Htû̌sò̌htò̌ 20 - Kawyaw New Testament

Khwǐ lǎ̤ma̤pè̤̌ aya ta̤kwicaba

Khwǐdawi̤ ata̤sǎwǐ, ta̤sǎwǐ numî̌ pwa̤sǎwǐ ta̤ tokhlǒ ikǒlǒkò dǒ ta̤lṳhtò̌hôkû nutôpwa̤ aya.

¹ Bǎ na kè̌shǐbǎ kû̌ ta̤gû̌ta̤gè̌ akhanu, Cǒmara tûjû̌pwa̤ gǔ ganǎ̤de pû na ta̤kwicaba nî̌. Ya̤kû a Cǒmara ami̤nu a gǔ tugutakaǐ pû na nî̌.

² A ô̌ dǒ gûlǎ̤ plò̌shǐ dě a glè̌ ma̤jè̌ pû nanî̌. A ô̌ dǒ Sǐû khôlôkhû̌ dě a gǔ ma̤jè pû nanî̌.

³ A gǔ sî̌yahtò̌ pû nata̤lṳta̤tò̌ nutokhlǒ nî̌. A gǔ phî̌shǔ bò pû na shû̌u lṳhtò̌ ta̤mi̤ta̤mò̤̌ nutokhlǒ nî̌.

⁴ Pô̤̌ na sǎyṳsǎbǎnu a gǔ ǐ pû na nî̌. Pô̤̌ na ta̤yè̤lò̤nǎ nata̤ma̤ tokhlǒnu a gǔ behtò̌belò̤ pû bǎ na nî̌.

⁵ Bǎ na ma̤pè̤̌ ta̤ akhanu, pa gǔ sǎlě̤sǎlò̤ sǎwǐsǎshô̌ pě. Dǒ Cǒmaradû̌ ami̤ akhû̌akhî, pa gǔ wěwòhtò̌ ta̤ma̤pè̤̌ akhû̌pa̤la̤ pě. Lǒ̤bò na ta̤sǎyṳgwèbǎǐhtò̌ nutokhlǒ Cǒmara tûjû̌pwa̤ gǔ ǐ bò pû na nî̌.

⁶ Khònò̤nu he sî̌ya kû̌ Cǒmara tûjû̌pwa̤ ma̤hǎplǎge khwǐ dǒ a rû̌htò̌ nutôpwa̤. A ô̌ dǒ mǒkhû̌ plò̌shǐ dě a ganǎ̤de lû̌û ta̤kwicaba, A ma̤hǎplǎge lû̌û kû̌ acǔtûmû dǒ ata̤sîrîpô̤phǎnu.

⁷ Kòyò tokhlǒkhlǒ mî̌ a nǎla̤ǐ khlo atîsî̌lô̤ kû̌ tîsî̌ dǒ alǎ̤htò̌shě ta̤. Pa dě, pa nǎla̤ǐ pwǎ tǒ̤ pa Cǒmara tûjû̌pwa̤ ami̤ nô̤̌.

⁸ Kòyò pô̤̌o tokhlǒ mî̌ a gǔ gònò̤̌gèglè, lòkhǔpo̤kè pě. Pa khû̌dayadě pa ihtǒ ô̌měô̌glewô̌ pě.

⁹ Ǒ Cǒmara tûjû̌pwa̤, ma̤hǎplǎ khwǐdû̌ nî̌. Bǎ pa kwihtò̌ na ta̤ma̤jè̌ akhanu, ganǎ̤de pa ta̤kwinu nî̌.