Htû̌sò̌htò̌ 44 - Kawyaw New Testament

Ta̤kwicaba dǒ ta̤tugutakabǐ aya

Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû tôpwa̤ aya. Hebrǔyô̤̌nu, a kaǎ ta̤sǎwǐ hǒtôshǒ kû̌ Masakǐla ta̤sǎwǐ dǒ Phakû̌ri akhlialè tokhlǒ sǎwǐnu.

¹ Ǒ Cǒmaradû̌, dǒ꤮ něhǎněnô̤̌ paphipaphusî ahtukha, nama̤ kwè̌꤮ bǎ asî mî̌titènu, asî shôbǐǐlṳ̌ gebǎ pa dě pa ganǎ̤de kû̌ panǎ̤.

² Na wṳ̂̌hǎhtò̌kè khlilè shǔshawa̤ tokhlǒ kû̌ na sîrîshû̌sho, na no ô̌ paphipaphusî tokhlǒ bǎ gǎkûnu. Na ma̤pî̌ma̤lṳ̂̌ kèbò khlilè ashǔshawa̤ sîtokhlǒ, na ǐ dû̌htò̌htûhtò̌ paphiphu sîtokhlǒ.

³ Asî pǒǐ shigǎ numî̌ dǒ asî nò̌she akhû̌akhî mè̤̌tô̤̌. Asî ta̤ma̤pè̤̌nu bǎbǎ, dǒ asî khû̌ǎtû̌ akhû̌akhî, amè̤̌tô̤̌tô̤̌. Asî ma̤mô̤ nasǎphlǒ, dǒ na sîrîshû̌sho, nakhû̌naǎ, na ta̤kè̌dû̌ǐ asî akhû̌akhî, asî ma̤pè̤̌ ta̤.

⁴ Na mî̌ hekhwǐ, he Cǒmaradû̌ dǒ a ǐ Îsôrěla khlilèphû̌ ata̤ma̤pè̤̌.

⁵ Dǒ nakhû̌nakhî pa ma̤simè̤mè̤̌ bòmǔtegle pwa̤sǎkhě pa tokhlǒ. Dǒ nami̤ akhû̌akhî, pa gǔ yî̤̌pwî̌khaprû̌cû̌ kèbò pwa̤sǎkhě pa tokhlǒ.

⁶ He sǎmǒhtò̌ he khlǐ tîkî̌ tô̤̌. He nò̌shî nî̌ a dǐcû̌ he ta̤ma̤pè̤̌ tô̤̌tô̤̌.

⁷ Na no ma̤pî̌kè pa kû̌ pwa̤sǎkhě pa nu. Na no sòwò̤̌kè kòyò dǒ a sǎphlǒdû̌ pa.

⁸ Cǒmaradû̌ ma̤pè̤̌kèbò pwa̤sǎkhě pa tokhlǒ akhû̌akhî, pa htû̌sò̌htò̌ a dǒ kòyò lô̤mô̤̌ tônǐ̤mṳ̌hǎ. Pa htû̌sò̌htò̌ǐ nami̤ tûjû̌pwa̤.

⁹ Bǎbǎkǎlè khònò̤̌ na wîkè hto pa, na no sòwò̤̌kè pa. Na htò̌shě kû̌ pa ta̤shě kû̌ kliphû̌ tokhlǒ tô̤̌.

¹⁰ Na no khlè̌ getîkhî kè bò pa kû̌ pwa̤sǎkhě pa tokhlǒ alǎ̤. Kòyò dǒ asǎkhěkhû̌khwè pa tokhlǒ asǎyṳ titètè̌ dě a pṳ̂̌sigwǐyǒsaphǎ bòkè pata.

¹¹ Na no ma̤si kèbò pa pô̤̌ kòyò ma̤si sû̌phû̌ kû̌ pè̤̌. Na ma̤lûpò̌lûshe cû̌kè bò pa dǒ kòyòkhlilè shǔshawa̤ tokhlǒ akla.

