Htû̌sò̌htò̌ 145 - Kawyaw New Testament

Ta̤sǎwǐ htû̌sò̌htò̌

Khwǐdawi̤ ata̤sǎwǐ htò̌sò̌htò̌.

¹ Ǒ he Cǒmaradû̌, hekhwidû̌, he shôbǐǐlṳ̌ nata̤sîrîdû̌sîrîhtû awe̤akè. He htû̌sò̌htò̌ nami̤ tûjû̌pwa̤ talakhǎ.

² He gǔ htû̌sò̌htò̌ na pṳ̂̌ni̤pṳ̂̌sa. He gǔ htû̌sò̌htò̌ nami̤ tûjû̌pwa̤ talakhǎ.

³ Cǒmara tûjû̌pwa̤ mî̌ asîrîdû̌sîrîhtû jî̌le, a gwǎ htû̌sò̌htò̌ mè̤̌caca. Asîrîdû̌sîrîhtû pwǐ tènu, kòyò sî̌yahtû tôpwa̤ tô̤̌.

⁴ Kòyò tôhtu hto tôhtu gǔ htû̌sò̌htò̌bò nata̤ma̤. Asî gǔ pwe̤ǐ shôbǐǐbò nata̤ma̤ dǒ apô̤aphǎ.

⁵ He gǔ gènè̤ pwǎ tǒ̤ nata̤sîrîpô̤phǎ, nata̤sîrîdû̌sîrîhtû ata̤lîta̤kakha kû̌ nata̤ma̤ dǒ acô̌klî̌cô̌sè.

⁶ Asî gǔ shôbǐǐbò nata̤pô̤ta̤phǎ dǒ na ma̤ ta̤cô̌klǐ ǒò̌. He gǔ pwe̤ǐlò̤ bǎ kòyò kû̌ nata̤ma̤ dǒ adû̌ayô̤̌.

⁷ Asî gǔ pwe̤ǐlṳ̌bò lô̌khô nata̤wô̌ dǒ adû̌ayô̤̌ awe̤akè. Asî gǔ sǎlě̤sǎlò̤ sǎwǐhtò̌ lô̌khô nata̤cǒta̤tè̤ awe̤akè.

⁸ Cǒmara tûjû̌pwa̤ mî̌ a sǎyṳgwèbǎ, ma̤bwǐma̤sîrî kòyò. A sǎphlǒhtû lǒbe kû̌ ta̤mô̤ dǒ ahǎbòjò tô̤̌.

⁹ Cǒmara tûjû̌pwa̤ mî̌ a ma̤wô̌ ta̤ dǒ kòyò pṳ̂̌ tôpwa̤ aya. A sǎyṳgwèbǎǐ tû̌ lǒ̤bò ta̤ dǒ a bô̌lò̤.

¹⁰ Ǒ Cǒmara tûjû̌pwa̤, lǒ̤bò ta̤ dǒ na bô̌lò̤ tokhlǒ gǔ htû̌sò̌htò̌bò na. Lǒ̤bò nakòyò cǒtè̤ ayô̤̌ sîtokhlǒ gǔ hî̌bwǐhî̌sîrî na.

^11-12 Pô̤̌khô kòyò pṳ̂̌ tôpwa̤ gǔ sî̌ganǎ̤bò nata̤ma̤, nata̤pô̤ta̤phǎ kû̌ nashilǎ̤gǎkû ata̤sîdû̌sîrîhtû ayanu, asî shôbǐǐbò nashilǎ̤gǎkû ata̤sîdû̌sîrîhtû awe̤akè. Asî shôbǐǐ lô̌khô nata̤pô̤ta̤phǎ awe̤akè.

¹³ Nashilǎ̤gǎkû numî̌ a ô̌gleshomě tûjû̌pwa̤, na pǒǐbò kòyò tôhtu hto tôhtu. Cǒmara tûjû̌pwa̤ mî̌ acǒtè̤ kû̌ ata̤olò̤ lǒ̤bò, a ma̤ta̤ pṳ̂̌ tôcǒ kû̌ ata̤mô̤ dǒ ahǎbòjò tô̤̌.

¹⁴ Cǒmara tûjû̌pwa̤ ma̤jè̌ kòyò ô̌ dǒ ta̤pò̤̌ta̤shakû. A ma̤jè̌ kòyò dǒ ashò̌lò̤ asǎphlǒ.

¹⁵ Ta̤ dǒ ata̤htûpwa̤ ô̌ pṳ̂̌ tôcǒ kè̌shu sǎmǒ nǎla̤htò̌ dǒ naô̌. Bǎ ta̤shěta̤khǎ bǎnu na dǐǎdǐô asî.

¹⁶ Na yṳ̂̌htò̌ nacǔde dě na dǐǎdǐô, na ma̤lǒma̤be bǎ bò ta̤ dǒ ata̤htûpwa̤ ô̌ pṳ̂̌ tôcǒ ata̤sǎyṳ.

¹⁷ Cǒmara tûjû̌pwa̤ ma̤tô̤ma̤bǎ ta̤pṳ̂̌ tôcǒ dě a ma̤ta̤ pṳ̂̌ tôcǒ kû̌ ata̤mô̤ dǒ ahǎbòjò tô̤̌.

¹⁸ Lǒ̤bò kòyò dǒ akwisǎyṳhtò̌ Cǒmara tûjû̌pwa̤ kû̌ sǎphlǒcǒsǎphlǒtè̤ tokhlǒnu Cǒmara ô̌phǔtinǐ̤ kû̌ asî.

¹⁹ A ma̤lǒma̤be bǎ bò kòyò dǒ a ǐsha dě bè̌dubè̌nǎ̤ lû̌ nutokhlǒ ata̤sǎyṳ. A ganǎ̤de asî kwisǎyṳhtò̌ ta̤ma̤jè̌ dě a ma̤hǎplǎ asî.

²⁰ Cǒmara tûjû̌pwa̤ takabǐǐ lǒ̤bò kòyò dǒ a mô̤ǐ lû̌û. A gǔ ma̤pî̌kè lǒ̤꤮ bò kòyòphû̌mò̤̌.

²¹ He gǔ htû̌sò̌htò̌ Cǒmara tûjû̌pwa̤. Lǒ̤꤮ bò ta̤ dǒ a bô̌lò̤ tokhlǒ nutô htû̌sò̌htò̌ Cǒmara mi̤plò̌shǐ tûjû̌pwa̤ talakhǎ.