Htû̌sò̌htò̌ 143 - Kawyaw New Testament

Ta̤kwicaba dǒ ta̤ma̤jè̌ aya

Khwǐdawi̤ ata̤sǎwǐ htû̌sò̌htò̌

¹ Ǒ꤮ Cǒmara tûjû̌pwa̤, ganǎ̤de kû̌ heta̤kwicaba, heta̤kwigwèbǎhtò̌ na ta̤ma̤jè̌nu. Na cǒtè̤ kû̌ nayô̤̌, na ô̌ kû̌ ta̤cǒta̤tè̤ akhû̌akhî, hî̌shǔ mò̌ he.

² No tǒ̤ tǎ̤ napwa̤ma̤ta̤phû̌ amè̤̌ he dǒ ta̤cî̌htò̌ gûlǎ̤ tǎ̤mǎ̤. Dǒ nalô̤mô̤̌nu, kòyòcǒkòyòtè̤ ô̌ tôpwa̤ tô̤̌.

³ Pwa̤sǎkhě he tokhlǒ lṳ̂pṳ̂̌ he dě a shò̌lò̤khǔpo̤ he. A no ô̌htûpwa̤ he dǒ ta̤khǐta̤lo̤kla asô̌sô̌kû̌ kòyò dǒ a sihto yî̤̌kè nutokhlǒ.

⁴ He sǎphlǒpî̌ jî̌jû̌ mî̌ca. Asǎgònò̤̌ ǐsha mî̌ca he dě he gònò̤̌gòglè.

⁵ He gènè̤htò̌ǐ lṳmṳ̌ni̤lṳmṳ̌sa dǒ atûlû̌ hto nutokhlǒ. He gènè̤ǐ lǒ̤bò ta̤ dǒ na ma̤ hto nutokhlǒ. He gènè̤ tě̤tě̤mè̤̌mè̤̌ lǒ̤bò ta̤ dǒ na ma̤ kû̌ nacǔde nutokhlǒ.

⁶ He yṳ̂̌htò̌ hecǔde dě he kwicaba. He kè̌shu na asô̌sô̌kû̌ hǎkhwedǎtrè̌ kè̌shuǐ khwè̌junu.

⁷ Ǒ꤮ Cǒmara tûjû̌pwa̤, he sǎphlǒpî̌ mî̌ca akhû̌akhî, hî̌shǔ mò̌ he. Kè̌khô̌kè tǎ̤ he mǎ̤. Kè̌mè̤̌tô̤̌ hî̌mî̌, he sô̌sô̌kè pwǎ kû̌ kòyò dǒ a lò̤tě̤ dǒ lṳ̌gǎnǎdokû nutôpwa̤.

⁸ He nǎla̤ǐ dǒ naô̌ akhû̌akhî, pṳ̂̌wô̤̌wô̤̌꤮ ǐ sî̌yahtò̌ he kû̌ nata̤mô̤ dǒ ahǎbòjò tô̤̌nu. He ǐlò̤ henǎ̤ dǒ nacudekû akhû̌akhî, he tôbǎ ma̤ hětènunè̌klè̌nè̌klò he.

⁹ Ǒ꤮ Cǒmara tûjû̌pwa̤, ma̤hǎplǎkè he dǒ pwa̤sǎkhě he tokhlǒ acǔdekû. He khlè̌hè ô̌tûdû hǒ dǒ naô̌.

¹⁰ Na mî̌ he Cǒmaradû̌ akhû̌akhî, pô̤̌ na sǎyṳ no ma̤ henu sû̌ǐtòwòǐ he. Na yôla dǒ a ma̤bwǐma̤sîrî kòyònua gǔ sûcû̌ tû̌ he dǒ klè̌cǒklè̌tè̤nu nî̌.

¹¹ Ǒ Cǒmara tûjû̌pwa̤, dǒ ta̤bè̌dubè̌nǎ̤ǐ nami̤ sîrîdû̌sîrîhtû ayanu, ǐ ô̌htûpwa̤ pô̤̌ he. Nacǒnatè̤ akhû̌akhî, ma̤hǎplǎ he kû̌ ta̤pò̤̌ta̤sha.

¹² Pô̤̌ na ô̌ kû̌ ta̤mô̤ dǒ ahǎbòjò tô̤̌ numa̤si mè̤mè̤̌ kèbò pwa̤sǎkhě henu. He mî̌ napwa̤ma̤ta̤phû̌ akhû̌akhî, ma̤pî̌ma̤kè kèbò bǎ he lǒ̤bò kòyò dǒ a ma̤jî̌ma̤jû̌ he nutokhlǒ.