Htû̌sò̌htò̌ 37 - Kawyaw New Testament

Kòyòkhu phû̌mò̤̌ kû̌ Kòyòwô̌ aklè̌ gutṳ̌

Khwǐdawi̤ ata̤sǎwǐ htû̌sò̌htò̌

¹ Dǒ kòyòkhu phû̌mò̤̌ akhû̌akhî, sǎphlǒdû̌ sǎphlǒpî̌ tǎ̤mǎ̤. Dǒ kòyò ma̤ ta̤sǔta̤plě akhû̌akhî, sǎkhwè̌ khû̌khwè kòyò tǎ̤mǎ̤.

² Tôshò̌phû̌ akû nô̤̌, asî nôkè sô̌sô̌kû̌ mi̤mṳ̌ pě. Hěpě, asî khwesi kèbò sô̌sô̌kû̌ sǒdosǒlǎ pě.

³ Yṳ̌ǎnṳ̌ Cǒmara tûjû̌pwa̤, ma̤ lô̌khô ta̤wô̌. Nṳ̌ô̌ bǎ gǎ dǒ a ǐ na dě ô̌ kû̌ ta̤sǎphlǒ gûjû̌kabǎ nî̌.

⁴ Sǎlě̤sǎlò̤ dǒ Cǒmara tûjû̌pwa̤ akû. A ǐ tûû̌ na sǎphlǒ ata̤sǎlě̤sǎlò̤ pě.

⁵ Ǐlò̤ bò na ta̤ô̌htûpwa̤ dǒ Cǒmara tûjû̌pwa̤ acǔdekû. Nǎla̤ǐ a dě a ma̤jè̌ tûû̌ na pě.

⁶ A glè̌ no lîhtò̌ na ta̤cǒta̤tè̤nu pô̤̌ lṳ̌mṳ̌lîbû. A gǔ no kakhahtò̌ na ta̤ma̤tôma̤bǎnu pô̤̌ lṳmṳ̌sha.

⁷ Sǔtukǔkǔ ô̌ pû dǒ Cǒmara tûjû̌pwa̤ alô̤mô̤̌, ô̌pǒ̤ sǎphlǒhtû dǒ a gǔ ma̤ bǎ na. Bǎ kòyòphû̌mò̤̌ dû̌yò̤̌htò̌sa kû̌ asîklè̌asîklò akhanu bǎbǎ, bǎ asî ta̤yè̤lò̤nǎ glè̌ ma̤phû̌mò̤̌ û̌ kòyò htûhtò̌bò akhanu bǎbǎ, sǎphlǒdû̌ sǎphlǒpî̌ tǎ̤mǎ̤mǎ̤.

⁸ Dǐô̌kǔkè na ta̤sǎphlǒdû̌, cû̌tephekè kû̌ ta̤sǎphlǒdû̌. A no ma̤ còcè̌ pwǎ na ta̤phû̌mò̤̌shǐhtô akhû̌akhî, sǎphlǒdû̌ sǎphlǒpî̌ pe tǎ̤mǎ̤.

⁹ Kòyòkhu phû̌mò̤̌ tokhlǒnu a hǎmǎ pě. Kòyò dǒ a kè̌shu nǎla̤ǐ Cǒmara tûjû̌pwa̤ nî̌ asî gǔ nǐ̤bǎ shigǎ dǒ Cǒmara olò̤nǐ̤ asî nupě.

¹⁰ Bǎ tôshò̌phû̌ akû nô̤̌ pě, kòyòkhu phû̌mò̤̌ nutokhlǒ hǎmǎbò pě. Na kè̌lǎ takǎ asî bǎbǎ, na kè̌shǐjò pe asî tô̤̌.

¹¹ Kòyò dǒ a shò̌lò̤ asǎphlǒ tokhlǒnu, shigǎ gǔ htû asî û̌cata̤bǐ. A nǐ̤bǎ ta̤ô̌mô̤ô̌bǎ pṳ̂̌ tôcǒ dǒ Cǒmara ǐ nupě.

¹² Kòyòkhu glè̌ ma̤phû̌mò̤̌shǐhtô lô̌khô kòyòsǎphlǒwô̌. A ǎmṳ akhǎ.

¹³ Bǎbǎkǎlè Běcǎdû̌ sî̌ganǎ̤ kû̌ kòyò glè̌ cî̌htò̌ asî alṳmṳ̌ni̤ phǔhtò̌hǒ akhû̌akhî, Běcǎdû̌ sǎyî̤̌ pwǎ kòyòphû̌mò̤̌ nutokhlǒ.