¹² Na shaǎ pwî̤jǎ bǎ na kòyò. Na kwi pwî̤dû̌ asî apwî̤ tô̤̌.

¹³ Na no pî̤jî̌ǐsho, hî̌jî̌hî̌jû̌, pòhò bò pa kû̌ kòyò ô̌ te̤we̤bò kû̌ pa.

¹⁴ Dǒ kòyòkhlilè shǔshawa̤ tokhlǒ aklanu, na no pî̤jî̌ǐsho sǎyǎ̤ bò kòyò kû̌ pa. Kòyò gènè̤pî̌tî̌ pa, a jî̌sutǔ mě̤htò̌, anǒlò̤ lô̌khô a ikǒ.

¹⁵ He gènè̤ sòwò̤̌ jî̌jî̌ henǎ̤ tônǐ̤mṳ̌hǎ. He mǐ̤sǎ ô̌ pe kû̌ kòyò tô̤̌.

¹⁶ Kòyò pî̤jî̌ǐsho he, kòyò hî̌ takǎ he, kòyò ma̤ he pô̤̌o dǒ pwa̤sǎkhě he, pwa̤ sǎyṳ ma̤sha he tokhlǒ alô̤mô̤̌ akhû̌akhî, he khòbǎ pô̤̌o.

¹⁷ Pa shôpe̤ kè na tô̤̌tô̤̌, na ta̤olò̤ dě pa cû̌tûlû̌khatûlû̌ tô̤̌tô̤̌, bǎbǎkǎlè pa khòbǎ bò ta̤hǒo tokhlǒ.

¹⁸ Pa sǎphlǒ htû̌tiwǐkhô̌ pe bǎ tô̤̌. Pa cû̌khô̌kè nô̌ naklè̌ tôkhò̌ tô̤̌tô̤̌.

¹⁹ Bǎbǎkǎlè na ma̤lagǎ pwǐkè pa bǎ shǐmi̤ lǎ̤ô̌ agûlǎ̤. Na bè̌tò̤̌kè pa dǒ ta̤si lǎ̤pǒ agûlǎ̤.

²⁰ Pa kè̌ shôpe̤ kè pa Cǒmaradû̌, pa kè̌ cû̌ cabahtò̌khô̌ Cǒmara dǒ ashǐshawa̤ tokhlǒ mî̌,

²¹ Cǒmaradû̌ nî̌ a sî̌ganǎ̤ bò pa ta̤gènè̤hǔ gènè̤sè̌ tokhlǒ akhû̌akhî, ta̤htûhtò̌ tokhlǒ mî̌ a sî̌ganǎ̤ bǎtô̤̌ ya?

²² Dǒ pa gû̌kû̌ nakò akhû̌akhî, pa kè̌shǐtṳ̌bǎ kû̌ ta̤si tônǐ̤mṳ̌hǎ. Kòyò gènè̤ pa pô̤̌ sû̌phû̌ dǒ kòyò glè̌ ma̤si lû̌û nu.

²³ Ǒ Běcǎdû̌ ihtǒ ma̤mò̌, na cû̌ hǎmôô̌shôpe̤ ma̤titè? Ihtǒ ma̤mò̌, wîkè tǎ̤ pa mǎ̤.

²⁴ Na cû̌ htû̌tiwǐkhô̌kè tǒ̤ namǐ̤sǎ ma̤titè? Na shôpe̤ kè nô̌ hǒ pa khòjî̌khòjû̌ hǒonu kû̌ kòyò ma̤jî̌ma̤jû̌ pa hǒtokhlǒ hǒ ya?

²⁵ Pa lò̤jû̌ dě lò̤khǔpo̤kè dǒ hǎkumṳ̌ kla hǒ. Pa lò̤khupo̤ klǎkè dǒ hǎkhû̌ hǒ.

²⁶ Hèma̤jè̌ mò̌ pa, na mô̤ pa kû̌ na ta̤mô̤ dǒ ahǎbòjò tô̤̌nu akhû̌akhî, ma̤hǎplǎkè mò̌ pa.