Htû̌sò̌htò̌ 36 - Kawyaw New Testament

Kòyòhǎkhû̌phû̌ ata̤sǔ kû̌ Cǒmara ata̤wô̌

Cǒmara tûjû̌pwa̤ apwa̤ma̤ta̤phû̌ Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò kû̌ ta̤lṳhtò̌hôkû tôpwa̤ aya.

¹ Kòyò dǒ a ma̤takǎshǔ ta̤ tokhlǒnu ta̤phû̌mò̤̌shǐhtô ô̌ dǒ lû̌sǎphlǒgîkû dě a noshû̌ lû̌û. Asî gènè̤ lô̌khô kû̌ lǎ̤lṳ̂ ǐsha bè̌dubè̌nǎ̤ Cǒmara tô̤̌.

² A gènè̤dû̌ gènè̤htò̌yô̤̌ǐ talû̌ shû̌lě anǎ̤ akhû̌akhî, a kè̌shǐ lò̤jò pe ata̤sǔta̤plě nutokhlǒ tô̤̌. Tô̤̌mî̌ a sǎkhě lò̤jò pe ata̤sǔ tô̤̌tô̤̌.

³ Ata̤hî̌buhî̌bǎnu còcè̌ ta̤phû̌mò̤̌shǐhtô, ta̤lòhô pwǎ. A wîkèbò ta̤sî̌ta̤jò̌, ta̤ma̤wô̌ta̤.

⁴ Bǎ a hǎmôô̌ dǒ lǎ̤dakhû̌ akhanu bǎbǎ, a tayè̤lò̤nǎ lǎ̤ma̤ còcè̌ ta̤phû̌mò̤̌shǐhtô. A ma̤ pè̤̌jò ta̤wô̌ tôcǒ꤮ tô̤̌. A wîkè ta̤phû̌mò̤̌shǐhtô tô̤̌tô̤̌.

Cǒmara tûjû̌pwa̤ ata̤wô̌

⁵ Ǒ Cǒmara tûjû̌pwa̤, nata̤mô̤ dǒ ahǎbòjò tô̤̌nu adû̌ asô̌sô̌kû̌ mǒkhû̌. Nacǒkû̌ nayô̤̌ nî̌ alè̤̌ asô̌sô̌kû̌ mǒlǎ̤.

⁶ Na ta̤tě̤ta̤mè̤̌nu asô̌sô̌kû̌ khôlôdû̌khôlôhtû. Nata̤ma̤tôma̤bǎnu asô̌sô̌kû̌ shidû̌te̤we̤ ayô̤̌ gutṳ̌. Ǒ Cǒmara tûjû̌pwa̤, na kè̌khwè̌ǐ wô̌bǎ kòyò hǎkhû̌phû̌ kû̌ ta̤phû̌ta̤li̤.

⁷ Ǒ Cǒmaradû̌, nata̤mô̤ dǒ ahǎbòjò tô̤̌nu alě̤dû̌pwî̤htû mî̌ca. Kòyòhǎkhû̌phû̌ lǒ̤bò hèô̌ tûdûǐ dǒ naô̌ sô̌sô̌kû̌ shîmǒ̤ tugutakaǐ aphû̌ dǒ adî̌gelǎ̤.

⁸ Asî ǎkǒôbe, shǎǎshǎô ô̌lǒô̌be dǒ nahǐkûnu. Na dǐô asî shi lǒbe kû̌ na ta̤wî̤ta̤wô̌ dǒ nashilǎ̤gǎkûnu.

⁹ Na mî̌ shihǎhtò̌ dǒ a ǐ kòyò ta̤htûpwa̤ tôpwa̤. Dǒ nata̤lî akhû̌akhî, pa kè̌shǐ jò ta̤lî hǒ.

¹⁰ Tûlû̌ mô̤nṳ̌ pô̤̌ pwa̤ dǒ a sî̌ganǎ̤ nanu kû̌ na ta̤mô̤ dǒ ahǎbòjò tô̤̌nu. Tûlû̌ ǐ na ta̤cǒta̤tè̤nu kû̌ kòyòcǒkòyòtè̤nu.

¹¹ No hèshě tǎ̤ kòyòbè̌htò̌yô̤̌ anǎ̤ nutokhlǒ kû̌ he mǎ̤. No wṳ̂̌khlè̌kè tǎ̤ kòyòkhu phû̌mò̤̌ nutokhlǒ kû̌ he mǎ̤.

¹² Kè̌mò̌ lô̌khô, kòyòkhu phû̌mò̤̌ lò̤khǔpo̤ hǒ. Kòyò wîlò̤tě̤ kè asî dě asî ihtǒbò̌ pe tô̤̌ hǒ.