¹⁴ Kòyòkhu phû̌mò̤̌ tokhlǒ, pô̤̌khô a gǔ ma̤si kòyò hǎwě̤shèwè̤, kòyò shôdô ta̤ma̤jè̌, kòyòcǒkòyòtè̤ tokhlǒ ayanu, a phǐhtò̌ nǎ atòdǔ hǒ, a yè̤htò̌ nǎ hto akhlǐ hǒ.

¹⁵ Bǎbǎkǎlè asî gǔ shusi ge tîkhî sô̌ kû̌ anǎ̤. Asî khlǐ bǎbǎ kòyò yǒlagǎ kèbò pě.

¹⁶ Kòyò sǎphlǒwô̌ ata̤dû̌yò̤̌htò̌sa tîkî̌ phû̌pwǎnu, awô̌ khlo pe kû̌ kòyòphû̌mò̤̌ ǎpwa̤ ata̤dû̌yò̤̌htò̌sa.

¹⁷ Ma̤titèhî̌dě Cǒmara tûjû̌pwa̤ yǒlagǎkèbò kòyòphû̌mò̤̌ tokhlǒ acǔgô̌ pě. A ma̤jè̌ kòyò sǎphlǒwô̌ pě.

¹⁸ Cǒmara tûjû̌pwa̤ sî̌ganǎ̤ kòyò dǒ ata̤sǔ ô̌tô̤̌ nutokhlǒ alṳmṳ̌ni̤. Asî û̌tě̤û̌ca ô̌měô̌gle wô̌ tûjû̌pwa̤ pě.

¹⁹ Bǎ gǎpò̤̌gǎsha akha bǎbǎ, asî lǎ̤sòwò̤̌ alǎ̤ ô̌tô̤̌. Bǎ gǎwǐ̤gǎkodû̌ akha bǎbǎ asî ǎkǒôbe pě.

²⁰ Kòyòkhu phû̌mò̤̌ dě asi ahǎmǎ kèbò pě. Pwa̤sǎkhě Cǒmara tûjû̌pwa̤ hǎmǎ kèbò pô̤̌ mi̤phô ô̌ dǒ doklakhû̌nu pě. Asî hǎmǎ kèbò sô̌sô̌kû̌ mî̌khǔ pě.

²¹ Kòyòkhu phû̌mò̤̌nu a phî̌bǒ kòyòta dě a ǐ tîkhî kòyò tô̤̌. Kòyò sǎphlǒwô̌nu a ǐ kòyò dě a sǎleǐ tîkhîtô̤̌.

²² Kòyò dǒ Cǒmara tûjû̌pwa̤ ǐshôwî̤ lû̌û tokhlǒnu, shigǎ nî̌ a gǔ htû lû̌û û̌cata̤ya. Kòyò dǒ Cǒmara tûjû̌pwa̤ ǐsho lû̌û tokhlǒ dě kòyò gǔ wṳ̂̌htò̌cû̌tepheyî̤ kè asî.

²³ Cǒmara tûjû̌pwa̤ nè̌klè̌nè̌klò kòyò dǒ a mô̤nǐ̤ lû̌û nutôpwa̤ khǎlǎ lǎ̤kha. A sǎphlǒtô lû̌û klè̌.

²⁴ Cǒmara tûjû̌pwa̤ pṳ̂̌měǐ a kû̌ acǔde akhû̌akhî, a htò̌tukhu bǎbǎkǎlè a lò̤khǔpo̤ tô̤̌.

²⁵ Dǒ he phijǎkha tǒ̤htû̌ he mǒ̤pwǎ̤ khònò̤̌, kòyò sǎphlǒwô̌ tokhlǒ bǎbǎ, aphû̌ali̤ tokhlǒ bǎbǎ, Cǒmara tûjû̌pwa̤ wîkè asî dě a cû̌kwiǎ kòshǎnu, he kè̌shǐ nô̌ tôkhò̌ tô̤̌.

²⁶ Pṳ̂̌plǎplǎ a sǎyṳ ǐ shû̌ kòyò, a dǐbǒpè̤̌kwe kòyò ru, dě Cǒmara ǐshowî̤ aphû̌ali̤.

²⁷ Wîkèbò ta̤phû̌mò̤̌shǐhtô, ma̤ lô̌khô ta̤wî̤ta̤wô̌, dě sî ô̌ bǎ gǎkû tûjû̌pwa̤ pě.

