Htû̌sò̌htò̌ 32 - Kawyaw New Testament

Ta̤olò̤ kû̌ ta̤plûkè ta̤sǔ

Khwǐdawi̤ ata̤sǎwǐ htû̌sò̌htò̌ǐ. Hebrǔphû̌ ayô̤nu, a kaǎ ta̤sò̌wǐ hǒo kû̌ Masakǐlè ta̤sǎwǐ, dě ta̤sǎwǐ nutôshǒ mî̌ a ǐ kò ta̤sî̌yaphlô.

¹ Kòyò dǒ Cǒmara kè̌lû̌kè ata̤cû̌tûlû̌khatûlû̌, a ma̤plîkè lû̌û ta̤sǔta̤plě numî̌, a nǐ̤bǎ ta̤ǐshôwî̤ hǒ.

² Kòyò dǒ Cǒmara tûjû̌pwa̤ wě̤mǎnǎ pe ata̤sǔ tô̤̌, ta̤lòhô ô̌ pe dǒ asǎphlǒkû tô̤̌ tokhlǒnu, a nǐ̤bǎ ta̤ǐshôwî̤.

³ Bǎ he ô̌ sǔtǔkǔ, he olò̤ he ta̤sǔtô̤̌ akhanu, he khwǐ krû̌bò. He bǎ kookasha tônǐ̤mṳ̌hǎ.

⁴ Lṳmṳ̌khǐkhǐ lṳmṳ̌shasha, na plè he, a jî̌jû̌ gutṳ̌ he. Hekhû̌heǎ hǎlǒ̤kè hǒ, he lòdô̌lòde asô̌sô̌kû̌ gǎgû̌ shû̌ bǎ gǎgû̌khanu hǒ.

⁵ He ma̤ ta̤sǔnu he shôbǐǐbò pwǎ na. He ma̤ ta̤sǔta̤plěnu he dǒhǔdǒbǐ tô̤̌. He bè̌lò̤ hesǎphlǒ kû̌ he olò̤bò he ta̤cû̌tûlû̌khatûlû̌ dǒ Cǒmara tûjû̌pwa̤ alô̤mô̤̌. Dě na plûkè bò he ta̤ma̤sǔma̤plě.

⁶ Bǎ kòyò dǒ asǎphlǒcǒ kû̌ na nutokhlǒ lṳ̂bǎ ta̤ akhanu, a tô kwicabahtò̌ ta̤ dǒ na ô̌. Bǎ ta̤pò̤̌ta̤sha pṳ̂̌tôcǒ hè sô̌sô̌kû̌ shidû̌htò̌ akhanu, a dû̌htò̌ tǒ̤ dǒ aô̌ tô̤̌.

⁷ Na mî̌ he lǎ̤ô̌tûdû agûlǎ̤. Bǎ he tṳ̌bǎ kû̌ ta̤pò̤̌ta̤sha akhanu, na tòkòtakabǐ he. Na no ô̌te̤we̤ bò he kû̌ ta̤ma̤hǎplǎge ata̤sǎwǐ kaǎgǔhtò̌.

⁸ Cǒmara tûjû̌pwa̤ hî̌ kû̌, “Na tôbǎ cû̌klè̌ bǎtè tôbônu, he gǔ nè̌klè̌nè̌klò sû̌ǐtòwòǐ na. “He gǔ dǐsî̌yajè̌ tûû̌ na, he gǔ kè̌ǐ tûû̌ na.

⁹ “Ô̌htûpwa̤ sô̌sô̌kû̌ tîsî̌ tô̤̌mî̌ mǐû̌lǎ dǒ a ganǎ̤de gû̌ kòyò yô̤̌ tô̤̌nu tǎ̤mǎ̤. “Na kè̌ no ěmě a kû̌ tě̤htò̌pli̤ tô̤̌ mî̌, na pǒǐ jò a tô̤̌.”

¹⁰ Kòyòphû̌mò̤̌ nutokhlǒ mî̌ a kè̌shǐ tṳ̌bǎ kû̌ ta̤pò̤̌ta̤sha dû̌wî̤ pě. Kòyò dǒ a yṳ̌ǎ Cǒmara tûjû̌pwa̤ nutokhlǒ hî̌dě, Běcǎ ata̤mô̤ dǒ ahǎbòjò tô̤̌ gǔ tòkòtakabǐ asî.

¹¹ Kòyòcǒkòyòtè̤, mô̤sû̌mô̤sò̌ sǎlě̤sǎlò̤ lô̌khô dǒ Cǒmara tûjû̌pwa̤ akû. Kòyò sǎphlǒcǒsǎphlǒtè̤ sî, sǎlě̤sǎlò̤ sǎwǐhtûsò̌htò̌ lô̌khô nî̌.