Htû̌sò̌htò̌ 30 - Kawyaw New Testament

Khwǐdawi̤ ata̤sǎwǐ mî̌ ta̤hî̌bwǐhî̌sîrî

Khwǐdawi ata̤sǎwǐ

¹ Ǒ Cǒmara tûjû̌pwa̤, na bè̌htò̌yô̤̌ he dě. He khuwè̤ tokhlǒ sǎlě̤sǎlò̤ dǒ he khû̌khî tô̤̌ akhû̌khî, he htû̌sò̌htò̌ na.

² Ǒ Cǒmara tûjû̌pwa̤, he Běcǎ, he kwihtò̌ na ta̤ma̤jè̌. Dě na ma̤hǎmǎ bǎ he ta̤shǐta̤sha.

³ Ǒ Cǒmara tûjû̌pwa̤, na phǐkè he ta̤htûpwa̤ dǒ lṳ̌gǎnǎdo. He glè̌ lò̤tě̤ dǒ lṳ̌kûyô̤̌ akû dě na ma̤hǎplǎkè he.

⁴ Ǒ kòyò dǒ a bè̌dubè̌nǎ̤ Cǒmara sî, sǎwǐhtò̌mò̌ Cǒmara tûjû̌pwa̤. Htû̌sò̌kǐkrû̌htò̌ mò̌ ami̤plò̌shǐ.

⁵ A sǎphlǒdû̌ tashò̌phû̌nô̤̌, a kè̌dû̌ǐ tûjû̌pwa̤. Hǎ bǎ lṳmṳ̌khǐ, sǎlě̤sǎlò̤ bǎ lṳmṳ̌lî.

⁶ Bǎ heta ô̌lǒô̌be lṳ̂gû̌gè̌ pe tô̤̌ akhanu, he hî̌ǐ tûû̌ henǎ̤ kû̌, “Ta̤jî̌ta̤jû̌ hèbǎjò pe he tôkhò̌ tô̤̌.”

⁷ Ǒ Cǒmara tûjû̌pwa̤, dǒ na bwǐdû̌sîrîhtû akhû̌akhî, na bè̌měbè̌gle he sô̌sô̌kû̌ khôlôdû̌khôlôhtû. Bǎ na kè̌khô̌kè he akhanu, he ǐsha gònò̤̌gòglè mî̌ca.

⁸ Ǒ Cǒmara tûjû̌pwa̤, he kwisǎyṳhtò̌ na. He kwihtò̌ Běcǎ tûjû̌pwa̤ ata̤ma̤jè̌ dǒ a gǔ gwèbǎǐ he.

⁹ He kè̌ sikè, tô̤̌mî̌ he kè̌ lò̤tě̤kè dǒ lṳ̌kûyô̤̌ mî̌, a nǐ̤bwǐsirî dǒ naya mî̌titè? He nǎ̤glǒ dǒ a htû hǎkumṳ̌nu a htû̌sò̌htò̌ jò pe cǎ na ya? A htû̌sò̌htò̌ jò pe cǎ na ta̤cǒ kû̌ yô̤̌nu ya?

¹⁰ Ǒ Cǒmara tûjû̌pwa̤, ganǎ̤de mò̌ he kwi nadě, gwèbǎ ǐ mò̌ he. Ǒ Cǒmara tûjû̌pwa̤ ma̤jè̌mò̌ he.

¹¹ Na htû̌lè̌tèplè̌kè bǎ he ta̤sǎplǎ̤sǎyṳ kû̌ ta̤kalî̌ htû̌sò̌kǐkrû̌ hǒ. Na plû̌htò̌kè bǎ he ta̤sǎplǎ̤ jejû, na kûsô̌htò̌ bǎ he ta̤sǎlě̤sǎlò̤ jejû.

¹² Pô̤̌nukhû̌khî, khònò̤̌ he gǔ sǎwǐ htû̌sò̌kǐkû̌htò̌ na kû̌ he sǎphlǒ tômèbò, he gǔ ô̌ sǔtǔkǔ jò pe tô̤̌. Ǒ he Běcǎ Cǒmara tûjû̌pwa̤, he gǔ hî̌bwǐhî̌sîrî na tûjû̌pwa̤ talakhǎ pě.