Htû̌sò̌htò̌ 140 - Kawyaw New Testament

Ta̤kwicaba dǒ lǎ̤takabǐ aya

Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû nutôpwa̤ aya

¹ Ǒ Cǒmara tûjû̌pwa̤, ma̤hǎplǎkè he dǒ kòyòphû̌mò̤̌ tokhlǒ acǔdekû. Takaǐ he dǒ pwa̤ma̤jî̌ma̤jû̌ kòyò tokhlǒ acǔdekû.

² Asî gènè̤ma̤ còcè̌꤮ ta̤phû̌mò̤̌shǐhtô. Pṳ̂̌ni̤ni̤꤮ a ma̤htûhtò̌ còcè̌ ta̤shěta̤pě̤.

³ Asîplî̤ nu asô̌sô̌ kû̌ wṳ̂̌sa. Asî ta̤hî̌bǎ tokhlǒnu awè̤̌ asô̌sô̌kû̌ wṳ̂̌sa pè̌ kòyò dě awè̤htò̌.

⁴ Ǒ Cǒmara tûjû̌pwa̤, kòyò phû̌mò̤̌, pwa̤ma̤jî̌ma̤jû̌ kòyò tokhlǒ gǔma̤pò̤̌ma̤sha lô̌khô he akhû̌akhî, takabǐǐ he.

⁵ Kòyò bè̌dû̌bè̌htò̌yô̤̌ anǎ̤ tokhlǒ dò̌nǎhǔ he kû̌ sumṳ. Asî dò̌nǎ bò sumṳ dǒ he lǎ̤cû̌ klè̌ nutôbô akû. Asî dò̌nǎ cû̌sělě sumṳ dǒ klè̌lô̤.

⁶ He hî̌ Cǒmara tûjû̌pwa̤ kû̌, “Na mî̌ he Cǒmara.” Ǒ꤮ Cǒmara tûjû̌pwa̤, ganǎ̤de kû̌ he kwihtò̌ nata̤ma̤jè̌.

⁷ Ǒ꤮ Cǒmara tûjû̌pwa̤, he Běcǎdû̌, na mî̌ apô̤phǎshû̌sho dǒ pwa̤ma̤hǎplǎge he. Na takaǐ he dǒ ta̤shěta̤pě̤ akû.

⁸ Ǒ꤮ Cǒmara tûjû̌pwa̤, jû ma̤tǎ̤ kòyòphû̌mò̤̌ nutokhlǒ pô̤̌ a sǎyṳma̤ nutǎ̤mǎ̤. No htûhtò̌dû̌htò̌ tǎ̤ asî ata̤gènè̤nǎ nutokhlǒ tǎ̤mǎ̤, hî̌pě asî phǐdû̌phǐhtò̌yô̤̌bò anǎ̤ hè̌.

⁹ No ma̤pè̤̌kè tǎ̤ pwa̤sǎkhě he tokhlǒ mǎ̤. Asî hî̌ gònògòglè ǐsha he tokhlǒnu no khòbǎ gesô̌ tû̌ asî.

¹⁰ No lò̤tě̤ tû̌ mî̌klû̌ gè̌wô̌ dǒ asîlô̤. Kòyò gǔ wîtě̤nṳ̌ kè asî dǒ mî̌kû mè̤̌tô̤̌mî̌ dǒ hǎkûyô̤̌nunî̌. No ihtǒbò̌ pe tǎ̤ asî mǎ̤.

¹¹ Bǎ hǎkhû̌nu, no ǎbǎô̌bǎ tǎ̤ kòyò dǒ a hî̌jî̌hî̌jû̌ kòyò nutokhlǒ mǎ̤. No ma̤pò̌ kè mò̌ pwa̤ma̤jî̌ma̤jû̌ kòyò nutokhlǒ kû̌ ta̤pî̌ta̤lṳ̂̌dû̌nu.

¹² He sî̌ganǎ̤ kû̌ Cǒmara tûjû̌pwa̤ ma̤jè̌ kòyò dǒ kòyò ma̤jî̌ma̤jû̌ asî nutokhlǒ. A ma̤tô̤ma̤bǎ bǎ kòyò dǒ a shôdô pwa̤ma̤jè̌ tokhlǒ.

¹³ Kòyòcǒkòyòtè̤ tokhlǒ gǔ htû̌sò̌htò̌ mè̤̌mî̌ca nami̤. Asî gǔ ô̌htûpwa̤ dǒ nalô̤mô̤̌.