Htû̌sò̌htò̌ 45 - Kawyaw New Testament

Khwǐkhômò̤̌ alṳmṳ̌ni̤ ata̤sǎwǐ

Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû nutôpwa̤ aya. Hebrǔyô̤̌nu, a kaǎ ta̤sǎwǐ nutôtô̤̌ kû̌ Masakǐla ta̤sǎwǐ dě ta̤sǎwǐ nutôtô̤̌ mî̌ a ǐ kòyò ta̤sî̌yaphlôphǎ dě Phakû̌ri akhlialè tokhlǒ sǎwǐ lû̌û. Dě tôbǎ sǎwǐ sô̌sô̌kû̌ ta̤sǎwǐ dě ami̤ kû̌ ta̤phôta̤gî̌ nutôshǒ. Dě numî̌ ta̤khòmò̤̌ ata̤sǎwǐ.

¹ He sǎphlǒ nî̌ a lǒbe kû̌ yô̤̌sǎ dǒ awî̤awô̌. He sǎwǐhtò̌ bǎ lî̤hǎwô tôshǒ dǒ khwǐ aya. He noǎ he lě̤ dǒ anǐ̤ sô̌sô̌kû̌ pwa̤wě̤lî̤ dǒ asî̌ajò̌ tôpwa̤ noǎ alî̤bô.

² Dǒ kòyòhǎkhû̌phû̌ aphû̌pwa̤khû aklanu na phatwè̤̌ gutṳ̌, na mî̌ pwa̤ dǒ a hî̌bǎmô̤ hî̌bǎnǐ̤ mî̌caca tôpwa̤. Pô̤̌nukhû̌khî, Cǒmaradû̌ ǐshowî̤ na tûjû̌pwa̤.

³ Ǒ kliphû̌ dǒ ashû̌shosî̌jò̌, shenṳ̌ mò̌ na nò̌shî dǒ na wǎ̤tě̤lô̤nu. Dǔṳ̌htò̌ mò̌ na ta̤sîrîdû̌sîrîhtû, na ta̤pô̤ta̤phǎ.

⁴ Dò̌nǐ̤ mò̌ na tîsî̌, ma̤pè̤̌kè mò̌ pwa̤sǎkhě na nu. Takatě̤tṳ mò̌ ta̤cǒta̤tè̤, ta̤shò̌lò̤sǎphlǒ, ta̤cî̌htò̌tôbǎ agûlǎ̤ nutôkhô. Na cǔtûmû dǒ asîrîshû̌shonu a dǔlṳ̌htò̌hto na ta̤ma̤ dǒ atirǐsò̌ hǒ.

⁵ Na plǎ̤ nî̌ shěhtònṳ̌ bò mò̌ dǒ pwa̤sǎkhě khwǐ asǎphlǒkû. Khlilèphû̌ tokhlǒ lò̤jû̌kè bò dǒ nalô̤mô̤̌ hǒ.

⁶ Ǒ Cǒmara nashinagǎ ô̌yî̤ pû tûjû̌pwa̤ talakhǎ nî̌. Na pǒǐ pû na kòyò kû̌ ta̤cǒta̤tè̤ nî̌.

⁷ Na mô̤nǐ̤ ta̤ dǒ atôabǎ, na sǎkhî̌ ta̤ dǒ asǔ. Pô̤̌nukhû̌khî, Cǒmara dǒ amè̤̌ na Cǒmaradû̌ rû̌htò̌ na, a no dû̌khlohtûkhlo na kû̌ nasû̌nakhô dě a ǐhto na ta̤sû̌mô̤sò̌mô̤.

⁸ Na jejûhtû lǒ̤bò tokhlǒnu, a nṳ̌mû̌ sô̌sô̌kû̌ ta̤numû̌ dǒ kòyò kaǎ kû̌ Mǔra, Alǔsha kû̌ sǒnumû̌. Khwǐhô tokhlǒ nî̌ kòyò ma̤wî̤tè̤̌sî̌ a kû̌ kòshò sèmè̤̌, ta̤dǒta̤ǔ pwe̤htò̌ dǒ khwǐhô tokhlǒ akû dě a ma̤ sǎlě̤ na.

⁹ Pwa̤mǒ̤ dǒ na bè̌dû̌ǐ yǎ dě a ô̌ dǒ nahôkû akla tokhlǒkhlǒ nu, khwǐ tokhlǒ aphû̌pwa̤mǒ̤ ô̌pa pa. Na khòmò̤̌phû̌mǒ̤ ihtǒô̌ dǒ na cǔtûmû, a tîwî̌htò̌ǐ anǎ̤ kû̌ Ò̌phǐrǎgǎ htawî̤tè̤̌sî̌.

¹⁰ Ǒ khòmò̤̌phû̌mǒ̤, ganǎ̤de, dò̌nò̌ku, gènè̤tě̤mè̤̌, shôpe̤nǎkè mò̌ na khlilè kû̌ na phakhlilènu.

¹¹ Na ta̤wî̤ta̤wô̌ nî̌ ahtěnǐ̤cî̌nǐ̤ khwǐsǎphlǒ. A mî̌ na běcǎ akhû̌akhî, bè̌dubè̌nǎ̤ mò̌ a.

¹² Wî̤̌htarû̌ phû̌mǒ̤ phǐhènǐ̤ sû tôcǒ pě. Kòyòdû̌yò̤̌htò̌sa sǎyṳ no kè̌dû̌ǐ anǎ̤ kû̌ na pě.

¹³ Khòmò̤phû̌mǒ̤ ô̌ dǒ khwǐhôkû, amǒ̤wî̤tè̤sî̌ jî̌jî̌. Aje nî̌ abǒhtò̌ còcè̌ kû̌ hta.

¹⁴ Ǒ khwǐdû̌, khòmò̤̌phû̌mǒ̤ sô̌htò̌nṳ̌ je dǒ asa wî̤awô̌, kòyò sûnṳ̌ yǎ dǒ naô̌. Pwa̤sû khòmò̤̌phû̌mǒ̤ dǒ a gû̌ kû̌ lû̌û tokhlǒ gû̌ hè dǒ akò, kòyò kaǎnṳ̌ asî dǒ na ô̌ô̌.

¹⁵ Kòyò sûhènṳ̌ asî kû̌ ta̤mô̤sû̌mô̤sò̌, ta̤sǎlě̤sǎlò̤, asî hènṳ̌ lô̌khô dǒ khwǐhôkû.

¹⁶ Naphû̌khûsî tokhlǒ gǔ htûhtò̌bò ikǒlǒkò̌dû̌ dǒ na phiphu sîtokhlǒ agûlǎ̤. Na gǔ no asî kû̌ pwa̤pǒ hǎkhû̌ taběbò.

¹⁷ He no gènè̤htò̌bǎ kòyò tokhlǒ kû̌ lǒ̤bò na ma̤ hto ta̤ dǒ adû̌ayô̤̌ nutokhlǒ pṳ̂̌tôhtu pě. Pô̤̌nukhû̌khî, kòyò htû̌sò̌htò̌ na tûjû̌pwa̤ talakhǎ pě.