Htû̌sò̌htò̌ 34 - Kawyaw New Testament

Htû̌sò̌htò̌ Cǒmara dǒ a ma̤hǎplǎge pa dǒ ta̤pò̤̌ta̤sha akû

Khwǐdawi̤ ata̤sǎwǐ htû̌sò̌htò̌. Ta̤sǎwǐ hǒo tôshǒmî̌ a sǎwǐ bǎ jî̌kimi anǎ̤ dǒ Khwǐabǐmalè̌ dǒ a wṳ̂̌hǎhtò̌cû̌ tephekè lû̌û dě hǎhtò̌khlè̌tephekè hto akhanu.

¹ He gǔ htû̌sò̌htò̌ Cǒmara tûjû̌pwa̤ pṳ̂̌shěpṳ̂̌khǎ. He htû̌sò̌ ô̌kǔ jò pe tô̤̌.

² Cǒmara tûjû̌pwa̤ ma̤ bǎ he akhû̌akhî, he glè̌ htû̌sò̌ǐ yǎ. No ganǎ̤de kòyò dǒ kò ma̤jî̌ma̤jû̌ asînu tokhlǒ dě no sǎlě̤sǎlò̤ asî.

³ Shôbǐǐlṳ̌ wô̤̌wô̤̌ lû̌ Cǒmara tûjû̌pwa̤ asîrîdû̌sîrîhtû tǎ꤮. Pa htû̌sò̌htò̌ wô̤̌wô̤̌ lû̌ ami̤ tǎ꤮.

⁴ He kwihtò̌ Cǒmara tûjû̌pwa̤ ata̤ma̤jè̌ dě a hî̌shǔ he. A ma̤hǎplǎge he dǒ ta̤sǎgònò̤̌ ǐsha lǒ̤꤮ bò akû.

⁵ Kòyò kè̌shu nǎla̤ǐ dǒ a ô̌ tokhlǒ sǎlě̤ pě. Asî glè̌ shòwò̤̌ dě mǐ̤sǎpî̌tî̌ tôkhò̌꤮ tô̤̌.

⁶ Ta̤ dǒ kòyò ma̤jî̌ma̤jû̌ lû̌ nutôpwa̤ kwisǎyṳhtò̌ Cǒmara tûjû̌pwa̤ dě a ganǎ̤de lû̌ ata̤kwi. A ma̤hǎplǎge lû̌ dǒ ata̤pò̤̌ta̤sha lǒ̤꤮ bò akû.

⁷ Kòyò dǒ a ǐsha bè̌dubè̌nǎ̤ Cǒmara tûjû̌pwa̤nu, Cǒmara atanaphû̌ ô̌pǒ̤te̤we̤, ma̤hǎplǎge asî.

⁸ Cǒmara tûjû̌pwa̤ wô̌ pwǐ꤮ tènu kè̌lǎsî̌ya dě sî̌yaphlô lô̌khô. Kòyò dǒ a ô̌tûdû nǎla̤ǐ lû̌ tokhlǒnu, anǐ̤bǎ ta̤ǐshowî̤.

⁹ Kòyò dǒ a bè̌dubè̌nǎ̤ Cǒmara tûjû̌pwa̤ sî, ǐsha lô̌khô a nî̌. Kòyò dǒ a ǐsha lû̌ tokhlǒnu, alṳ̂bǎ ta̤ tokhlǒnu a ta ô̌bò.

¹⁰ Khî tôlôphû̌ tokhlǒ ô̌tî̤wî̤̌ sǎǎsǎô ashǎ. Bǎbǎkǎlè kòyò dǒ a kè̌lǎ Cǒmara tûjû̌pwa̤ nǐ̤bǎbò ta̤wô̌ pṳ̂̌tôcǒ.

¹¹ Hèmò̌ lô̌khô hephû̌mǒ̤phû̌khû sî, ganǎ̤de lô̌khô heyô̤̌. Tô bǎ ǐsha bè̌dubè̌nǎ̤ǐ Cǒmara tûjû̌pwa̤ hětènu, he sû̌ǐtòwòǐ bǎ sî.

¹² Sî sǎyṳ ta̤ô̌htûpwa̤ dǒ amô̤ ya? Mî̌ sî sǎyṳ ô̌htûpwa̤ lṳmṳ̌ni̤ lṳmṳ̌sahtû dǒ a ô̌ kû̌ ta̤sǎlě̤sǎlò̤nu ya?

¹³ Kè̌ hî̌ pô̤̌numî̌, sè̌rè̌ǐ naplî̤ dǒ a gǔ hî̌bǎ ta̤phû̌mò̤̌shǐhtô tô̤̌. Kǎtô̤̌ sè̌rè̌ ǐpô̤̌ nukhû̌phě dǒ a glè̌ hî̌bǎ ta̤lòhǎlòhò tô̤̌.

¹⁴ Cû̌tephekè kû̌ ta̤phû̌mò̤̌shǐhtô, ma̤ ta̤ dǒ awô̌. Jî̌pwǐ̤ kè̌shuǐ ta̤gûjû̌kabǎ dě pṳ̂̌měǐ yǎ.

¹⁵ Cǒmara tûjû̌pwa̤ kè̌pǒ̤ǐ kòyò sǎphlǒwô̌. A ganǎ̤de asî ta̤kwihtò̌ ta̤ma̤jè̌.

¹⁶ Bǎbǎkǎlè Cǒmara tûjû̌pwa̤ ma̤tě̤tṳshǔkè kòyò dǒ a ma̤ ta̤phû̌mò̤̌shǐhtô. A no sibò asî dě kòyò sî̌ya pe asî tôpwǎ̤ tô̤̌.

¹⁷ Bǎ kòyòcǒkòyòtè̤ kwihtò̌ ta̤ma̤jè̌ akhanu, Cǒmara tûjû̌pwa̤ ganǎ̤de ata̤kwi. A ma̤hǎplǎkè asî dǒ asî ta̤pò̤̌ta̤sha lǒ̤bò akû.

¹⁸ Cǒmara tûjû̌pwa̤ ô̌phǔ kû̌ kòyò dǒ a sǎphlǒpî̌. A ma̤hǎplǎge kòyò dǒ ata̤kè̌shǔǐ ô̌ pe tô̤̌.

¹⁹ Kòyò sǎphlǒwô̌ tôpwa̤ kè̌shǐ tṳ̌bǎ dû̌wî̤ ta̤pò̤̌ta̤sha bǎbǎkǎlè Cǒmara tûjû̌pwa̤ ma̤hǎplǎge a dǒ ta̤ nutokhlǒ lǒ̤bò akû.

²⁰ Cǒmara tûjû̌pwa̤ tugutakaǐ wô̌bǎ akhwǐ. A no la̤gǎ tôbô̌ tô̤̌.

²¹ Ta̤phû̌mò̤̌shǐhtô dǒ kòyòphû̌mò̤̌ ma̤ nutokhlǒ, a ma̤si sô̌ asî pě. Kòyò dǒ a sǎkhî̌ kòyò sǎphlǒwô̌ tokhlǒnu, Cǒmara cî̌htò̌ asî pě.

²² Cǒmara tûjû̌pwa̤ rû̌htò̌geǐ apwa̤ma̤ta̤phû̌. Kòyò dǒ a hè ô̌tûdû anǎ̤ dǒ aô̌ tokhlǒnu, a khòbǎ ta̤cèrò tô̤̌.