Htû̌sò̌htò̌ 40 - Kawyaw New Testament

Kwicabahtò̌ dǒ ta̤ma̤jè̌ aya

Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤tokhlǒ aikǒlǒkò kû̌ ta̤lṳhtò̌hôkû nutôpwa̤ aya.

¹ He ô̌pǒ̤ sǎphlǒhtûǐ Cǒmara tûjû̌pwa̤ ata̤ma̤jè̌. A htû̌tiwǐkè̌tô he dě a ganǎ̤de he ta̤kwisǎyṳhtò̌.

² A cî̌htò̌ he dǒ ta̤sita̤hǎmǎ agûlǎ̤, dǒ pèè̌ phû̌mò̤̌ akla. A cû̌bè̌htò̌ he dǒ lǒ̤dû̌ lǎ̤hǎplǎ gûlǎ̤ alô̤, dě amô̤̌kè he sǎphlǒ.

³ A ǐhto he lî̤hǎwô dǒ asa, ta̤sǎwǐ dǒ lǎ̤sǎwǐ htû̌sò̌htò̌ kû̌ pa Cǒmaradû̌. Kòyò dû̌wî̤ gǔ ganǎ̤de lî̤hǎwô pě dě a gǔ ǐsha bè̌dubè̌nǎ̤ bò Cǒmara tûjû̌pwa̤. Asî yṳ̌ǎnṳ̌ Cǒmaradû̌ pě.

⁴ Kòyò dǒ a sǎmǒhtò̌ǐ Cǒmara tûjû̌pwa̤ nutokhlǒ, kû̌ kòyò dǒ a kè̌shuǐ ta̤ma̤jè̌ dǒ pwa̤phǐdû̌phǐhtò̌yô̤̌ anǎ̤ nutokhlǒ a ô̌ tô̤̌, mè̤̌tô̤̌mî̌ kòyò dǒ a yṳ̌ǎ gû̌ kòyò Cǒmara dǒ asǔ nutokhlǒ tô̤̌ nutokhlǒ mî̌, kòyò dǒ a nǐ̤bǎ ta̤ǐshôwî̤.

⁵ Ǒ Cǒmara tûjû̌pwa̤, he Cǒmaradû̌, ta̤cô̌klǐcô̌sè dǒ na ma̤ hto tokhlǒnu a ô̌wô̤̌ mî̌ca. Ta̤yè̤lò̤nǎ dǒ na ma̤ bǎ paya tokhlǒnu, kòyò ma̤ sô̌sô̌kû̌ nanu a ô̌ tôpwa̤ tô̤̌. Na ta̤ma̤cô̌klǐkǐya dǒ he dô̌bǎ pè̤̌jòpe tô̤̌nu, he shôbǐǐlṳ̌ pè̤̌jòpe tô̤̌.

⁶ Kòyò ma̤si lṳhtò̌ ta̤phû̌ta̤li̤ tokhlǒ kû̌ ta̤lṳtòhtò̌ tokhlǒnu, na sǎyṳ tô̤̌. Ta̤shû̌u lṳhtò̌ ta̤phû̌ta̤li̤ tokhlǒ bǎbǎ, ta̤lṳhtò̌ dǒ lǎ̤plûkè ta̤sǔ ayanu bǎbǎ, na kwi nô̌ tô̤̌tô̤̌. Bǎbǎkǎlè na sǎyṳ dǒ he gǔ ganǎ̤de yṳ̌ǎ nayô̤̌.

⁷ He hî̌ kû̌, “Pô̤̌ kòyò wě̤nṳ̌ hewe̤hekè dǒ lî̤plò̌shǐ akû nu, ǒ he Cǒmaradû̌, hǒo he hè hǒ.

⁸ He sǎyṳ ma̤ pwǎ tǒ̤ na ta̤sǎyṳ, na ta̤sû̌ta̤tòwò ô̌ lǒ̤bò dǒ he sǎphlǒkû hǒ.”

