Htû̌sò̌htò̌ 21 - Kawyaw New Testament

Khwǐdǎwi̤ htû̌sò̌htò̌ǐ ta̤ma̤pè̤̌

Khwǐdawi̤ ata̤sǎwǐ, ta̤sǎwǐ numî̌ pwa̤sǎwǐ ta̤ tokhlǒ ikǒlǒkò dǒ ta̤lṳhtò̌hôkû nutôpwa̤ aya.

¹ Ǒ Cǒmara tûjû̌pwa̤, dǒ na ǐ khwǐdû̌ ta̤shû̌ta̤sho akhû̌akhî, a sǎlǎ̤sǎlò̤ mî̌ca. Na ma̤jè̌ lû̌û dě a ma̤pè̤̌kè khuwè̤ akhû̌akhî, a sǎlě̤sǎlò̤ mî̌ca.

² Na ma̤lǒbe bò asǎphlǒ ta̤sǎyṳsǎbǎ. Na la̤lò̤ kè ta̤kwisǎyṳ na tô̤̌.

³ Na ǐ pû yǎ ta̤ǐshowî̤ dǒ awî̤awô̌. Na glû̌htò̌ bǎ yǎ khû̌glû̌hta dǒ kò ma̤ kû̌ hta acè̌.

⁴ A kwihtò̌ na ta̤htûpwa̤ nědû̌lahtû. Na ǐ yǎ lṳmṳ̌ni̤ lṳmṳ̌sa tûjû̌pwa̤ talakhǎ.

⁵ Na ǐ yǎ ta̤ma̤pè̤̌ akhû̌akhî, kò bè̌dû̌bè̌htû ǐ mî̌ca lû̌û. Na ǐ yǎ ta̤siwi̤sòwò̤ dǒ alîakakha.

⁶ Na ta̤ǐshowî̤ ô̌ kû̌ lû̌û tûjû̌pwa̤. Na ô̌kû̌ yǎ akhû̌akhî, a sǎlě̤sǎlò̤ mî̌ca.

⁷ Hǒomî̌ dǒ khwǐdû̌ yṳǎ Cǒmara tûjû̌pwa̤ akhû̌akhî hǒ. Cǒmara dǒ adû̌ahtûlǒ hǒtôpwa̤ mô̤ǐ yǎ kû̌ ta̤mô̤ǐ dǒ ahǎbòjò tô̤̌ akhû̌akhî, a hǎnòò̌ bǎ mî̌ca dǒ gògǒhtakhû̌.

⁸ Khwǐdû̌ gǔ pṳ̂̌nṳ̌bò pwa̤khû̌khwè yǎ tokhlǒ kû̌ acǔde. A gǔ gwèmě bò akhuwè̤ nutokhlǒ kû̌ acǔtûmû.

⁹ Bǎ Cǒmara tûjû̌pwa̤ hèô̌lṳ̌htò̌ akha pěnu, a ma̤pî̌ kèbò asî sô̌sô̌kèkû̌ mî̌gè̌dû̌lò̤nu. A sǎphlǒdû̌ lî̤pi̤sǐ jî̌ akhû̌akhî, a lò̤gè̌te̤we̤bǐ kèbò asî. A ulò̤ si bò asî.

¹⁰ Khwǐdû̌ gǔ ma̤sima̤hǎmǎ kèbò asî akhlialè bǎ hǎkhû̌. A gǔ ma̤tṳ̌ kèbò asî aphû̌ali̤ lò̤tutṳ̌ tokhlǒ dǒ kòyòhǎkhû̌phû̌ akla.

¹¹ Asî gǔma̤phû̌mò̤̌ lô̌khô khwǐdû̌ bǎbǎkǎlè ata̤yè̤lò̤nǎ tokhlǒnu a behtò̌belò̤ tôcǒ tô̤̌.

¹² A mṳcû̌tô asî kû̌ akhlǐ akhû̌akhî, asî htû̌tiwǐ hǎhtò̌khlè̌ ge bò sô̌.

¹³ Ǒ Cǒmara tûjû̌pwa̤, pa gǔ htû̌sò̌htò̌ǐ nata̤sîrîshû̌sho. Pa sǎwǐhtû̌sò̌htò̌ na ta̤pô̤ta̤phǎ pě.