Htû̌sò̌htò̌ 43 - Kawyaw New Testament

Ta̤kè̌shunǎla̤ǐ Cǒmara ata̤ma̤jè̌ bǎ ta̤pò̤̌ta̤sha akû

¹ Ǒ꤮ Cǒmara pwe̤ǐlṳ̌ mò̌ kòyò kû̌ he ta̤sǔ ô̌tô̤̌. Hî̌bǎtakabǐ bǎ mò̌ he kû̌ kòyò dǒ a sî̌ganǎ̤ kû̌ kòyò Cǒmara tô̤̌ nutokhlǒ dò̌ he ta̤sǔnu. Na mî̌ Cǒmaradû̌ dǒ a takabǐǐ he tôpwa̤ akhû̌akhî, ma̤hǎplǎkè mò̌ he dǒ kòyò lòhǎlòhò, kòyòkhu phû̌mò̤̌ acǔdekû.

² Ma̤titèdě na cû̌wîkè he ma̤titè? Ma̤titèdě pwa̤sǎkhě he tokhlǒ bǎ ma̤numa̤cî̌ ma̤hǎ he ma̤titè?

³ No lîlṳ̌htò̌ pè̤̌mò̌ he kû̌ na ta̤lî, no nè̌klè̌nè̌klò mò̌ he kû̌ na ta̤tě̤ta̤mè̤̌. Sûcû̌nǐ̤ he dǒ nakhôlôplò̌shǐ alô̤ bǎ nalǎ̤ô̌ agûlǎ̤ nutôkû.

⁴ He gǔ hè dǒ Cǒmaradû̌ ata̤lṳhtò̌wǎ̤ ô̌ nupe, Cǒmaradû̌ mî̌ he ta̤sǎlě̤sǎlò̤, he ta̤sǎlě̤mô̤. He gǔ tôglô̌ tǐtutegwe, sǎwǐhtûsò̌htò̌ Cǒmaradû̌, he Cǒmara.

⁵ Ǒ꤮ he cû̌ sǎplǎ̤ gutṳ̌ ma̤titè? He cû̌ gû̌gè̌ gutṳ̌ ma̤titè? Tûrû̌꤮ kè̌shuǐ Cǒmaradû̌ nu, he gǔ htû̌sò̌htò̌ sô̌ Cǒmaradû̌ dǒ a ma̤hǎplǎkè he, amî̌ he Cǒmaradû̌ nutôpwa̤.