Htû̌sò̌htò̌ 19 - Kawyaw New Testament

Cǒmaradû̌ ata̤sîrîdû̌sîrîhtû dě ta̤bǒlò̤ akû

Khwǐdawi̤ ata̤sǎwǐ, ta̤sǎwǐ numî̌ pwa̤sǎwǐ ta̤ tokhlǒ mî̌ ikǒlǒkò dǒ ta̤lṳhtò̌hôkû nutôpwa̤ aya.

¹ Mǒkhû̌ pwe̤ǐlṳ̌ Cǒmaradû̌ ata̤bwǐdû̌sîrîhtû. Mǒlǎ̤ pwe̤ǐlṳ̌ Cǒmara ata̤bǒlò̤tèlò̤ta̤.

² Tôni̤ hto tôni̤ asî pwe̤ǐlṳ̌ hènè dǒ nô̌kò tôni̤. Tôsa hto tôsa asî dǔlṳ̌htò̌ Cǒmara ata̤sî̌ta̤jò̌.

³ Asî hî̌bǎ tômû̌꤮ tô̤̌, alě̤pwe̤htò̌ tôphlǒ tô̤̌, ganǎ̤de asîlě̤ tôplǎ tô̤̌.

⁴ Bǎbǎkǎlè asî ta̤shôbǐǐlṳ̌ tokhlǒnu a lṳ̌pîshîcû̌ bò dǒ hǎkhû̌ tôbě. Asî alě̤ayô̤̌nu a cû̌ tǒ̤bò dǒ hǎkhû̌ gutṳ̌. Dǒ mǒlǎ̤nu Cǒmara ma̤htò̌ bǎ lṳmṳ̌ ahǐ tômè.

⁵ Lṳmṳ̌nu a ô̌ dǒ ahǐkû, a hǎhtò̌ sô̌sô̌kû̌ khòmò̤phû̌khû dě asǎlě̤sǎlò̤ tôpwa̤. Asô̌sô̌kû̌ pwa̤khlè̌ta̤ dǒ akhlè̌shû̌khlè̌phwè dě a sǎle̤sǎlò̤ nṳ̌bèkhlè̌ ta̤ kû̌ kò nutôpwa̤.

⁶ A htò̌ dǒ mǒkhû̌ kòshî̌, a lò̤tě̤ dǒ mǒkhû̌ gutṳ̌. Ta̤ dǒ a ô̌tûdûbǐ jò kû̌ lṳmṳ̌nu a ô̌ tôcǒ tô̤̌.

Cǒmara tûjû̌pwa̤ ata̤sû̌ta̤tòwò

⁷ Cǒmara tûjû̌pwa̤ ata̤sû̌ta̤tòwò mî̌ alǒabe. A ǐshû̌htò̌shohtò̌ kòyò sǎphlǒ. Cǒmara tûjû̌pwa̤ ata̤mǎlò̤ mî̌ lǎ̤yṳ̌ǎ tě̤tě̤mè̤̌mè̤̌. A ǐ ta̤sî̌jò̌lîmò dǒ kòyò phuhtò.

⁸ Cǒmara tûjû̌pwa̤ ata̤sû̌ǐ numî̌ acǒatè̤. A dǐ sǎlě̤sǎlò̤ htò̌ kòyò sǎphlǒ. Cǒmara tûjû̌pwa̤ ata̤mǎlò̤ numî̌ aplîamṳ̂̌. A dǐ lîhtò̌ kòyò mǐ̤sǎphlǒ.

⁹ Ta̤ǐsha, ta̤bè̌dubè̌nǎ̤ǐ Cǒmara tûjû̌pwa̤ mî̌ awî̤awô̌. A ô̌měô̌gle tûjû̌꤮ pwa̤. Cǒmara tûjû̌pwa̤ ata̤cî̌htò̌nu atôabǎ, acǒatè̤.

¹⁰ Kǎtô̤̌ alě̤dû̌pwî̤htû bò pe kû̌ hta. A pwî̤dû̌ khlo kû̌ hta acè̌. A shu khlo kû̌ wè̌khû̌shi. A shu khlo kû̌ wè̌khû̌shi acè̌.

¹¹ Nalě̤nayô̤̌ ǐsè̌rè̌ napwa̤ma̤ta̤phû̌. Bǎ he ô̌htûpwa̤ kû̌ pô̤̌ ata̤sû̌ǐtòwòǐ akhanu, he nî̤̌bǎ ta̤ dǒ awô̌.

¹² Kòyò sî̌yajò bò tûû̌ ata̤sǔ tôpwǎ̤ tô̤̌. Ǒ Cǒmara tûjû̌pwa̤ ma̤hǎplǎ he kû̌ ta̤sǔ dǒ he sî̌ya tô̤̌ dě he ma̤sǔ nutokhlǒ.

¹³ Ma̤tě̤tṳbǐ na pwa̤ma̤ta̤phû̌ he kû̌ ta̤sǔ dǒ he sî̌ya dě he ma̤ nutokhlǒ. Plûpǒ pû he kû̌ ta̤nutokhlǒ mǎ̤. Kè̌ ma̤pô̤̌nu hî̌mî̌, he hǎplǎkè kû̌ ta̤sǔ dě he ma̤sǔ pe ta̤sǔdû̌ nutokhlǒ tô̤̌.

¹⁴ Ǒ Cǒmara tûjû̌pwa̤, he khû̌phě ata̤hî̌bǎ kû̌ he sǎphlǒ ata̤gènè̤ tokhlǒnu, no tôbǎ na sǎphlǒ no tôbǎ nasû̌shi nî̌. Na mî̌ he lǎ̤ô̌tûdû lǒ̤dû̌, pwa̤ma̤hǎplǎge he.