Htû̌sò̌htò̌ 149 - Kawyaw New Testament

Ta̤sǎwǐ htû̌sò̌htò̌

¹ Htû̌sò̌htò̌ lô̌khô Cǒmara tûjû̌pwa̤. Sǎwǐhtò̌ Cǒmara tûjû̌pwa̤ kû̌ ta̤sǎwǐ asa. Htû̌sò̌htò̌ lû̌û dǒ pwa̤ cǒ kû̌ ayô̤̌ a kòyò saprṳ̂dû̌ akla.

² Ǒ꤮ Isôrě̤laphû̌ sî, dǒ pwa̤bô̌lò̤ sî nutôpwa̤ akhû̌akhî, sǎlě̤sǎlò̤ lô̌khô. Ǒ꤮ Wî̤̌sǐûphû̌ sî, dǒ sîkhwǐdû̌ akhû̌akhî, sǎlě̤sǎlò̤ lô̌khô.

³ Htû̌sò̌htò̌ lô̌khô ami̤ kû̌ ta̤kalî̌. Plǎ̤ǐ cî̌ja, dǒǐ tǐtutegwe dě sǎwǐ htû̌sò̌htò̌ lô̌khô lû̌û.

⁴ Ma̤titèhî̌dě Cǒmara tûjû̌pwa̤ sǎlě̤sǎlò̤ ǐ kû̌ a kòyò dě a dǐma̤pè̤̌ kòyò dǒ a shò̌lò̤ asǎphlǒ nutokhlǒ.

⁵ A ǐ kòyò dǒ a cǒ kû̌ ayô̤̌ nutokhlǒ ta̤ma̤pè̤̌ akhû̌akhî, no sǎlě̤sǎlò̤ mò̌ asî. Asî hǎmôô̌ dǒ lǎ̤dakhû̌ akha bǎbǎ, no sǎlě̤sǎlò̤ sǎwǐhtò̌ asî.

⁶ No htû̌sò̌htò̌ asî dě no pṳ̂̌měǐ nò̌shî dǒ asî cǔdekû.

⁷ Dě no ma̤lǐ̤ gesô̌, no cî̌htò̌ khlilèphû̌ tokhlǒ kû̌ asînu.

⁸ Asî glè̌ comě kòyò khlilèphû̌ akhwǐ, khlilèphû̌ ikǒdû̌ tokhlǒ kû̌ sǒpli̤tè̤glè pě.

⁹ Asî glè̌ cî̌htò̌ khlilèphû̌ tokhlǒ pô̤̌ Cǒmaradû̌ hî̌bǎlò̤ hto ayô̤̌nu hǒ. Hǒomî̌ ta̤sîrîdû̌sîrîhtû tôcǒ dǒ lǒ̤꤮ bò Cǒmaradû̌ a kòyò dǒ acǒ kû̌ ayô̤̌ tokhlǒ ayahǒ. Htû̌sò̌htò̌ lô̌khô Cǒmara tûjû̌pwa̤.