Htû̌sò̌htò̌ 22 - Kawyaw New Testament

Ta̤sǎplǎ̤ yî̤̌hǎ kû̌ ta̤sǎwǐ htû̌sò̌htò̌ǐ

Khwǐdawi̤ ata̤sǎwǐ, ta̤sǎwǐ numî̌ pwa̤sǎwǐ ta̤ tokhlǒ ikǒlǒkò dǒ ta̤lṳhtò̌hôkû nutôpwa̤ aya. Dě tôbǎ sǎwǐ sô̌sô̌kû̌ ta̤sǎwǐ dǒ ami̤kû̌, tikhimǒ̤ dǒ lṳmṳ̌lîbô tôshǒ nutôshǒ.

¹ He Cǒmara, he Cǒmara, na wîkè he ma̤titè? Na ma̤hǎplǎge he tô̤̌. Na gana̤de he ta̤kookasha tô̤̌. Ma̤titèdě na cû̌ô̌ te̤pheyî̤ he ma̤titè?

² Ǒ he Cǒmaradû̌, he kwisǎyṳǐ na pṳ̂̌ni̤ni̤ bǎbǎkǎlè na hî̌shǔ he tôcǒ tô̤̌. He kwihtò̌ na pṳ̂̌sasa꤮ bǎbǎ he nǐ̤bǎ ta̤gûjû̌kabǎ tôcǒ tô̤̌.

³ Na mî̌ Cǒmara tûjû̌pwa̤ dǒ aplò̌shǐ. Na hǎnòò̌lò̤ dǒ gògǒhta htò̌yô̤̌khû̌ pô̤̌ khwǐdû̌. Isôrělaphû̌ htû̌sò̌htò̌ na.

⁴ Pamǒ̤phaphiphu dǒ꤮ awǐnu tokhlǒ yṳ̌ǎ tǒ̤ na nô̤̌pwǎ. Asî yṳǎ na dě na ma̤hǎplǎge asî.

⁵ Asî kaǎguhtò̌ dǒ na ô̌ dě a nǐ̤bǎ ta̤ma̤hǎplǎge. Asî yṳǎ nǎla̤ǐ na dě asî sòwò̤̌ pe tôcǒ꤮ tô̤̌.

⁶ Bǎbǎkǎlè he mî̌ asô̌sô̌ kû̌ htaǐshiko dǒ a ô̌ tṳ̌dè. He mî̌ kòyòhǎkhû̌phû̌ mè̤ nò tô̤̌. Kòshǔshawa̤ kè̌pî̌tî̌ bò he, kòyò sǎkhwè̌ bò he.

⁷ Kòyò lǒ̤bò dǒ a kè̌shǐ henu a pi̤jî̌ǐsho bò he. A pè̤̌ǎpè̤̌ô bò he. A sǎyǎ̤ û̌htò̌û̌lò̤ aikǒ.

⁸ Asî hî̌ kû̌, “A yṳ̌ǎ Cǒmara tûjû̌pwa̤. “No ma̤hǎplǎge mò̌ kû̌ a Cǒmara tûjû̌pwa̤nu. “Pô̤̌ a mô̤ǐ lû̌ûnu, no ma̤hǎplǎge mò̌ lû̌û kû̌ a nu.”

⁹ Na no ô̌phijǎlò̤ mô̤wô̌ he dǒ he mǒ̤ hǐphukû. Na kè̌ǐ ma̤ǐ he dǒ he ûnû̌ pe hemǒ̤nṳ̌shi akha penu.

¹⁰ Bǎ he ô̌phijǎlò̤꤮ akhanu, he ô̌ dǒ na cǔdekû. Bǎ he ô̌pepwǎ dǒ hemǒ̤hǐphukû akhanu, na htû he Cǒmaradû̌ hǒ.

¹¹ Khòsò̌dô ô̌ te̤pheyî̤ kû̌ he mǎ̤. Ta̤pò̤̌ta̤sha hèphǔ tini̤ kû̌ he hǒ. Pwa̤ma̤jè̌ he ô̌ tôpwǎ̤ tô̤̌.

¹² He khuwè̤ tokhlǒ ô̌te̤we̤ bò he sô̌sô̌kû̌ pṳ̂̌pha tômṳ̌ ô̌te̤we̤bò he. Pṳ̂̌pha shû̌sho dǒ Bashagǎkû nutokhlǒ, hè ô̌te̤we̤ bò he.

¹³ Asî òlè̤̌ bò akhû̌phě sô̌sô̌kû̌ khî gǒgaya̤ dǒ aglè̌ pṳ̂̌ǎ ta̤mi̤ta̤mò̤̌nu.

¹⁴ Hekhû̌heǎ hǎbòkè sô̌sô̌kû̌ kòyò lò̌lò̤kè shi. Hekhwǐ mî̌ a hǎphlǔkè bò. He sǎphlǒ mî̌ a sô̌sô̌kû̌ ahtûshilò̤ kèbò.

¹⁵ Hekhû̌heǎ khwedǎkrè̌꤮ kè sô̌sô̌kû̌ gopo̤ hǎphò̌. Heplî̤ icumě kè kû̌ gô̌nò̌dè. Na bè̌lò̤kè he dǒ ta̤si hǎgumṳ̌kla agûlǎ̤.

