Htû̌sò̌htò̌ 24 - Kawyaw New Testament

Khwǐdû̌ dǒ a ô̌ kû̌ ta̤sîrîdû̌sîrîhtû

Khwǐdawi̤ ata̤sǎwǐ 1 Hǎkhû̌běkhû̌ kû̌ ta̤pṳ̂̌꤮ tôcǒ ô̌ dǒ hǎkhû̌ tôběbò nutokhlǒ mî̌ Cǒmara tûjû̌pwa̤ ata.

¹ Hǎkhû̌běkhû̌ kû̌ ta̤pṳ̂̌꤮ tôcǒ ô̌ dǒ hǎkhû̌ tôběbò nutokhlǒ mî̌ Cǒmara tûjû̌pwa̤ ata. Lǒ̤bò hǎkhû̌běkhû̌ kû̌ kòyòhǎkhû̌phû̌ nutokhlǒ mî̌ ata lǒ̤bò pwǎ.

² A shǒǐlò̤ hǎkhû̌ akòshî̌gutṳ̌. A shǒǐ měglewô̌ lû̌û dǒ shidû̌shite̤we̤ kòda.

³ Mò̌pè tôpwa̤ gǔ htò̌nṳ̌ dǒ Cǒmara tûjû̌pwa̤ akhôlô plò̌shǐkhû̌ pě ya? Mò̌pè tôpwa̤ gǔ ihtǒô̌ dǒ ata̤lṳhtò̌hô plò̌shǐ akûnu pě?

⁴ Kòyò dǒ acǔde mṳ̂plî, asǎphlǒ plò̌shǐ, a caba kû̌ kò ta̤yô̤ta̤gî̌ tô̤̌, a ǐshǒlò̤ lòhǎlòhô kû̌ kòyò ta̤hî̌bǎ tôkhò̌꤮ tô̤̌ nutokhlǒ nô̤̌pwǎ.

⁵ A nǐ̤bǎ ta̤ǐshowî̤ dǒ Cǒmara tûjû̌pwa̤ aô̌. Cǒmaradû̌ dǒ a ma̤hǎplǎge lû̌û nutôpwa̤ pwe̤ǐlṳ̌ kû̌ ata̤sǔ ô̌ tôcǒ꤮ tô̤̌ pě.

⁶ Kòyò hǒnumî̌ a mî̌ kò dǒ a hè dǒ Cǒmaradû̌ aô̌. Pwa̤ dǒ a kè̌lǎ Ya̤kò a Cǒmaradû̌ ami̤sǎ.

⁷ Ǒ꤮ we̤takhadû̌ sî, lṳ̂mô mò̌. Ǒ꤮ takhadû̌ dǒ něhǎlau tokhlǒ, bǔmôhtò̌ mò̌. Khwǐdû̌ dǒ aô̌ kû̌ ta̤sîrîdû̌sîrîhtû glè̌ hènṳ̌ hǒ.

⁸ Khwǐdû̌ dǒ a ô̌ kû̌ ta̤sîrîdû̌sîrîhtû numî̌ mò̌pè? A mî̌ Cǒmara tûjû̌pwa̤ dǒ ashû̌asho, apô̤aphǎ, a ma̤pè̤̌bò ta̤shěta̤pě̤.

⁹ Ǒ꤮ we̤takhadû̌ sî, lûmô mò̌. Ǒ꤮ takhadû̌ dǒ něhǎlau tokhlǒ, bǔmôhtò̌ mò̌. Khwǐdû̌ dǒ a ô̌ kû̌ ta̤sîrîdû̌sîrîhtû hènṳ̌ pě.

¹⁰ Khwǐdû̌ dǒ a ô̌ kû̌ ta̤sîrîdû̌sîrîhtû numî̌ mò̌pè? A mî̌ Cǒmara tûjû̌pwa̤ dǒ a pǒ ta̤ lǒ̤꤮ bò, khwǐdû̌ dǒ a ô̌ kû̌ ta̤sîrîdû̌sîrîhtû.