca. Kòyò tôbǎ htû̌sò̌htò̌ mî̌ca lû̌û dǒ pa Cǒmaradû̌ awî̤̌kû, akhôlô plò̌shî̌khû̌.

² Cǒmaradû̌ akhôlô, Sǐû khôlô numî̌ adû̌ahtû, awî̤awô̌ gutṳ̌, a ma̤sǎlě̤sǎlò̤ bò hǎkhû̌ tôbǎbò. Sǐû khôlô nî̌ a sô̌sô̌kû̌ khôlôdûkhôlôhtû ô̌ dǒ cǔcôcî̌ tôkhô tokhlǒ, a mî̌ khwǐdû̌ wî̤̌dû̌ tôwî̤̌.

³ Cǒmaradû̌ ô̌ dǒ wî̤̌nutôwî̤̌ ahôhta tokhlǒ akû. A dǔlṳ̌htò̌ ǐ anǎ̤ kû̌ a mî̌ gûlǎ̤ lǎ̤ô̌tûdû.

⁴ Kè̌mò̌, khwǐ tokhlǒ kaǎplǒkaǎcu akli tokhlǒ dě a hèshě wî̤̌nu.

⁵ Bǎ asî kè̌shǐ Sǐû khôlô akhanu, a htò̌shôpe̤bò asî. Asî ǐshabò, a hǎhtò̌ khlè̌shukhlè̌tò̤̌ kèbò.

⁶ Asî ǐsha gònò̤̌gòglè dě ǐshajî̌jû̌ asô̌sô̌kû̌ pwa̤mǒ̤ hǐphushanu.

⁷ Na ma̤pî̌ma̤lṳ̂̌ kèhto asî pô̤̌ gili̤sǎ dǒ lô̤̌bò̌ tôkhô htû̌lûtě̤pro̤kè bò Wî̤̌tashǔ sǒkhlidû̌.

⁸ Pa ganǎ̤de wî̤̌nu a ô̌ kû̌ asîrîdû̌sîrîhtû, khònò̤̌ pa kè̌shǐ bǎ Cǒmara tûjû̌pwa̤ dǒ a pǒ ta̤ lǒ̤bò awî̤̌dû̌ kû̌ panǎ̤. Wî̤̌dû̌ numî̌ Cǒmaradû̌ awî̤̌, a shǒlò̤nǎ lû̌ tûjû̌pwa̤ talakhǎ.

⁹ Ǒ Cǒmaradû̌, pa ô̌ dǒ nata̤lṳ̌htò̌hôkû. Pa gènè̤bǎ nata̤mô̤ dǒ ahǎbòjò tô̤̌nu awe̤akè.

¹⁰ Ǒ Cǒmaradû̌, pô̤̌ nami̤ lṳ̌shilṳ̌gǎ mè̤mè̤̌nu, kòyò gǔ htû̌sò̌ cû̌tǒ̤ jò nami̤ dǒ mǒgutṳ̌, nacǔtûmû nî̌ aô̌lǒô̌be kû̌ ta̤cǒta̤tè̤.

¹¹ Dǒ na cî̌htò̌cǒtè̤ ta̤ akhû̌akhî, Sǐûwî̤̌ gǔ sǎlě̤sǎlò̤ pû nî̌. Yǔdagǎ awî̤̌ tokhlǒ sǎlě̤sǎlò̤ pû nî̌.

¹² Cû̌tewe̤ Sǐû khôlô, lètewe̤ wî̤̌sǐû, cû̌dô̌mǎǐmò̌ hǐphû̌htò̌yô̤̌lǒ lǎ̤ô̌pǒ̤kè̌ nutokhlǒ.

¹³ Pô̤̌khô na gǔ shôbǐǐlṳ̌ bò̌ bǎ naphû̌nali̤ dǒ nô̌kò tôhtu pě ayanu, kè̌mǎǐ gûlǎ̤ lǎ̤ô̌tûdû nutokhlǒ, cû̌ ma̤kè̌kè̌mò̌ hôhta nutokhlǒ.

¹⁴ Cǒmaradû̌ mî̌ pa Cǒmaradû̌ dǒ aô̌ tûjû̌pwa̤ talakhǎ. A gǔ htû bǎ pa pwa̤yṳ̂̌klè̌nè̌klò tûjû̌pwa̤ talakhǎ pě.