Htû̌sò̌htò̌ 136 - Kawyaw New Testament

Ta̤htûsò̌htò̌ǐ Cǒmara ata̤mô̤ dǒ ahǎbòjò tô̤̌

¹ Cǒmara tûjû̌pwa̤ wô̌ mî̌ca, hî̌bwǐhî̌sîrîhtò̌ lô̌khô lû̌û. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

² Hî̌bwǐhî̌sîrîhtò̌ Cǒmaradû̌ dǒ asîrîpô̤phǎ lǒkhlo kû̌ Cǒmara dǒ ashǐshawa̤ tokhlǒ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

³ Hî̌bwǐhî̌sîrîhtò̌ Běcǎdû̌ dǒ asîrîdû̌sîrîhtû lǒkhlo kû̌ Běcǎ dǒ ashǐshawa̤ tokhlǒ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

⁴ Pwa̤ dǒ a ma̤jò ta̤cô̌klî̌cô̌sè numî̌ tǒ̤ Cǒmara pwǎ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

⁵ Cǒmara mî̌ pwa̤ dǒ a bô̌lò̤ mǒkhû̌ kû̌ ata̤sî̌yaphlôphǎ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

⁶ A mî̌ pwa̤ dǒ a dalò̤ hǎkhû̌ dǒ shidû̌tawe̤kû. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

⁷ A mî̌ pwa̤ dǒ a bô̌lò̤ lṳmṳ̌, la kû̌ shǎ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

⁸ A mî̌ pwa̤ dǒ a no pǒǐ lṳmṳ̌ kû̌ lṳmṳ̌sha. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

⁹ A mî̌ pwa̤ dǒ a no pǒǐ la, shǎ kû̌ lṳmṳ̌khǐ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

¹⁰ Cǒmara mî̌ pwa̤ dǒ a ma̤si kèbò Ijǐgǎ phû̌wè̤̌pwǎ̤ tokhlǒ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

¹¹ A mî̌ pwa̤ dǒ a kaǎge Isôrě̤lakhlilèphû̌ tokhlǒ dǒ Ijǐgǎ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

¹² A mî̌ pwa̤ dǒ a kaǎhtò̌ asî kû̌ acǔde dǒ asîrîshû̌sho, acǔgô̌ dǒ asîrîpô̤phǎ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

¹³ A mî̌ pwa̤ dǒ a ma̤phò̌ shidû̌shitewe̤li̤ ginǐ̤khô. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

¹⁴ A mî̌ pwa̤ dǒ a no jûlò̤phlǔ Isôrě̤lakhlilè tokhlǒ dǒ shidû̌shitewe̤li̤ aklǎmakû. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

¹⁵ A mî̌ pwa̤ dǒ a ma̤lò̤cǔsi kèbò Ijî̌gǎkhwǐ kû̌ akliphû̌ tokhlǒ dǒ shidû̌shitewe̤li̤kû. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

¹⁶ A mî̌ pwa̤ dǒ a sûcû̌tûlûbò̌kè a kòyò tokhlǒ kû̌ gǎshashigǎkhû̌. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

¹⁷ Cǒmara mî̌ pwa̤ dǒ a ma̤pè̤̌kè khwǐ dǒ a ta̤suwi̤sòwò̤ tokhlǒ. Ata̤mô̤ dǒ ahǎbòjò tô̤̌ nu, a ô̌měô̌gle tûjû̌pwa̤.

¹⁸ A mî̌ pwa̤ dǒ a ma̤sikè khwǐ dǒ asîrîdû̌sîrîhtû tokhlǒ. Ata̤mô̤ dǒ ahǎbòjò tô̤̌ nu, a ô̌měô̌gle tûjû̌pwa̤.

¹⁹ A mî̌ pwa̤ dǒ a ma̤sikè Amò̤rǐkhlilèphû̌ khwi Khwǐsǐhû. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

²⁰ A mî̌ pwa̤ dǒ a ma̤sikè Bashagǎkhwǐ Khwǐûbǎ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

²¹ A mî̌ pwa̤ dǒ a ǐ khwǐ nutokhlǒ ahǎkhû̌ kû̌ a kòyò tokhlǒ aya û̌cata̤bǐ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

²² Û̌cata̤bǐ hǒo, abè̌kè kû̌ apwa̤ma̤ta̤phû̌ Isôrě̤lakhlilèphû̌. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

²³ Bǎ pa khû̌shiǎjǎ jî̌le akhanu, Cǒmara shôpe̤ nô̌ pa tô̤̌. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

²⁴ A mî̌ pwa̤ dǒ a ma̤hǎplǎkè pa dǒ pwa̤sǎkhě pa tokhlǒ acǔdekû. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

²⁵ A mî̌ pwa̤ dǒ a ǐ ta̤bǎbô̌ dǒ ata̤htûpwa̤ ô̌ lǒ̤bò alǎ̤ǎlǎ̤ô aya. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

²⁶ Hî̌bwǐhî̌sîrîhtò̌ Cǒmaradû̌ dǒ a pǒǐ mǒkhû̌ nutôpwa̤. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.