Htû̌sò̌htò̌ 147 - Kawyaw New Testament

Htû̌sò̌htò̌ Cǒmara dǒ ata̤pô̤ta̤phǎ

¹ Htû̌sò̌htò̌ Cǒmara tûjû̌pwa̤. Ta̤sǎwǐ htû̌sò̌htò̌ǐ pa Cǒmaradû̌ numî̌ awô̌ mî̌ca. Ta̤htûsò̌htò̌ǐ yǎ numî̌ awî̤awô̌, atôabǎ.

² Cǒmara tûjû̌pwa̤ ma̤htò̌ǐ sô̌ Wî̤̌yarǔshôle. A kaǎge plǒbò sô̌ Isôrě̤laphû̌ dǒ kòyò pṳ̂̌cû̌ asî nutokhlǒ.

³ A ma̤mô̤ma̤wô̌ǐ kòyò sǎphlǒpî̌. A ma̤hǎmǎ bǎ asî ta̤shahtò.

⁴ A dô̌mǎǐ shǎ, a pô̤nṳ̌ bǎ asî tômè kû̌ tômè ami̤.

⁵ Pa Běcǎdû̌ mî̌ apô̤aphǎ dû̌꤮ mî̌ca. Ata̤sî̌yaphlôphǎ numî̌ kòyò sî̌ganǎ̤htò̌bò̌ nô̌ tôpwa̤꤮ tô̤̌.

⁶ Cǒmara tûjû̌pwa̤ ma̤jè̌ kòyò dǒ a shò̌lò̤ asǎphlǒ. A shò̌lò̤kè kòyòphû̌mò̤̌.

⁷ Sǎwǐhtò̌ lô̌khô Cǒmara tûjû̌pwa̤ kû̌ ta̤hî̌bwǐhî̌sîrî. Dǒǐ tǐtutegwe dě sǎwǐ htû̌sò̌htò̌ lô̌khô pa Cǒmaradû̌.

⁸ A hǔbǐǐ mǒlǎ̤ kû̌ poǒlṳ̌. A no julò̤ gǎ dǒ hǎkhû̌, a no dô̌htò̌ mi̤mṳ̌ dǒ khôlôkhû̌.

⁹ Bǎ ta̤phû̌ta̤wè̤ tokhlǒ yî̤̌hǎ akhanu, a dǐǎdǐô asî, a dǐǎdǐôpè̤̌ cǎwǎphû̌.

¹⁰ Tîsî̌ dǒ ashû̌ashonu bǎbǎ, kòyòhǎkhû̌phû̌ dǒ akhuahenu bǎbǎ, a tô nô̌ asǎphlǒ tô̤̌.

¹¹ Cǒmara tûjû̌pwa̤ sǎphlǒtô kòyò dǒ a ǐsha bè̌dubè̌nǎ̤ lû̌û kû̌ a nǎla̤ǐ pwǎ ata̤mô̤ dǒ ahǎbòjò tô̤̌ nutokhlǒ nô̤̌pwǎ.

¹² Ǒ꤮ Wî̤̌yarǔshôle phû̌sî, htû̌sò̌htò̌ Cǒmara tûjû̌pwa̤. Ǒ꤮ Wî̤̌sǐû phû̌sî, htû̌sò̌htò̌ na Cǒmaradû̌.

¹³ A ma̤tònòwô̌ bǎ nawî̤̌we̤dû̌ takha nò̌lṳ̂̌. A ǐshowî̤ na dophû̌shô̌phû̌.

¹⁴ A ma̤pè̤̌ma̤dûbò bǎ nashinagǎ tôgǎlǎ̤. A dǐǎdǐôǐ na kû̌ huwî̤huwô̌ gutṳ̌.

¹⁵ A hî̌bǎhtò̌ ayô̤̌ dǒ hǎkhû̌ dě pô̤̌ a hî̌nu sělě ahtûhtò̌.

¹⁶ A no lò̤ shicò dǒ abû sô̌sô̌kû̌ sû̌phû̌shû̌. A ma̤peshecû̌bò shicòkhlǒ pô̤̌ kûphǎ.

¹⁷ A no julò̤ siwi̤jǐ pô̤̌ lǒ̤mǔ. Mò̌pè ô̌khò bò̌ gǎwô̤̌gǎsha dǒ a no htûhtò̌nu pě ya?

¹⁸ Htodě a hî̌lò̤ pô̤̌ ayô̤̌ dě shikhlǒ htûshibòkè. A no sǎhè gili̤sǎ dě shi lô̤̌cû̌ bò.

¹⁹ A dǐsî̌yalṳ̌ bǎ Phayakò akhlialè tokhlǒ kû̌ alě̤ayô̤̌. A dǐsî̌yalṳ̌ bǎ Isôrě̤la khlilèphû̌ tokhlǒ kû̌ ata̤yṳ̂̌klè̌yṳ̂̌klò, ata̤mǎlò̤.

²⁰ A ma̤ bǎ khlilèphû̌ shǔshawa̤ tokhlǒ pô̤̌o tô̤̌. Khlilèphû̌ shǔshawa̤ sî̌ganǎ̤ lô̌khô ata̤mǎlò̤ tô̤̌tô̤̌. Htû̌sò̌htò̌ Cǒmara tûjû̌pwa̤.