Htû̌sò̌htò̌ 41 - Kawyaw New Testament

Ta̤kwicaba bǎ akhòbǎ ta̤shǐta̤sha akha

Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤tokhlǒ aikǒlǒkò kû̌ ta̤lṳhtò̌hôkû nutôpwa̤ aya.

¹ Kòyò dǒ a gènè̤bǎ kòyò shèphû̌shèwè̤phû̌ tokhlǒnu, a nǐ̤bǎ ta̤ǐshôwî̤. Bǎ a kè̌shǐtṳ̌bǎ kû̌ ta̤pò̤̌ta̤sha akhanu, Cǒmara tûjû̌pwa̤ ma̤hǎplǎ yǎ pě.

² Cǒmara tûjû̌pwa̤ gǔ tugǔtaka, a gǔ ô̌pǒ̤kè̌ǐ ata̤htûpwa̤ pě. Cǒmara tûjû̌pwa̤ ǐshowî̤ lû̌û dǒ agǎkû. Pwa̤sǎkhě lû̌û tokhlǒ sǎyṳma̤ hî̌tènu a dǐma̤ tô̤̌.

³ Bǎ a shǐsha hǎmôô̌ dǒ lǎ̤dakhû̌ akhanu, Cǒmara tûjû̌pwa̤ gǔ kè̌ǐ ma̤jè̌ǐ lû̌û, a no ô̌shû̌ô̌mô̤wô̌ sô̌ lû̌û pě.

⁴ Dǒ hekhû̌daya dě, he hî̌ kû̌, “Ǒ Cǒmara tûjû̌pwa̤, he ma̤sǔma̤plě na hǒ, gwèbǎǐ mò̌ he, ma̤ ô̌shû̌ô̌mô̤ sô̌mò̌ he.”

⁵ Pwa̤sǎkhě he tokhlǒ sǎkhwè̌ dě a hî̌phû̌mò̤̌shǐhtô he kû̌, “A si pě dě a phû̌ ô̌kè tô̤̌ akhlilè hǎmǎkè pě.”

⁶ Bǎkhòtè bǎbǎ, kòyò tôpwa̤pwa̤ kè̌ hèô̌lè kè̌shǐ kû̌ he hî̌nu, a hè jî̌khô̌jî̌yò pô̤̌ khôbǒsû̌, dě a gènè̤ còcè̌ lǎ̤hî̌pǐ̤ hemi̤. Bǎ a hǎhtò̌ge akhanu, a cû̌lè dô̌bò heyô̤ pṳ̂̌tôkû.

⁷ Lǒ̤bò kòyò dǒ a sǎkhěkhû̌khwè he tokhlǒnu, a dô̌hǔdô̌sè̌ wô̤̌wô̤̌ lû̌û heyô̤. A yè̤lò̤nǎ dǒ a gǔ ma̤ phû̌mò̤̌shî̌htô he.

⁸ A hî̌ lô̌khô kû̌, “A ô̌tṳ̂rṳ̂ kè hǒ, a ihtǒ bò̌ pe nô̌ tô̤̌.”

⁹ He sû̌khô dǒ he bǒsû̌khǎkhô mô̤nǐ̤ lû̌û kû̌ he yṳ̌ǎnṳ̌ lû̌û nutôpwa̤ bǎbǎ, a ǎcuôcu kû̌ he nutôpwa̤ bǎbǎ, a sǎyṳ shaǎlò̤kè hemi̤.

¹⁰ Bǎbǎkǎlè ǒ Cǒmara tûjû̌pwa̤, pô̤̌khô he gǔ ma̤ geshěshu bò̌ asî ayanu, gwèbǎǐ he, cǐihtǒ mò̌ he.

¹¹ Dǒ pwa̤sǎkhě he tokhlǒ ma̤pè̤̌jò he tô̤̌ akhû̌akhî, he sǎganǎ̤ kû̌ na sǎphlǒô̌ sǎphlǒtô kû̌ he.

¹² Hecǒhetè̤ akhû̌akhî, na ma̤jè̌ he. Na dǐô̌ he kû̌ na dǒ na lô̤mô̤̌ tûjû̌pwa̤ talakhǎ.

¹³ Htûsò̌htò̌ pwǎ Cǒmara tûjû̌pwa̤, amî̌ Isôrěla khlilè a Cǒmaradû̌nu tûjû̌pwa̤ talakhǎ nî̌. Ame̤, Ame̤.