Htû̌sò̌htò̌ 26 - Kawyaw New Testament

Kòyòcǒkòyòtè̤ ata̤kwicaba

Khwǐdawi̤ ata̤sǎwǐ

¹ Ǒ Cǒmara tûjû̌pwa̤, he ma̤ còcè̌ ta̤ dǒ acǒatè̤ akhû̌akhî, olò̤wǎ̤lò̤ bǎ he kû̌ he ta̤sǔ ô̌ tôcǒ꤮ tô̤̌. He nǎla̤ǐ tǒ̤꤮ pwǎ Cǒmara tûjû̌pwa̤ nô̤̌. He sǎphlǒ lûhtolûlò̤ bǎ tô̤̌.

^2-3 Ǒ Cǒmara tûjû̌pwa̤, na ta̤mô̤ǐ dǒ ahǎbòjò tô̤̌nu a nè̌klè̌nè̌klò he dě he ô̌htûpwa̤ dǒ na ta̤tě̤ta̤mè̤̌ akû akhû̌akhî, ma̤kè̌kè̌ mò̌ he sǎphlǒ, ma̤kè̌kè̌ mò̌ he sû̌shi.

⁴ He cû̌hǎnòò̌ kû̌ kòyò lòhǎlòhô nutô̤̌. He cû̌bǒsû̌ kû̌ kòyòjî̌cǒjîtè̤ anǎ̤ nutokhlǒ tô̤̌tô̤̌.

⁵ He sǎkhě kòyòphû̌mò̤̌ nutokhlǒ ata̤ô̌plǒ hî̌bǎplǒ. He hǎnòò̌cu kû̌ kòyò khuhe nutokhlǒ tô̤̌.

⁶ Ǒ Cǒmara tûjû̌pwa̤, he cǔbòkè he cǔde mî̌ hedǔlṳ̌ kû̌ he ta̤sǔta̤plě ô̌tô̤̌. He cû̌te̤we̤ nṳ̌ na ta̤lṳhtò̌wǎ̤.

⁷ He sǎwǐhtû̌sò̌htò̌ǐ hî̌bwǐhî̌sîrî kaǎgǔhtò̌. He shôbǐǐlṳ̌bò na ta̤ma̤ ta̤cǒklî̌kî̌ya.

⁸ Ǒ Cǒmara tûjû̌pwa̤, he mô̤ǐ hǐ dǒ na ô̌ǐnu kû̌ gûlǎ̤ dǒ na ta̤sîrîdû̌sîrîhtû lîkakha htò̌lṳ̌ nutò̤glò.

⁹ Ma̤pî̌ padô̌ he kû̌ ta̤ma̤sǔphû̌ nutokhlǒ tǎ̤mǎ̤. Ma̤si padô̌ he kû̌ pwa̤ma̤si kò nutokhlǒ tǎ̤mǎ̤.

¹⁰ Asî cǔdenu a ma̤ còcè̌꤮ ta̤phû̌mò̤̌shî̌htô. Asî cǔtûmûnu a lǒbe bò kû̌ ta̤dǐǎshǎ.

¹¹ He khû̌dayadě he ma̤ pwǎta̤ dǒ acǒatè̤. Gwèbǎǐ dě ma̤hǎplǎge mò̌ he.

¹² He ô̌ dǒ klè̌tôklè̌bǎ akû. Dǒ kòyò saprṳ̂ aklanu he htû̌sò̌htò̌ǐ Cǒmara tûjû̌pwa̤ pě.