¹⁶ Kòyòphû̌mò̤̌ sîtokhlǒ ô̌te̤we̤ bò he sô̌sô̌kû̌ shǐmi̤ ô̌te̤we̤ bò henu. Asî htǎnṳ̌ bòkè he cǔde kû̌ khò̌lô̤pô̤̌.

¹⁷ He dô̌mǎ bò jò̌ hekhwǐ pṳ̂̌꤮ tôbô. Asî kè̌côwî̤ sǎyǎ̤ bò he.

¹⁸ Asî bèphî̌ lô̌khô he jehǐyò̤̌htû. A bǒ lô̌khô ta̤bèbwǐ.

¹⁹ Ǒ Cǒmara tûjû̌pwa̤, ô̌ tepheyî̤kè tǎ̤ he mǎ̤. Ǒ hekhû̌heǎ, hèma̤jè̌ phwèmò̌ he.

²⁰ Ma̤hǎplǎge he dǒ nò̌she akû. Ma̤hǎplǎge pô̤̌ he ta̤ô̌htûpwa̤ dǒ shǐ nutokhlǒ acǔdekû nî̌.

²¹ Ma̤hǎplǎge he dǒ khî gô̌kû. Ma̤hǎplǎge pô̤̌ he dǒ pṳ̂̌mi̤ ano̤nu.

²² Na ta̤ma̤wô̌ awe̤akè nutokhlǒ he gǔ hî̌lṳ̌ bǎ kû̌ hepṳ̌wè̤̌ tokhlǒ. Dǒ kòyò cabucaba bò lû̌û akǎmakûnu, he gǔ htû̌sò̌htò̌ǐ na.

²³ Pwa̤ dǒ a ǐsha bè̌dubè̌nǎ̤ Cǒmara tûjû̌pwa̤ sî, htû̌sò̌htò̌mò̌ lû̌û. Lǒ̤bò꤮ Ya̤kû akhlialè sî, bè̌dû̌bè̌htû lô̌khô yǎ. Isôrěla aphû̌ali̤ bò̌bò sî, bè̌dubè̌nǎ̤ lô̌khô yǎ.

²⁴ A sǎkhwè̌ kè̌tûlû̌kè bǎ pwa̤bǎpò̤̌bǎsha ata̤shuphû̌shèwè tô̤̌. A kè̌tûklû̌ kè asî tô̤̌tô̤̌. Bǎ asî kwihtò̌ lû̌û ta̤ma̤jè̌ akhanu, a ganǎ̤de dě a hî̌shǔ asî.

²⁵ He htû̌sò̌htò̌ǐ pû na dǒ pwa̤yṳ̌ǎta̤ ô̌plǒ alô̤mô̤̌. He lṳhtò̌ pû na pô̤̌ he ta̤olò̤ ô̌nǎnu dǒ pwa̤ǐsha bè̌dubè̌nǎ̤ nanu alô̤mô̤̌.

²⁶ Kòyò dǒ kò pè̤̌ǎpè̤̌ô lû̌û nutokhlǒ gǔ ǎkǒôbe sǎphlǒmô̤ bò pě. Pwa̤ dǒ a kè̌lǎ Cǒmara tûjû̌pwa̤ sîtokhlǒ gǔ htû̌sò̌htò̌ǐ bò lû̌û pě. Sîsǎphlǒ gûjû̌kabǎ pṳ̂̌shěpṳ̂̌khǎ pě.

²⁷ Hǎkhû̌běkhû̌ shigǎ lǒ̤꤮ bò gǔ gènè̤htò̌ Cǒmara tûjû̌pwa̤ dě a gǔ getîkhîbò lô̌khô dǒ aô̌. Shigǎ khlilèphû̌ lǒ̤bò gǔ dô̌gînî̤lò̤ cabahtò̌ bò dǒ alô̤mô̤̌ pě.

²⁸ Cǒmara tûjû̌pwa̤ pǒǐ ta̤ lǒ̤꤮ bò. A pǒǐ pô̤̌ khlilèphû̌ lǒ̤꤮ bò.

²⁹ Kòyò dǒ a phî̌dû̌phî̌htò̌yô̤̌ anǎ̤ nutokhlǒ, a gǔ ma̤pwè cubucabahtò̌ lǒ̤bò. Kòyò dǒ a bǎ getîkhîbò sô̌ dǒ hǎgumṳ̌kla nutokhlǒ gǔ dô̌gînî̤lò̤ lǒ̤bò.

³⁰ Khlilèphû̌ tǒ̤hènè htû̌꤮ anô̌ pě tokhlǒ gǔ ma̤jè̌ lô̌khô ata̤ma̤. Khlilèphû̌ tôhtu hto tôhtu ganǎ̤de sî̌ya bò Běcǎdû̌ awe̤akè pě.

³¹ Kòyò gǔ pwe̤ǐlṳ̌ bǎ kòyò dǒ a ô̌phijǎlò̤ khôtô̤̌ nutokhlǒ kû̌ Běcǎ Cǒmara ata̤cǒta̤tè̤. Asî gǔ ganǎ̤debǎ Běcǎdû̌ ata̤ma̤hǎplǎge awe̤akè.