Htû̌sò̌htò̌ 4 - Kawyaw New Testament

Lṳmṳ̌hǎ ta̤kwicaba dǒ ta̤ma̤jè̌ aya

Khwidawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû tôpwa̤ aya. Bǎ sǎwǐ ta̤sǎwǐ nuakhanu, bǎ dǒ lû̌kû̌ ta̤dǒta̤ǔ dǒ apli̤ô̌ tokhlǒ.

¹ Ǒ he Cǒmaradû̌ dǒ acǒatè̤, bǎ he kwisǎyṳhtò̌ na akhanu, ganǎ̤de he ta̤kwihtò̌ nanu. Bǎ he kè̌shǐtṳ̌bǎ ta̤pò̤̌ta̤sha akhanu, na ma̤jè̌ hto he hǒ. Gwèbǎǐ he, ganǎ̤de hetakwihtò̌ nanu.

² Ǒ kòyò hǎkhû̌phû̌ sî, sî gǔ ma̤sòwò̤̌ pòhò yî̤ he pwǐtè? Sî gǔ mô̤ǐyî̤ pe ta̤tṳ̌dè pwǐtè dě sî gǔ kè̌lǎ pe ta̤ dǒ asǔnu pwǐtè?

³ Sî̌ganǎ̤ lô̌khô kû̌ Cǒmara tûjû̌pwa̤ rû̌htò̌ tûû̌ kòyò dǒ a bè̌dubè̌nǎ̤ lû̌û nutokhlǒ dǒ aya hǒ. Bǎ he kwihtò̌ a akha a ganǎ̤de pě.

⁴ Bǎ na sǎphlǒdû̌ akhanu, ma̤ tǎ̤ ta̤sǔ mǎ̤. Bǎ na hǎmôô̌ akhanu, bè̌gûjû̌ sǎphlǒ, gènè̤ tě̤tě̤mè̤̌mè̤̌.

⁵ Lṳhtò̌tòhtò̌ ta̤cǒta̤tè̤ta̤lṳ dǒ atôabǎ, yṳ̌ǎ nǎla̤ǐ Cǒmara tûjû̌pwa̤.

⁶ Kòyò saprṳ̂ hî̌ lô̌khô kû̌, “Mò̌pè ma̤jò bǎ pa ta̤wô̌ tôcǒcǒ ya?” Ǒ Cǒmara tûjû̌pwa̤, kè̌mô̤ kè̌wô̌ǐ pa.

⁷ Na ma̤sǎlě̤sǎlò̤ khlo he kû̌ bǎ asî nṳ̌bǎta̤dû̌we̤ sǒsusǒsǎ kû̌ shisǐyô̤sa akhanu.

⁸ Ǒ Cǒmara tûjû̌pwa̤, tǒ̤꤮ pwǎ na tugǔtaka ô̌pǒ̤kè̌khwè̌ǐ he akhû̌akhî, he û̌lò̤ dě hǎmôô̌nṳ̌ mô̤mô̤bǎbǎ sû̌pǐ̤sò̌pǐ̤ pě.