Htû̌sò̌htò̌ 16 - Kawyaw New Testament

Kwicaba dě lǎ̤yṳǎ Cǒmara aya

Khwǐdawi̤ ata̤sǎwǐ nutôshǒ mî̌ dǒ Hebrǔyô̤̌nu, a kaǎ lû̌û kû̌ mî̌katama ta̤sǎwǐ.

¹ Ǒ꤮ Cǒmaradû̌, he cû̌ô̌tûdû ǐ henǎ̤ kû̌ na akhû̌akhî, tugutakaǐ he.

² He hî̌ Cǒmara tûjû̌pwa̤ kû̌, “Na mî̌ he Běcǎdû̌, kè̌mè̤̌kû̌ natô̤̌ hî̌mî̌, he ta̤wô̌ ô̌ kû̌ kòyò tôcǒ꤮ tô̤̌.”

³ Kòyò dǒ cǒtè̤ kû̌ Cǒmara ô̌htûpwa̤ dě hǎkhû̌ tokhlǒnu, asî mî̌ kòyò wô̌nuhǒ. He kè̌shǐ asî dě amô̤꤮ mè̤mè̤̌ mî̌ca sǎphlǒ.

⁴ Kòyò dǒ a cabahtò̌khô̌ Cǒmara dǒ ashǔshawa̤ tokhlǒnu, ata̤sǎplǎ̤nǎ̤bǎ sǔ sǔ a dû̌htò̌. Bǎ asî lṳhtò̌ǐ Cǒmara dǒ ashǔshawa̤ tokhlǒ kû̌ ta̤phû̌ta̤li̤ asǐ akhanu, he lṳhtò̌ kû̌ kòtô̤̌. Lǎ̤hî̌htò̌ asî Cǒmara ami̤꤮ pwǎnu he hî̌htò̌ tô̤̌tô̤̌.

⁵ Ǒ꤮ Cǒmara tûjû̌pwa̤, he sǎmǒ tǒ̤꤮ na pwǎ, ta̤ǐshowî̤ lǒ̤꤮ bò mî̌ a hè dǒ naô̌. He ta̤ô̌htûpwa̤ dǒlô̤mô̤̌ tokhônu aô̌pwǎ dǒ cudekû.

⁶ Na bè̌lò̤ ma̤dòǐkè pe he gǎkû numî̌ gǎ dǒ amô̤. He nǐ̤bǎ mî̌ca û̌cata̤bǐ dě a lǒbe kû̌ ta̤mô̤sû̌mô̤sò̌.

⁷ He gǔ htû̌sò̌ǐ Cǒmara tûjû̌pwa̤ dě a yṳ̂̌klè̌yṳ̂̌klò ǐ he. Lṳmṳ̌khǐkha bǎbǎ, he tôcû̌ klè̌ bǎtè tôbônu hesò̌phlǒ ta̤gènè̤ sû̌ǐtòwòǐ he.

⁸ He kè̌shǐ Cǒmara tûjû̌pwa̤ ô̌ dǒ he lô̤mô̤̌ pṳ̂̌꤮ taplǎ. A ô̌ dě hecǔtûmû tokhô akhû̌akhî, kò ma̤pò̤̌ma̤sha jò he tôcǒ꤮ tô̤̌.

⁹ He sò̌phlǒmô̤ pṳ̂̌꤮ taplǎ, henǎ̤ tôpwa̤bò a sǎle̤sǎlò̤ bò. He nǎ̤glǒ bǎbǎ, he ô̌ dǒ ta̤tûdû akû.

¹⁰ Na wîlò̤tě̤kè he ta̤htûpwa̤ dǒ lṳnǎnǎdo tô̤̌ dě he sǎlě̤sǎlò̤ mî̌ca. Na nosonoûkè na kòyòplò̌shǐ nutôpwa̤ dǒ lṳkû tô̤̌.

¹¹ Na dǔlṳ̌ hto he klè̌ dě a sûcû̌ he dǒ ta̤htûpwa̤ nutôbô. Na ô̌kû̌ he akhû̌akhî, he sǎlě̤sǎlò̤. He ô̌ dǒ nacǔtûmû tôkhô akhû̌akhî, he sǎphlǒmô̤ tûjû̌꤮ pwa̤ pě.