Htû̌sò̌htò̌ 146 - Kawyaw New Testament

Ta̤htûsò̌htò̌ǐ ta̤ma̤hǎplǎge a Běcǎ

¹ Htû̌sò̌htò̌ lô̌khô Cǒmara tûjû̌pwa̤. He htû̌sò̌htò̌ Cǒmara tûjû̌pwa̤ kû̌ he sǎphlǒtômèbò.

² Bǎ꤮ helṳmṳ̌ni̤ lṳmṳ̌sa ô̌nu he htû̌sò̌htò̌ Cǒmara tûjû̌pwa̤ pě. Bǎ꤮ he ô̌htûpwa̤ pe akhanu, he sǎwǐ htû̌sò̌htò̌ǐ he Cǒmaradû̌ pě.

³ Nǎla̤ǐhtò̌ tǎ̤ lô̌khô pwa̤htûikǒlǒkò tokhlǒ mǎ̤. Kòyò hǎkhû̌phû̌ ma̤hǎplǎkè jò sî tôpwa̤꤮ tô̤̌.

⁴ Bǎ asî sikè akha pěnu, a getîkhî lô̌khô pwǎ dǒ hǎkhû̌ pě. Ata̤yè̤lò̤nǎ tokhlǒ apî̌kèbò bǎnu tôni̤ pě.

⁵ Kòyò dǒ Phayakò a Cǒmaradû̌ ma̤jè̌ asî nî̌ a nǎla̤ǐ pwǎ tǒ̤ Cǒmara tûjû̌pwa̤ a Cǒmaradû̌ nô̤̌ tokhlǒnu, a nǐ̤bǎ ta̤ǐshôwî̤.

⁶ Mǒkhû̌hǎkhû̌, shidû̌te̤we̤ sîtokhlǒ kû̌ ta̤ lǒ̤bò dǒ a ô̌ bǎ ta̤hǒo tokhlǒ akû tokhlǒnu, a bô̌lò̤ lǒ̤bò. a cǒ kû̌ ayô̤̌ tûjû̌pwa̤.

⁷ A cî̌htò̌cǒcî̌htò̌tè̤ bǎ kòyò dǒ kò ma̤jî̌ma̤jû̌ lû̌û tokhlǒ aya. A dǐǎdǐô bǎ pwa̤sǎwǐ̤sǎô. Cǒmara tûjû̌pwa̤ ma̤hǎplǎ kòyò lò̤tě̤ dǒ apô̤kû.

⁸ Cǒmara tûjû̌pwa̤ ma̤lî sô̌ bǎ kòyò mǐ̤sǎkhǐ tokhlǒ amǐ̤sǎ. A ma̤jè̌ kòyò dǒ a sǎphlǒpî̌. A mô̤ǐ kòyòcǒkòyòtè̤.

⁹ Cǒmara tûjû̌pwa̤ kè̌ǐma̤ǐ pwa̤htû shǐpwǎ̤shǐmè̤. A ma̤jè̌ pwa̤mǒ̤khwè̌ kû̌ phû̌ khwè̌sî. A ma̤pî̌ma̤lṳ̂̌ kèbò kòyòkhu phû̌mò̤̌ ata̤gènè̤ ô̌nǎ.

¹⁰ Ǒ꤮ Wî̤̌sǐû, na Cǒmaradû̌, Cǒmara tûjû̌pwa̤ pǒǐ kòyò tôhtu hto tôhtu. Htû̌sò̌htò̌ lô̌khô Cǒmara tûjû̌pwa̤.