Htû̌sò̌htò̌ 47 - Kawyaw New Testament

Cǒmaradû̌ mî̌ pwa̤pǒ dǒ adû̌lǒ

Phakû̌rǐ akhlialè tokhlǒ ata̤sǎwǐ htû̌sò̌htò̌. Dě ta̤sǎwǐ numî̌ pwa̤sǎwǐ ta̤tokhlǒ aikǒlǒlò kû̌ ta̤lṳhtò̌hôkû nutôtô̤̌ aya.

¹ Ǒ꤮ khlilèphû̌ lǒ̤꤮ bò sî, plǎ̤ sîcǔde, sǎlě̤sǎlò̤ kaǎgǔ htû̌sò̌htò̌ Cǒmaradû̌.

² Cǒmara tûjû̌pwa̤ dǒ adû̌ahtûlǒ tôpwa̤ numî̌ ǐsha gònò̤̌gèglè mè̤mè̤̌. A mî̌ hǎkhû̌běkhû̌ akhwǐdû̌.

³ A ma̤pè̤̌ bò bǎ pa kòyò tokhlǒ. A no yî̤lò̤kè pa kû̌ khlilèphû̌ tokhlǒ dǒ pakhǎlǎlǎ̤.

⁴ A rû̌lǎphǐhtò̌ htobǎ pashigǎ dǒ paû̌cata̤ya aya. Dǒ a mô̤nǐ̤ Phayakû akhû̌akhî, gǎ nutôgǎ mî̌ PhaIsôrělaphû̌ tokhlǒ lǎ̤phǐdû̌phǐhtò̌yô̤̌ akòshî̌kòtṳ̌.

⁵ Bǎ Cǒmaradû̌ cû̌htò̌ dǒ ta̤lṳhtò̌hôkû akhanu, kòyò sǎlě̤sǎlò̤ yî̤̌kǒhtò̌ bò Cǒmara tûjû̌pwa̤. Kòyò ǔhtò̌bò tǐtǔtegwe.

⁶ Sǎwǐhtûsò̌htò̌ mò̌, sǎwǐhtûsò̌htò̌ mò̌ Cǒmaradû̌. sǎwǐhtûsò̌htò̌ mò̌, sǎwǐhtûsò̌htò̌ mò̌ pakhwǐdû̌.

⁷ Cǒmaradû̌ mî̌ hǎkhû̌ tôbǎbò akhwǐdû̌, sǎwǐ htû̌sò̌htò̌ mò̌ a kû̌ lî̤hǎwô.

⁸ Cǒmaradû̌ hǎnòò̌ô̌ dǒ agògǒhtò̌yô̤̌lǒ plò̌shǐkhû̌. A pǒǐbò kòyò tokhlǒ.

⁹ Khlilèphû̌ aikǒlǒkò tokhlǒ hè ô̌plǒô̌htu bò kû̌ PhaAbraha a Cǒmara akòyò. Hǎkhû̌běkhû̌ aikǒlǒkò tokhlǒnu, aô̌pwǎ dǒ Cǒmaradû̌ ata̤pǒ alǎ̤. Cǒmara mî̌ kòyò bè̌dû̌bè̌htò̌yô̤̌ lû̌û.