Htû̌sò̌htò̌ 29 - Kawyaw New Testament

Cǒmara tûjû̌pwa̤ alě̤ pwe̤lṳ̌ dǒ gili̤sǎlò̤dû̌ akû

Khwǐdawi̤ ata̤sǎwǐ

¹ Ǒ tanamǒkhû̌phû̌ sî, htû̌sò̌htò̌ Cǒmara tûjû̌pwa̤. Htû̌sò̌htò̌ ata̤sîrîdû̌sîrîhtû kû̌ ata̤pô̤ta̤phǎ.

² Shôbǐǐlṳ̌ Cǒmara tûjû̌pwa̤ ami̤ sîrîdû̌sîrîhtû. Dô̌gînî̤ cabahtò̌ Cǒmara tûjû̌pwa̤ dǒ a ô̌ kû̌ ta̤tugutaka plò̌shǐ.

³ Cǒmara tûjû̌pwa̤ alě̤ pwe̤lṳ̌ dǒ shidû̌shite̤we̤khû̌. Cǒmaradû̌ dǒ a ta̤suwi̤dû̌sòwò̤htû hî̌bǎ shû̌sho sô̌sô̌kû̌ mǒgǒlayî̤̌. Cǒmara tûjû̌pwa̤ lě̤pwe̤ pwe̤nǎ̤sǎgô̌ bò dǒ shidû̌shite̤we̤khû̌.

⁴ Cǒmara tûjû̌pwa̤ alě̤pwe̤ pô̤phǎshû̌sho. Cǒmara tûjû̌pwa̤ alě̤pwe̤ lǒbe kû̌ ta̤sîrîdû̌sîrîhtû.

⁵ Cǒmara tûjû̌pwa̤ alě̤pwe̤ ma̤lagǎ bò sûyûmṳ̌ dǒ adû̌atònònu. Sǒmṳ̌dû̌ ô̌ dǒ Lebanû khômǔkhôlôkhû̌nu tokhlǒ bǎbǎ Cǒmara tûjû̌pwa̤ ma̤lò̤khǔpo̤ bò.

⁶ A ma̤guyṳ̌ Lebanû khômǔkhôlôkhû̌ asô̌sô̌kû̌ pṳ̂̌phaphû̌ pě̤htò̌nu. Sǐriû khôlô khû̌daya dě asô̌sô̌kû̌ pṳ̂̌mi̤ pě̤htò̌nu.

⁷ Cǒmara tûjû̌pwa̤ alě̤pwe̤ ama̤pǒ̤htò̌ shî̌lî̌bǒ.

⁸ Cǒmara tûjû̌pwa̤ alě̤pwe̤ ma̤guyṳ̌ bò gǎshashigǎ lǒ̤seměkhû̌. A ma̤guyṳ̌ pô̤̌ Gadegaǎ shô̌khû̌ gǎshashigǎnu.

⁹ Cǒmara tûjû̌pwa̤ alě̤pwe̤ ma̤guyṳ̌ bò asǒmṳ̌dû̌ plò̌shǐ. A ma̤lò̤tě̤su kè bò sǒlǎ dǒ mi̤kla. Lǒ̤bò pwa̤ ô̌ dǒ ta̤lṳhtò̌hôkû nutokhlǒ hî̌ lô̌khô kû̌, “Ta̤sîrîdû̌sîrîhtû ô̌ pû kû̌ Cǒmara tûjû̌pwa̤.”

¹⁰ Cǒmara tûjû̌pwa̤ pǒǐ shidû̌. Cǒmara tûjû̌pwa̤ mî̌ khwǐ dǒ a pǒsîrîǐ ta̤ tûjû̌pwa̤.

¹¹ Cǒmara tûjû̌pwa̤ ǐ a kòyò ta̤khû̌ta̤ǎ. A ǐshowî̤ǐ a kòyò kû̌ ta̤gûjû̌gabǎ pě.