Htû̌sò̌htò̌ 27 - Kawyaw New Testament

Ta̤sǎwǐ htû̌sò̌htò̌ kû̌ ta̤kwicabahtò̌

Khwǐdawi̤ ata̤sǎwǐ

¹ Cǒmara tûjû̌pwa̤ mî̌ he ta̤lî, pwa̤ma̤hǎplǎge he. He bǎ ǐsha pe mò̌pè pěya? Cǒmara tûjû̌pwa̤ mî̌ he la̤ô̌tûdû dǒ aměagle. He bǎ ǐsha pe mò̌pè pěya?

² Bǎ kòyò phû̌mò̤̌ glè̌ hè ma̤si ě ǎtaǎ kèbò hephěheyî̌, pwa̤khû̌khwè he glè̌ hè shě he akhanu, asî gǔ shî̌tikhlǐ, lòkhǔpo̤kè bò pě.

³ Kliphû̌sî bôte̤we̤ bò he bǎbǎ, ama̤ sò̌gònò̤̌ ǐsha nô̌ he sò̌phlǒ tîkî̌꤮ tô̤̌. Asî glè̌ hèshě he bǎbǎ, he sò̌phlǒkhu sò̌phlǒhe nòpě pwǎ.

⁴ He kwi ta̤ tôcǒ dǒ Cǒmara tûjû̌pwa̤ a ô̌ numî̌ dǒ he ta̤ô̌htûpwa̤ tûjû̌pwa̤ akûnu, he sǎyṳ ô̌ dǒ Cǒmara tûjû̌pwa̤ ahǐdǒkû, bǎ ata̤lṳhtò̌hô nutôkû. He sǎyṳ kè̌shǐ Cǒmara tûjû̌pwa̤ ata̤wî̤ta̤wô̌, he sǎyṳ cubucabahtò̌ yǎ.

⁵ Bǎ ta̤pò̤̌ta̤sha hètǒ̤ akhanu, a gǔ takabǐǐ he dǒ gûlǎ̤ lǎ̤ô̌tûdû akû. A gǔ dǒhǔdǒbǐ ǐ he dǒ ata̤lṳhtò̌hôkû. A gǔ bè̌htò̌mǒ pô̤̌ he dǒ lǒ̤dû̌ kò hèma̤jî̌ma̤jû̌jò pe he tô̤̌ nutômè akhû̌.

⁶ Bǎbǎ he ma̤pè̤̌kè bò pwa̤khû̌khwè he dǒ a ô̌ te̤we̤ bò kû̌ he nu. He kaǎgǔ sǎlě̤sǎlò̤ lṳ̌htò̌ ta̤lṳhtò̌ kû̌ Cǒmara tûjû̌pwa̤ dǒ ta̤lṳhtò̌hôkû pě. He gǔ htû̌sò̌htò̌ Cǒmara tûjû̌pwa̤ kû̌ ta̤sǎmò̤̌mṳ, ta̤dǒta̤ǔ.

⁷ Ǒ Cǒmara tûjû̌pwa̤, bǎ he kwihtò̌ na akhanu, ganǎ̤de he ta̤hî̌bǎnu. Gwèbǎǐ he dě kǒshǔ mò̌ he.

⁸ Bǎ na hî̌ kû̌, “Hè cubucaba mò̌ he” akhanu, he hî̌shǔ na dǒ he sǎphlǒkû kû̌, “Ǒ Cǒmara tûjû̌pwa̤, he gǔ cubucabahtò̌ mî̌caca na.”

⁹ Tiwǐkhô̌kè pû nami̤sǎ kû̌ he mǎ̤. Dǒ ta̤sǎphlǒdû̌ akhû̌akhî, sûcû̌ te̤pheyî̤ pû najû̌ mǎ̤. Na mî̌ pwa̤ dǒ a ma̤jè̌ he. Ǒ Cǒmaradû̌, na mî̌ pwa̤ma̤hǎplǎge hto he akhû̌akhî, bè̌kè pû he mǎ̤, wîkè pû he mǎ̤.

¹⁰ Hemǒ̤hepha kè̌ wîkè he bǎbǎ, Cǒmara tûjû̌pwa̤ khwè̌ǐ tûû̌ he pě.

¹¹ Ǒ Cǒmara tûjû̌pwa̤, sû̌ǐtòwòǐ ǐ he kû̌ naklè̌naklò. Pwa̤khû̌khwè he tokhlǒ ô̌ akhû̌akhî, sûcû̌tô he dǒ naklè̌cǒklè̌tè̤.

¹² Pwa̤khû̌khwè he sî tokhlǒ sǎyṳma̤ he hî̌tètè̌꤮ bǎbǎ, plûkè tǎ̤ asî mǎ̤. Asî pè̤̌wǎ̤ phô̌phô̌ bò he. Asî sò̌gònò̤̌ ǐshabò he.

¹³ He yṳǎ mî̌ca kû̌ he gǔ kè̌shǐ Cǒmara tûjû̌pwa̤ ata̤mô̤ta̤wô̌ dǒ he ta̤ô̌htûpwa̤ khònò̤̌khanu pě.

¹⁴ Ô̌pǒ̤ kè̌shuǐ ta̤ dǒ Cǒmara tûjû̌pwa̤ aô̌ nu. Bè̌shû̌bè̌sho sǎphlǒ dě khuhe lô̌khô. Ô̌pǒ̤ kè̌shuǐ ta̤ dǒ Cǒmara tûjû̌pwa̤ aô̌ nunî̌.