Htû̌sò̌htò̌ 14 - Kawyaw New Testament

Kòyòhǎkhû̌phû̌ ata̤phû̌mò̤̌shî̌htô

Khwǐdawi̤ ata̤sǎwǐ htû̌sû̌htò̌. Ta̤sǎwǐ mî̌ pwa̤sǎwǐ ta̤ tokhlǒ aikǒ dǒ ta̤lṳhtò̌hôkû nutôpwa̤ aya.

¹ Kòyò nòdû̌ hî̌ lô̌khô dǒ asò̌phlǒkû kû̌, “Cǒmara ô̌tô̤̌.” Asî ata̤bè̌sǎphlǒsû̌shi mî̌ aphû̌mò̤̌shǐhtô, ata̤phî̌ta̤ma̤ mî̌ aphû̌mò̤̌shǐhtô. Dǒ asî klanu, a ma̤ ta̤wô̌ ô̌pe tôpwǎ̤꤮ tô̤̌.

² Pô̤̌khô Cǒmara tûjû̌pwa̤ gǔ sî̌ya kû̌ kòyò dǒ a ô̌htûpwa̤ tě̤mè̤̌, kòyò dǒ a kè̌lǎ lû̌ûnu a ô̌ ya ô̌tô̤̌yanu, a ô̌ dǒ mǒkhû̌ kè̌lò̤ kòyò hǎkhû̌phû̌.

³ Bǎbǎkǎlè kòyò pṳ̂̌꤮ tapwa̤ cû̌tephebò kû̌ Cǒmaradû̌. Asî htûkèbò kòyòphû̌mò̤̌. Kòyò dǒ a ma̤ ta̤wô̌nu a ǒpe tôpwǎ̤꤮ tô̤̌, tôkûtôpwa̤ pwǎnu, aô̌ tô̤̌.

⁴ Cǒmara tûjû̌pwa̤ gwè̌ kû̌, “Kòyòphû̌mò̤ lǒ̤bò꤮ tokhlǒ, a kè̌lǎsî̌ya gû̌ bǎ kò tôkhò̌꤮ tô̤̌ya?” “Asî hè ǎ bò he kòyò dǒ a ganǎ̤de heyô̤̌ nutokhlǒ sô̌sô̌kû̌ a ǎ mû̌nu.” “Asî kwicabahtò̌ he tôkhò̌꤮ tô̤̌.”

⁵ Pô̤̌nudě asî bǎ kè̌shǐtṳ̌bǎ kû̌ ta̤sò̌gònò̤̌ ǐsha dû̌꤮ pě. Bǎbǎkǎlè Cǒmara ô̌kû̌ kòyòcǒkòyòtè̤.

⁶ Kòyòphû̌mò̤̌ nutokhlǒ ma̤pî̌ma̤lṳ̂̌ kèbò kòyòshôphû̌shèwè̤phû̌ ata̤yè̤lò̤nǎ. Cǒmara tûjû̌pwa̤ mî̌ kòyòshôphû̌shèwè̤phû̌ alǎ̤ô̌tûdûbǐ agûlǎ̤.

⁷ He kwicaba lǒ̤sû̌lǒ̤sò̌ kû̌ ta̤ma̤hǎplǎge dǒ Isôrělaphû̌ ayanu, a gǔ ô̌ dǒ Sǐû khôlôkhû̌ hèlò̤ pě nî̌. Htû̌꤮ Cǒmara tûjû̌pwa̤ kaǎplǒbò sô̌ akòyò dǒ kò pṳ̂̌cû̌kè lû̌û nutokhlǒ akhapěnu, Phaya̤kò akhlialè sǎlě̤sǎlò̤, Isôrělaphû̌ glè̌ sû̌mô̤sò̌mô̤ pě.