Htû̌sò̌htò̌ 38 - Kawyaw New Testament

Khwǐdawi̤ ata̤htû̌sò̌htò̌, ata̤gènè̤htò̌ ta̤lṳhtò̌hô

Khwǐdawi̤ ata̤sǎwǐ htû̌sò̌htò̌. Bǎ akwisǎyṳhtò̌ Cǒmara akhanu, a sǎwǐ ta̤sǎwǐ hǒ tôshǒ.

¹ Ǒ Cǒmara tûjû̌pwa̤, bǎ na sǎphlǒdû̌ akhanu, sǎhtǎdû̌da tǎ̤ he mǎ̤. Bǎ na sǎphlǒdû̌ akha bǎbǎ, plè tǎ̤ he mǎ̤.

² Na plǎ̤ hèshunṳ̌ bòkè dǒ he yî̌kû, na shò̌lò̤ he hǒ.

³ Dǒ na ta̤sǎphlǒdû̌ akhû̌akhî, asha mǔsipwǐ̤ bò henǎ̤ tôpwa̤bò. Dǒ he ta̤sǔ akhû̌akhî, he nǎ̤glǒ tôpwa̤bò ashǐashabò.

⁴ He ta̤sǔta̤plě htò̌plǒbǐbò he sô̌sô̌kû̌ ta̤wǐta̤ò̌ dǒ ahtǒnu. Ahtǒ talû̌ shû̌lě dǒ heya.

⁵ Dǒ he ma̤takǎ tûû̌ heya akhû̌akhî, he ta̤sha tokhlǒ amisu dě anusokèbò hǒ.

⁶ Ashajî̌shajû̌ mî̌ca he akhû̌akhî, he û̌jûgrû mè̤̌caca. Hehǎhewô tônǐ̤mṳ̌hǎ.

⁷ A shakhwǐshakhû̌ bò he kòtadǎ. Asha mǔsipwǐ̤ bòkè henǎ̤ tôpwa̤bòw.

⁸ Hekhû̌ǎ yû̌lò̤bò kè hǒ, he lò̤gǎmǔbò kè hǒ. He sǎphlǒgû̌ sǎphlǒgè̌ mî̌ca akhû̌akhî, he kookasha hǒ.

⁹ Ǒ Běcǎdû̌, he sǎlě̤ sǎyṳ kwè̌ mî̌titènu, na sî̌ganǎ̤ bò hǒ. Na ganǎ̤de bò hto he ta̤kookasha hǒ.

¹⁰ Agû̌agè̌ mî̌ca he sǎphlǒ, hekhû̌heǎ ô̌ pe tô̤̌tô̤̌. Akhǐ bò he mǐ̤sǎ hǒ.

¹¹ Dǒ he ta̤sha akhû̌akhî, he khôbǒsû̌sî, he khôsî cû̌ kèbò helǎ̤ hǒ. He khlilè phǔtinǐ̤ bǎbǎ, a cû̌ô̌ tepheyî̤kè bò kû̌ he hǒ.

¹² Kòyò dǒ a kè̌lǎ ma̤si he tokhlǒ dò lô̌khô ta̤dònǎ. Kòyò dǒ a sǎyṳ ma̤bǎ he tokhlǒ hî̌pî̌hî̌lṳ̂̌ bò he. Pṳ̂̌ni̤ni̤ a glè̌ma̤ lòhǎlòhô lô̌khô pwǎ he.

¹³ Bǎbǎkǎlè he sô̌sô̌kè kû̌ kòyò koo dǒ a ganǎ̤de pe asî ta̤hî̌bǎ tô̤̌. He sô̌sô̌kè kû̌ kòyòpè̌ dǒ a hî̌shǔ jò pe asî tô̤̌.

¹⁴ He htûhtò̌ kòyò dǒ a ganǎ̤de tôcǒ tô̤̌, a htè̌shěshu jò tôcǒ tô̤̌nu hǒ.

¹⁵ Ǒ Cǒmara tûjû̌pwa̤, he dô̌yṳ̂̌ǐ na. Ǒ Běcǎdû̌ mî̌ he Cǒmaradû̌, na hî̌bǎshěshu mè̤̌caca he pě.

¹⁶ He hî̌ kû̌, “Bǎ he lò̤khǔpo̤lò̤ akhanu, no sǎlě̤ tǎ̤ asî mǎ̤, kè̌ mè̤̌tô̤̌dě no bè̌dû̌bè̌htò̌lǒ tǎ̤ asînǎ̤ dǒ hekhû̌ mǎ̤.”

¹⁷ He glè̌ htò̌tukhu lò̤khǔpo̤ hǒ, dě asha꤮ gudǔdǔ he nǎ̤.

¹⁸ He olò̤wǎ̤lò̤ he ta̤sǔta̤plě. He sǎplǎ̤ǐ tûû̌ he ta̤ma̤shǔ hǒ.

¹⁹ Pwa̤sǎkhě he tokhlǒ a ô̌shû̌ô̌mô̤, akhû̌ǎshû̌sho gutṳ̌. Ta̤we̤ta̤kè ô̌ tôcǒ tô̤̌ bǎbǎkǎlè kòyò dǒ a sǎphlǒdû̌ tônô̤ henu a ô̌wô̤̌ô̌dû̌ gutṳ̌.

²⁰ Bǎ he gû̌kû̌ ta̤wî̤ta̤wô̌ akhanu, asî dô̌ he yô̤. He ma̤ asî dǒ ta̤twî̤ta̤wô̌ bǎbǎkǎlè asî ma̤geshěshu he kû̌ ta̤phû̌mò̤̌shǐhtô.

²¹ Ǒ꤮ Cǒmara tûjû̌pwa̤, wîkè tǎ̤ he mǎ̤. Ǒ꤮ he Cǒmaradû̌, ô̌tepheyî̤ tǎ̤ kû̌ he mǎ̤.

²² Ǒ꤮ Běcǎdû̌, pwa̤ma̤hǎplǎge he, hè ma̤jè̌ phwèmò̌ he nî̌꤮.