Htû̌sò̌htò̌ 139 - Kawyaw New Testament

Cǒmara ô̌cu kû̌ pa pṳ̂̌ tôplǎ

Khwǐdawi̤ ata̤sǎwǐ htû̌sò̌htò̌. Ta̤sǎwǐ hǒomî̌ ta̤sǎwǐ ta̤ tokhlǒ a ikǒlǒkò dǒ ta̤lṳhtò̌hôkû nutôpwa̤ aya.

¹ Ǒ Cǒmara tûjû̌pwa̤, na ma̤kè̌kè̌ hesǎphlǒ, na sî̌ganǎ̤ lǒ̤bò hewe̤hekè.

² He hǎnòò̌ bǎbǎ, he ihtǒ bǎbǎ, na sî̌ganǎ̤ lǒ̤bò. Na ô̌ dǒ mǒkhû̌ bǎbǎ, na sî̌ganǎ̤ lǒ̤bò heta̤gènè̤.

³ He cû̌ bǎtè bǎbǎ, he ô̌kǔ bǎtè bǎbǎ, na kè̌shǐbò. He ma̤ titètè̌ bǎbǎ na sî̌ganǎ̤bò.

⁴ Ǒ Cǒmara tûjû̌pwa̤, he hî̌bǎhtò̌ hǐ tômṳ̂̌ tô̤̌ bǎbǎkǎlè na sî̌ganǎ̤ ô̌nǎ htobò hǒ.

⁵ Na ô̌pṳ̂̌kè̌ǐ he, na tugutakaǐ he kû̌ nacǔde dǒ apô̤phǎshû̌sho.

⁶ Na ta̤sî̌ta̤jò̌nu a cô̌klǐcô̌sè mî̌ca dǒ heya. He sî̌ganǎ̤ htû pe tô̤̌ hǒ.

⁷ He gǔ cû̌tephe jò kû̌ na hî̌tè? He gǔ kòyòcû̌tephekèjò kû̌ na hî̌tè?

⁸ He htò̌ dǒ mǒkhû̌ bǎbǎ na ô̌ bǎnu. He lò̤tě̤ dǒ lṳ̌gǎnǎdo bǎbǎ na ô̌ bǎnu.

⁹ He wi̤ cû̌ dǒ lṳmṳ̌htò̌ tôkhô bǎbǎ, he cû̌lò̤ô̌kû̌ dǒ lṳmṳlò̤ nutôkhô bǎbǎ,

¹⁰ Nacǔde gǔ pǒsûcû̌ǐ he. Nata̤sîrîpô̤phǎ gǔ ma̤jè̌ tûû̌ he.

¹¹ He kè̌ hî̌ kû̌, “Ta̤khǐ ô̌bǐtewe̤ lǒ̤bò he, ta̤lî dǒ aô̌te̤we̤ he htûhtò̌bò ta̤khǐ,” mî̌,

¹² Dǒ ta̤khǐsiwi̤ akû cǒ bǎbǎ he ô̌hǔô̌sè̌ jò nô̌ nalǎ̤ tô̤̌. Lṳmṳ̌khǐ nuata̤lî sô̌sô̌kû̌ lṳmṳ̌sha, ta̤khǐ bǎbǎ, ta̤lî bǎbǎ, dǒ naya nuasô̌sô̌bò lû̌û pwǎ.

¹³ Pwa̤ dǒ a bô̌lò̤ henǎ̤glǒkrǐkrû̌ lǒ̤ bò mî̌ na hǒ. Na bè̌ô̌ icuwô̌ he dǒ hemǒ̤hǐphukû.

¹⁴ Na bô̌lò̤ henu a sû̌pi̤sò̌pi̤ ǒò̌ kati̤kaa, a cô̌klǐcô̌sè jî̌le akhû̌akhî, he hî̌bwǐhî̌sîrîhtò̌ na. He sî̌ganǎ̤ tě̤tôbò kû̌ Cǒmara ma̤ ta̤ lǒ̤bò numî̌ acô̌klî̌cô̌sè.

¹⁵ Bǎ hekhwǐhekhû̌ tokhlǒ htûhtò̌ tṳ̌plǒhǔ dǒ hemǒ̤hǐphukû akhanu, na kè̌shǐ lǒ̤bò hekhwǐhekhû̌.

¹⁶ He ô̌ pe pwǎ dǒ hemǒ̤ hǐphukû bǎbǎkǎlè na kè̌shǐ he. Bǎ he ô̌lò̤ khôtô̤̌ akhanu, na ma̤mǎma̤dònǎ lǒ̤bò heta̤ô̌htûpwa̤ lṳmṳ̌ni̤ lṳmṳ̌sa dǒ nalî̤bǎkû.

¹⁷ Ǒ Cǒmaradû̌, nata̤gènè̤ nuahtǒayô̤̌ jî̌le dǒ heya. Nata̤gènè̤ tokhlǒ mî̌ dô̌bòpè̤̌ pe tô̤̌.

¹⁸ He kè̌ dô̌kè̌ nata̤ma̤ tokhlǒ mî̌, a ô̌dû̌wî̤ klope kû̌ lǒ̤simǐ. He hǎmôô̌ dě he sî̌ya akhanu, he ô̌ kû̌ na.

¹⁹ Ǒ Cǒmaradû̌, he sǎyṳ no ma̤si kèbò na kû̌ kòyòphû̌mò̤̌. Kòyò dǒ a ma̤si kòyò tokhlǒ, no cû̌ tapheyi̤ kèmò̌ kû̌ he.

²⁰ Ǒ Cǒmaradû̌, pwa̤sǎkhě na tokhlǒ hî̌bǎ takǎ lǒ̤bò na. A hî̌ phû̌mò̤̌bò lô̌khô nami̤.

²¹ Ǒ Cǒmara tûjû̌pwa̤, he tôbǎ sǎkhě nô̌ kòyò dǒ a sǎkhě na nutokhlǒ tô̤̌ya? He tôbǎ ma̤yǒ̤khû̌khwè nǒ kòyò dǒ a shěshǔ na nutokhlǒ tô̤̌ya?

²² He sǎkhě mè̤̌caca asî, he bè̌ asî pô̤̌ pwa̤sǎkhě henu.

²³ Ǒ Cǒmaradû̌, ma̤kè̌kè̌ he dě sî̌ganǎ̤ tû̌ hesǎphlǒ. Ma̤kè̌kè̌ he dě sî̌ganǎ̤ bò heta̤gènè̤.

²⁴ He cû̌ dǒ klè̌phû̌mò̤̌shǐhtô ya mè̤̌tô̤̌yanu, kè̌mò̌ he dě sûcû̌ he dǒ klè̌ tûjû̌pwa̤ talakhǎ akû.