⁹ Ǒ Cǒmara tûjû̌pwa̤, he shôbǐǐlṳ̌ nata̤cǒta̤tè̤ awe̤akè dǒ kòyò saprṳ̂dû̌nu akla. Pô̤̌ na sǎganǎ̤tû̌ nu, he shôbǐǐlṳ̌nu ô̌kǔ pe tô̤̌.

¹⁰ He bè̌hǔbè̌sè̌ kè na ta̤cǒta̤tè̤ dǒ he sǎphlǒkû tô̤̌. Pṳ̂̌plǎplǎ he pwe̤ǐlṳ̌ na ta̤jû kû̌ yô̤̌, na ta̤ma̤hǎplǎge tokhlǒ. Dǒ kòyò saprṳ̂ aklanu, na ta̤mô̤ dǒ ahǎbòjò tô̤̌nu bǎbǎ, na ta̤tě̤ta̤mè̤̌nu bǎbǎ, he ma̤bǐma̤sè̌ kè nô̌ tô̤̌.

¹¹ Ǒ꤮ Cǒmara tûjû̌pwa̤, phî̌wô̌ tîkhî tǎ̤ na ta̤gwèbǎǐ nǐ̤ henu mǎ̤. Pṳ̂̌plǎplǎ no takabǐnǐ̤ he kû̌ na ta̤mô̤ dǒ ahǎbòjò tô̤̌ kû̌ na ta̤tě̤ta̤mè̤̌.

¹² Ta̤pò̤̌ta̤sha dǒ he dô̌kènè bò jò pe tô̤̌nu aô̌te̤we̤ lǒ̤bò he. He ta̤sǔta̤plě dû̌ tûlû̌ dě a ma̤khǐma̤shôpe̤ bò he akhû̌akhî, he kè̌shǐjò pe tô̤̌. A ô̌dû̌wî̤ bò pe kû̌ he khǔlṳ akhû̌akhî, he sǎplǎ̤khû̌ǎlò̤ mî̌ca.

¹³ Ǒ꤮ Cǒmara tûjû̌pwa̤, khòsǎdô, ma̤hǎplǎge he. Ǒ꤮ Cǒmara tûjû̌pwa̤, hè ma̤jè̌ phwèphwè mò̌ he.

¹⁴ Kòyò dǒ a kè̌lǎ ma̤si he tokhlǒnu, no shòwò̤̌ htò̌shôpe̤shônǎ kèbò tûû̌ asî. Kòyò dǒ a sǎyṳ nopî̌nolṳ̂̌ he tokhlǒnu, no shòwò̤̌ khlè̌getîkhlî̌ kèbò asî.

¹⁵ Kòyò dǒ a hî̌ he kû̌, “Grǔ grǔ” tokhlǒnu dǒ a shòwò̤̌ akhû̌akhî, no sǎǐsha sû̌pi̤sò̌pǐ̤ bò asî.

¹⁶ Bǎbǎkǎlè kòyò dǒ a kè̌shuǐ na tokhlǒnu, a gǔ sǎlě̤sǎlò̤ bò nî̌. Kòyò dǒ a mô̤nǐ̤ na ta̤ma̤hǎplǎge tokhlǒnu, pṳ̂̌plǎplǎ a gǔ hî̌ pô̤̌ kû̌, “Htû̌sò̌htò̌ Cǒmara tûjû̌pwa̤,” pô̤̌nu pe nî̌.

¹⁷ Ǒ꤮ Běcǎdû̌, kòyò pè̤̌ǎpè̤̌ô he, he shôdô pwa̤ma̤jè̌. Bǎbǎkǎlè na shôpe̤nǎkè he tô̤̌. Na mî̌ pwa̤ma̤jè̌ he, pwa̤ma̤hǎplǎ he. Ǒ꤮ he Cǒmaradû̌, ma̤yo̤ tǎ̤mǎ̤ nî̌꤮.