Htû̌sò̌htò̌ 3 - Kawyaw New Testament

Bǎ na kè̌shǐ kû̌ pwa̤sǎkhě na ata̤ma̤jî̌ akhanu, yṳ̌ǎ pû Cǒmara tûjû̌pwa̤

Bǎ Khwǐdawi̤ hǎhtò̌khlè̌kè aphû̌ Khûabashalṳ̂ alǎ̤ akhanu, awě̤ ata̤sǎwǐ htò̌sò̌htò̌ nutôshǒ.

¹ Ǒ Cǒmara tûjû̌pwa̤, pwa̤sǎkhě he ô̌wô̤̌ô̌plṳ̂ mî̌ca. Pwa̤ma̤tukutakǎ he ô̌htò̌plṳ̂꤮ mî̌caca.

² Asî hî̌ he yô̤ kû̌, “Cǒmara ma̤hǎplǎ a tôkhò̌꤮ tô̤̌.”

³ Ǒ Cǒmara tûjû̌pwa̤, na mî̌ helǎ̤ taka dǒ a takabǐnṳ̌ he. Na ǐ he ta̤sîrîdû̌sîrîhtû, ta̤bè̌dubè̌nǎ̤. Na mî̌ pwa̤ǐkhû̌ǐǎ shû̌htò̌ he sǎphlǒ.

⁴ He kaǎgǔhtò̌ Cǒmara tûjû̌pwa̤ ta̤ma̤jè̌. A ô̌ dǒ akhôlô plò̌shî̌ dě ama̤jè̌ he.

⁵ Cǒmara tûjû̌pwa̤ takaǐ he dě he hǎmôô̌nṳ̌ mô̤mô̤bǎbǎ. He shî̌nǎ mô̤mô̤bǎbǎ gesô̌.

⁶ Pwa̤sǎkhě he dǒ arî̌asò̌kû hè ô̌plǒô̌cu te̤we̤bò he lî̤khôlî̤gî̌ bǎbǎ he sǎǐsha tô̤̌.

⁷ Ǒ꤮ Cǒmara tûjû̌pwa̤, na plǎ̤la̤gǎ kèbò mè̤̌caca bò pwa̤sǎkhě he tokhlǒ akhǎ pě. Na delò̤tě̤pro̤ kèbò mè̤̌caca kòyòkhuhe phû̌mò̤̌ akhû̌khi pě akhû̌akhî, ma̤jè̌ he. Ǒ꤮ he Cǒmara ma̤hǎplǎ he.

⁸ Ta̤ma̤hǎplǎnu ahè dǒ Cǒmara tûjû̌pwa̤ ô̌. Na ǐshowî̤ tûû̌ pû nakòyò nî̌꤮.