Htû̌sò̌htò̌ 25 - Kawyaw New Testament

Ta̤kwicaba dǒ ta̤nè̌klè̌nè̌klò aya kû̌ ta̤tugǔtakaǐ aya

Khwǐdawi̤ ata̤sǎwǐ

¹ Ǒ Cǒmara tûjû̌pwa̤, he hè dǒ na ô̌ dě kwicabahtò̌ na kû̌ he sǎphlǒtômèbò.

² He Cǒmaradû̌, he nǎla̤ǐ tǒ̤꤮ na nô̤̌pwǎ. No htûhtò̌ pû ta̤sòwò̤̌ dǒ heya mǎ̤. No sǎle̤sǎlò̤ ma̤pè̤̌kè pû he kû̌ he khuwè̤ tokhlǒ mǎ̤.

³ No htûhtò̌ pû ta̤sòwò̤̌ dǒ kòyò ô̌pǒ̤kè̌shuǐ na nutokhlǒ ayamǎ̤. Tûlû̌꤮ no sòwò̤̌ pû kòyò dǒ a lô̌ǐplò̤ǐ kò nutokhlǒ.

⁴ Ǒ꤮ Cǒmara tûjû̌pwa̤, nè̌lṳ̌bǎ he naklè̌. Sû̌ǐtòwòǐ bǎ he naklè̌cǒklè̌tè̤.

⁵ Na mî̌ Cǒmaradû̌ dǒ pwa̤ma̤hǎplǎge he akhû̌akhî, nè̌klè̌nè̌klò he dǒ na ta̤cǒta̤tè̤ akû, sû̌ǐtòwòǐ he. Pṳ̂̌plǎplǎ he ǒpǒ̤kè̌shuǐ na.

⁶ Ǒ Cǒmara tûjû̌pwa̤, gènè̤htò̌ sô̌ na ta̤gwèbǎǐ kû̌ na ta̤mô̤ǐ dǒ ahǎbòjò tô̤̌ dě na dǔlè̌lṳ̌htò̌ hto dǒawǐnukha nutokhlǒ.

⁷ Plûkè he ta̤sǔta̤plě kû̌ he ta̤ma̤takǎ na dǒ he nějǎ pe akha nutokhlǒ nî̌꤮. Ǒ Cǒmara tûjû̌pwa̤, pô̤̌꤮ na ô̌ kû̌ ta̤mô̤ǐ dǒ ahǎbòjò tô̤̌ kû̌ ta̤wô̌nu akhû̌akhî, gènè̤htò̌ǐ he.

⁸ Cǒmara tûjû̌pwa̤ lǒbe kû̌ ta̤cǒta̤tè̤, ta̤wô̌ pṳ̂̌꤮ tôcǒ. A nè̌klè̌nè̌klò ta̤ma̤sǔphû̌ kû̌ klè̌tôklè̌bǎ.

⁹ A sûcû̌tô kòyò dǒ ashò̌lò̤ asǎphlǒ tokhlǒ dǒ klè̌tôklè̌bǎ. A sû̌ǐtòwòǐ padô̌ asî pô̤̌ aklè̌aklò ô̌nu.

¹⁰ Lǒ̤bò꤮ kòyò dǒ a cǒtè̤ kû̌ Cǒmara ata̤olò̤, ata̤mǎlò̤ nutokhlǒ mî̌ Cǒmara tûjû̌pwa̤ nè̌klè̌nè̌klò lû̌û kû̌ ata̤mô̤ǐ dǒ ahǎbòjò tô̤̌ kû̌ acǒtè̤ kû̌ ayô̤̌nu.

¹¹ Ǒ꤮ Cǒmara tûjû̌pwa̤, he ta̤sǔta̤plě dû̌ tûlû̌꤮ shû̌lě akhû̌akhî, dǒ ta̤bè̌dubè̌nǎ̤ na mi̤dû̌ ayanu, plûkè pû he ta̤ma̤sǔ nutokhlǒ.

¹² Mî̌mò̌pè tôpwa̤ ǐsha bè̌dubè̌nǎ̤ Cǒmara tûjû̌pwa̤ alǎ̤ pě? Asî tôbǎ gû̌ klè̌ hî̌tènu a gǔ sû̌ǐtòwòǐ tûû̌ asî pě.

¹³ Asî gǔ bwǐdû̌sîrîhtû. Aphû̌ali̤ sîtokhlǒ nî̤̌bǎ pû shigǎ.

¹⁴ Cǒmara tûjû̌pwa̤ mî̌ pwa̤ǐsha bè̌dubè̌nǎ̤ lû̌û nutokhlǒ asû̌khô. A dǐsî̌yalṳ̌ bǎ asî kû̌ ata̤olò̤.

¹⁵ Cǒmara tûjû̌pwa̤ ma̤lû̌htò̌ he khò̌lôpô̤̌ dǒ yṳ̌glǒkû akhû̌akhî, he kè̌htò̌ pwǎ dǒ a ô̌ pṳ̂̌shěpṳ̂̌khǎ.

¹⁶ Htû̌tiwǐ kè̌getîkhî he dě gwèbǎǐ he. He ô̌kè tûû̌ pwǎ dě ajî̌꤮ mî̌ca he.

¹⁷ Ma̤phikè bǎ he sǎphlǒ gû̌gè̌. Ma̤hǎplǎge he dǒ ta̤jî̌ta̤jû̌ akû.

¹⁸ Gènè̤kè̌ bǎ he ta̤jî̌ta̤jû̌ kû̌ ta̤pò̤̌ta̤sha. Plûkè padô̌ he ta̤sǔta̤plě lǒ̤꤮ bò.

¹⁹ Gènè̤kè̌mò̌ lô̌khô, he khuwè̤ tokhlǒ ô̌plṳ̂ mî̌ca. Asî khû̌khwè mî̌ca he.

²⁰ He ô̌tûdû dǒ na ô̌ akhû̌akhî, tugǔtakaǐ he, ma̤hǎplǎge he. No htûhtò̌ tǎ̤ ta̤sòwò̤ dǒ heya mǎ̤.

²¹ He ô̌pǒ̤kè̌shuǐ pwǎ tǒ̤꤮ dǒ na ô̌ akhû̌akhî, ta̤cǒta̤tè̤ kû̌ ta̤wô̌ tugǔtakaǐ he pě.

²² Ǒ Cǒmaradû̌, ma̤hǎplǎ Isôrěla khlilèphû̌nu dǒ asî ta̤pò̤̌ta̤sha lǒ̤꤮ bò akû nî̌.