²⁸ Cǒmara tûjû̌pwa̤ mô̤nǐ̤ ta̤ma̤tôma̤bǎ, a wîkè nô̌ akòyòcǒkòyòtè̤ tô̤̌. A tugutakaǐ asî tûjû̌pwa̤. Kòyòkhu phû̌mò̤̌ aphû̌ali̤ tokhlǒ khû̌dayadě kòyò gǔ wṳ̂̌hǎhtò̌cû̌ tapheyî̤ kè asî.

²⁹ Kòyò sǎphlǒwô̌ tokhlǒnu, shigǎ nunî̌ a gǔ htû aû̌tě̤û̌ca. A ô̌ bǎnu tûjû̌pwa̤ talakhǎ pě.

³⁰ Kòyò sǎphlǒwô̌ hî̌bǎ còcè̌ pwǎ ta̤sî̌ta̤jò̌, A hî̌ǐ còcè̌ pwǎ ta̤tôta̤bǎ.

³¹ A Cǒmaradû̌ ta̤sû̌ta̤tòwò ô̌měô̌gle dǒ asǎphlǒkû. A cû̌ klè̌ dě a lò̤khǔpo̤ tô̤̌.

³² Kòyòkhu phû̌mò̤̌ glè̌ dò kòyò sǎphlǒwô̌ aklè̌. A kè̌lǎ ma̤siǐ asî.

³³ Bǎbǎkǎlè Cǒmara tûjû̌pwa̤ wîkè kòyòcǒkòyòtè̤ dǒ kòyòhe acǔdekû tô̤̌. Bǎ asî tǒ̤dǒ ta̤cî̌htò̌gûlǎ̤ akhapěnu, kòyò cî̌htò̌ padô̌ asî tô̤̌tô̤̌.

³⁴ Ô̌pǒ̤kè̌shuǐ Cǒmara tûjû̌pwa̤, pṳ̂̌měǐ ta̤sû̌ǐtòwòǐ. Cǒmara tûjû̌pwa̤ gǔ phî̌htò̌yô̤̌ na pě, a ǐ na shigǎ dǒ a gǔ htû na û̌cata̤bǐnu pě. Na kè̌shǐ kòyò wṳ̂̌hǎhtò̌cû̌ tapheyî̤ kòyòkhu phû̌mò̤̌ nutokhlǒ pě.

³⁵ He kè̌shǐ kòyòkhu phû̌mò̤̌, kòyòkhu kòyòhe dǒ a cǔshokhò̌sho tôpwa̤ sô̌sô̌kû̌ sǒmṳ̌dû̌tònò dô̌htò̌ tûû̌ dǒ aphǎkhû̌nu.

³⁶ Bǎbǎkǎlè tashò̌phû̌ akûnô̤̌, a sikè, a hǎmǎkè pě. He kè̌lǎ a bǎbǎkǎlè he kè̌shǐ jò pe a tô̤̌.

³⁷ Gènè̤kè̌ lô̌khô kòyò lǎ̤pè̤̌wǎ̤ ta̤sǔ ô̌ tô̤̌ kû̌ kòyòcǒkòyòtè̤ nu. Asî mî̌ asǎphlǒwô̌, a sǎdôhôbǐ dǒnô̌khîkò pěnu a ô̌mô̤ô̌bǎ pě.

³⁸ Bǎbǎkǎlè lǒ̤bò ta̤sǔphû̌ tokhlǒnu a gǔ pî̌kè bò pě. Dǒ nô̌kò gutṳ̌ pě, kòyòkhu phû̌mò̤̌ tokhlǒ a gǔsigǔhǎmǎ lǒ̤bò.

³⁹ Cǒmara tûjû̌pwa̤ ma̤hǎplǎge kòyò sǎphlǒwô̌. Bǎ asî kè̌shǐtṳ̌bǎ kû̌ ta̤pò̤̌ta̤sha akhanu, a mî̌ asî lǎ̤ô̌tûdû dǒ aměagle.

⁴⁰ Asî hèô̌tûdû lô̌khô anǎ̤ dǒ Cǒmara tûjû̌pwa̤ a ô̌ akhû̌akhî, a ma̤jè̌ asî, a ma̤hǎplǎge asî. A ma̤hǎplǎkè asî dǒ kòyòkhu phû̌mò̤̌ acǔdekû dě a takabǐnṳ̌ asî.