Htû̌sò̌htò̌ 2 - Kawyaw New Testament

Cǒmara tûjû̌pwa̤ rû̌htò̌ khwǐ

¹ Khlilèphû̌ ashǔshawa̤ tokhlǒ cû̌ sǎphlǒdû̌ tǒ̤ ma̤titè? Kòyò tokhlǒ glè̌ cû̌ ma̤phǔmò̤̌ ta̤ dǒ atṳ̌dè ma̤titè?

² Hǎkhû̌khwǐ tokhlǒ tîwî̌tòwò nǎ anǎ̤ dǒ a gǔ shěpě̤ kû̌mî̌ Cǒmara tûjû̌pwa̤ kû̌ khwǐ dǒ Cǒmara rû̌htò̌ yǎnu. Pwa̤pǒta̤ tokhlǒ ô̌plǒô̌cu wô̤̌wô̤̌ lû̌ dǒ a gǔ shěwô̤̌wô̤̌ ta̤ kû̌ hǎkhû̌khwǐ.

³ Asî hî̌ lô̌khô kû̌, “Pa htûlè̌ge asî comětegle panu. “Pa ma̤tṳ̌kè sǒpli̤nu tǎ.”

⁴ Běcǎdû̌ hǎnòò̌ô̌ dǒ mǒkhû̌ sǎyî̤̌lò̤ asî. A hî̌takǎkè asî.

⁵ A sǎphlǒdû̌ dě a sǎhtǎdû̌da asî. A sǎphlǒdû̌ tûlû̌shû̌lě dě ama̤ǐshǔǐsha asî.

⁶ A hî̌ kû̌, “Khwǐ dǒ he rû̌htò̌ a nu, he no htò̌ pǒ a dǒ Sǐû khôlô, he khôlô plò̌shǐkhû̌.”

⁷ Khwǐ dǒ Cǒmara tûjû̌pwa̤ rû̌htò̌ lû̌û nutôpwa̤ hî̌ kû̌, “He gǔ shôbǐǐlṳ̌ ta̤ dǒ Cǒmara tûjû̌pwa̤ hî̌lṳ̌bǎ henu pě. “A hî̌ he kû̌, ‘na mî̌ hephû̌pwa̤khû. Khò̌tini̤ dě hehtû napha hǒ. hǒ.

⁸ “‘Kwi mò̌ he, khlilèphû̌ hǒtokhlǒ he no htûhtò̌ bò kû̌ na û̌cata̤ya pě. “‘Hǎkhû̌ tôběbò htûhtò̌bò nata pě.

⁹ “‘Na gǔ dephò̌ kè asî kû̌ nò̌htô̌ tě̤htò̌ pě. “‘Na gǔ ma̤mǔcipwǐ kèbò asî pô̤̌ po̤hǎ pě.’”

¹⁰ Ǒ꤮ hǎkhû̌khwǐ sî, bè̌sû̌bè̌sǎ lô̌khô. Ǒ꤮ hǎkhû̌ khwǐ sî, sè̌rè̌ lô̌khô sînǎ̤.

¹¹ Ǐshǔǐsha dě bè̌dubè̌nǎ̤ Cǒmara tûjû̌pwa̤, cabahtò̌ lô̌khô a. Yò̤lǎ̤plǎdî̌ sîsǎphlǒ dǒ ta̤gònò̤gòglè akû.

¹² Dô̌gînî̤lò̤ dǒ phû̌phû lô̤mô̤̌ nu. Hî̌pě asǎphlǒdû̌ dě bǎ sîcû̌ dǒ klè̌lô̤ akhanu, dǒ ta̤gènè̤ tǒ̤tô̤̌ akû sîsikè hè̌. Tashò̌phû̌ akûnô̤̌nu asǎphlǒdû̌ htò̌phwè pě. Kòyò hèô̌tûdû anǎ̤ dǒ a ô̌nu a nǐ̤bǎ ta̤ǐshôwî̤.