Htû̌sò̌htò̌ 141 - Kawyaw New Testament

Ta̤kwicaba dǒ ta̤takabǐ aya

Khwǐdawi̤ ata̤sǎwǐ htû̌sò̌htò̌

¹ Ǒ꤮ Cǒmara tûjû̌pwa̤, he kwisǎyṳhtò̌ na, ma̤jè̌ phwèmò̌ he. He kwihtò̌ nata̤ma̤jè̌ akhanu, ganǎ̤de kû̌ he.

² He ta̤kwihtò̌ nanuno htûtû̌ a kû̌ ta̤numò̤̌wǐ. He yṳ̂̌htò̌ cǔde dě kwicabahtò̌ nanu a gǔ ma̤mô̤sû̌mô̤sò̌ tû̌ nasǎphlǒ pô̤̌꤮ lṳmṳ̌hǎ ata̤lṳhtò̌ nunî̌.

³ Ǒ꤮ Cǒmara tûjû̌pwa̤, pǒǐ heta̤hî̌bǎ, ô̌pṳ̂̌kè̌ǐ hekhû̌phě.

⁴ No cû̌ ma̤ tǎ̤ he ta̤phû̌mò̤̌shǐhtô mǎ̤, mè̤̌tô̤̌dě no cû̌ ma̤phû̌mò̤̌shǐhtô wô̤̌wô̤ pû he kû̌ kòyòphû̌mò̤̌ nutokhlǒ mǎ̤. No ǎcuôcu kû̌ tǎ̤ he kû̌ asî shǎǎshǎô numǎ̤mǎ̤.

⁵ No plè he kû̌ kòyòcǒkòyòtè̤ nu, hǒmî̌ a gǔ htû ta̤ma̤mô̤ma̤wô̌ dǒ heya. No sû̌ǐtô he kû̌ a nu, hǒmî̌ asô̌sô̌kû̌ kòyò plṳ̌ mò̤û̌shi dǒ heikǒlô̤. He htè̌shěshu nô̌ asî ta̤sû̌ǐtòwòǐ tô̤̌. heta̤kwicaba nu a shěshǔshu mè̤̌caca pwa̤ma̤ta̤phû̌mò̤̌shǐhtô nutokhlǒ a ta̤ma̤.

⁶ Bǎ kòyò wîtě̤kè pwa̤pǒ asî nutokhlǒ dǒ lǒ̤plò̤kla akhanu, asî gǔ sî̌ganǎ̤ kû̌ heta̤hî̌bǎ tokhlǒ numî̌ atô.

⁷ Asî akhwǐakhû̌ tokhlǒ lûcû̌peshe nṳ̌ bò dǒ lṳ̌gǎnǎdo sô̌sô̌ kû̌ kòyò po̤mǔ lǒ̤nu.

⁸ Ǒ꤮ Cǒmara tûjû̌pwa̤ he Běcǎ Cǒmara tûjû̌pwa̤, he kè̌shǔ nǎla̤ǐ tǒ̤꤮ na pwǎ. Na mî̌ he lǎ̤ô̌tûdû agûlǎ̤, no ma̤si kè tǎ̤ he kû̌ asî mǎ̤.

⁹ Takatě̤tṳ̌ǐ he kû̌ sumṳ dǒ asî dò̌nǎ he, sumṳ dǒ kòyòphû̌mò̤̌ dò̌nǎ he nutokhlǒ.

¹⁰ Bǎ na ma̤hǎplǎ he akhanu, no po̤bò̌ lǒ̤bò gesô̌ asî kû̌ anò̌glô tûû̌ nutokhlǒ.