Htû̌sò̌htò̌ 142 - Kawyaw New Testament

Ta̤kwicaba dǒ ta̤ma̤jè̌ aya

Hǒmî̌ Khwǐdawi̤ ata̤sǎwǐ kû̌ dǒ Hebrǔyô̤̌ nu, a kaǎ ta̤sǎwǐnu kû̌ Masakǐla ta̤sǎwǐ dě ta̤sǎwǐ nutôshǒ mî̌ bǎ aô̌ dǒ lǒ̤kû dě a kwicaba akhanu, a sǎwǐ ta̤sǎwǐ nutôshǒ.

¹ He kwihtò̌ ta̤ma̤jè̌, ta̤sǎyṳ dǒ Cǒmara tûjû̌pwa̤ a ô̌.

² He pwe̤ǐ shôbǐǐlṳ̌ lǒ̤bò heta̤kookasha, heta̤pò̤̌ta̤sha dǒ lû̌lô̤mô̤̌.

³ Bǎ hesǎphlǒpî̌ mî̌ca akhanu, pwa̤ dǒ a sî̌ganǎ̤ heklè̌ numî̌ tǒ̤ natôpwa̤ pwǎ. He cû̌ bǎtètè̌ bǎbǎ pwa̤sǎkhě he tokhlǒ dò̌nǎ he kû̌ yṳglǒ.

⁴ Ǒ Cǒmaradû̌, kè̌mò̌ dǒ he cǔtamû tôkhô, pwa̤ma̤jè̌ he, pwa̤takabǐ he, pwa̤kè̌khwè̌ǐ henu a ô̌ tôpwa̤ tô̤̌.

⁵ Ǒ Cǒmara tûjû̌pwa̤, he kwisǎyṳhtò̌ na. He hî̌ kû̌, “Na mî̌ pwa̤takabǐ he, dǒ heta̤ô̌htûpwa̤ akûnu he sǎmǒ nǎla̤ǐ pwǎ tǒ̤ na.”

⁶ He khû̌shiǎjǎ tûlû̌ akhû̌akhî, ganǎ̤de kû̌ heta̤kwigwèbǎhtò̌ na. Pwa̤ma̤jî̌ma̤jû̌ kòyò tokhlǒ shû̌shokhò̌sho mî̌ca dǒ heya akhû̌akhî, ma̤hǎplǎkè he dǒ asîcǔdekû.

⁷ Pô̤̌khô he gǔ htû̌sò̌htò̌ bò̌ nami̤ ayanu, ma̤hǎplǎ he dǒ apô̤kûnu. Na wô̌mî̌ca bǎ dǒ heya akhû̌akhî, kòyòsǎphlǒwô̌ tokhlǒ ô̌te̤we̤ bò kû̌ he.