Htû̌sò̌htò̌ 135 - Kawyaw New Testament

Lî̤sǎwǐ htû̌sò̌htò̌

^1-2 Ǒ꤮ pwa̤ ô̌ dǒ Cǒmara tûjû̌pwa̤ ahǐ, pa Cǒmaradû̌ ata̤lṳhtò̌hôkû tokhlǒ sî꤮, htû̌sò̌htò̌ Cǒmara tûjû̌pwa̤, htû̌sò̌htò̌ mò̌ lû̌mi̤. Cǒmara tûjû̌pwa̤ apwa̤ma̤ta̤phû̌ sî꤮, htû̌sò̌htò̌ mò̌ lô̌khô.

³ Cǒmara tûjû̌pwa̤ mî̌ awô̌ mî̌ca akhû̌akhî, htû̌sò̌htò̌ mò̌ lû̌û. A sǎphlǒwô̌꤮ mî̌ca akhû̌akhî, sǎwǐhtûsò̌htò̌ mò̌ ami̤.

⁴ Cǒmara tûjû̌pwa̤ rû̌htò̌ hǒ Phayakò akhlialè tokhlǒ kû̌ aya tûû̌. A rû̌htò̌ Isôrě̤la khlilèphû̌nu kû̌ alě̤dû̌pwî̤htû.

⁵ He sî̌ganǎ̤ kû̌ Cǒmara tûjû̌pwa̤ mî̌ asîrîpô̤phǎ. Paběcǎdû̌ mî̌ adû̌ahtû lǒ꤮ khlo kû̌ Cǒmara dǒ ashǐshawa̤ tokhlǒ lǒ̤꤮ bò.

⁶ Dǒ mǒkhû̌ nobǎbǎ, bǎ hǎkhû̌nu bǎbǎ, dǒ shidû̌tawe̤kû bǎbǎ, dǒ shidû̌shite̤we̤ kòda nubǎbǎ, Cǒmara tûjû̌pwa̤ ma̤ lǒ̤bò pô̤̌ a sǎyṳma̤nu.

⁷ A no htò̌ poǒlṳ̌ dǒ mǒgòtṳ̌kòshǐ, a no htûhtò̌ shî̌lî̌bǒbǒ, khwè̌juju. Gilisǎ ô̌ dǒ Cǒmara ala̤bè̌ô̌plǒ gili̤sǎ gûlǎ̤ tokhlǒ a no sǎhè gili̤sǎ.

⁸ Cǒmara tûjû̌pwa̤ ma̤si kèbò Ijǐgǎ phû̌wè̤̌pwǎ̤ kû̌ ta̤phû̌ta̤li̤ wè̤̌pwǎ̤.

⁹ Cǒmaradû̌ dǔlṳ̌ ata̤cô̌klî̌cô̌cè kû̌ ta̤sǔkhǔsǔsò̌ tokhlǒ dě a shěpě̤ Ijî̌gǎkhwǐ kû̌ lǒ̤bò apwa̤ma̤ta̤phû̌ tokhlǒ.

¹⁰ A ma̤pî̌kè dû̌wî̤ mî̌ca khlilèphû̌ tokhlǒ, htokhôtô̤̌ a ma̤sikè khwǐ dǒ a ta̤shû̌ta̤sho tokhlǒ.

¹¹ A ma̤sikèbò Amò̤rǐkhlilè khwi Khwǐsǐhû, Bashagǎkhwǐ khwǐûkǎ kû̌ lǒ̤bò Khanagǎ akhwǐ tokhlǒ.

¹² Asî hǎkhû̌ tokhlǒnu, a ǐ kè kû̌ a kòyò Isarela khlilèphû̌ tokhlǒ kû̌ û̌cata̤bǐ.

¹³ Ǒ꤮ Cǒmara tûjû̌pwa̤, nami̤ mî̌ a ô̌gleô̌mě tajû̌ pwa̤. Ǒ Cǒmara tûjû̌pwa̤, nami̤ gǔ lṳ̌shilṳ̌gǎ tûû̌ tajû̌꤮ pwa̤.

¹⁴ Cǒmara tûjû̌pwa̤ gǔ ô̌cu dǒ a kòyò tôkhô. A gǔ sǎyṳgwèbǎǐ ǐtû̌ apwa̤ma̤ta̤phû̌ tokhlǒ.

¹⁵ Khlilè shǔshawa̤ tokhlǒ a Cǒmara ya̤yô̤ya̤gî̌ mî̌ kòyòhǎkhû̌phû̌ bô̌ lû̌ dě kòyò ma̤pwǎ lû̌ kû̌ ruhta.

¹⁶ Akhû̌phě ô̌ bǎbǎkǎlè a hî̌bǎ jò tô̤̌. Amǐ̤sǎphlǒ ô̌ bǎbǎkǎlè a kè̌shǐjò tô̤̌tô̤̌.

¹⁷ Anò̌ku ô̌ bǎbǎkǎlè a ganǎ̤de jò tô̤̌. Anò̌khî ô̌ bǎbǎkǎlè a sǎhtò̌sǎnṳ̌ jò tô̤̌ ya.

¹⁸ Lǒ̤꤮ bò kòyò dǒ a bô̌ kòyòyô̤ nutokhlǒ bǎbǎ, a nǎla̤ǐ kòyòyô̤ nutokhlǒ bǎbǎ, a gǔ sô̌sô̌ kû̌ kòyòyô̤.

¹⁹ Ǒ꤮ Phaisarěla akhlialè sî, htû̌sò̌htò̌ Cǒmara tûjû̌pwa̤. Ǒ Pha Arṳ̂ akhlialè pwa̤shû̌gǎ sî, htû̌sò̌htò̌ Cǒmara tûjû̌pwa̤.

²⁰ Ǒ꤮ phalewǐ akhlialè sî, htû̌sò̌htò̌ Cǒmara tûjû̌pwa̤. Ǒ꤮ kòyò dǒ a ǐsha bè̌dubè̌nǎ̤ Cǒmara tûjû̌pwa̤ sî, htû̌sò̌htò̌ Cǒmara tûjû̌pwa̤.

²¹ Kòyò gǔ htû̌sò̌htò̌ tûû̌ Cǒmara tûjû̌pwa̤ ô̌ dǒ khôlô Sǐû Wî̤̌yarǔshôlekû nutôpwa̤. Htû̌sò̌htò̌ Cǒmara tûjû̌pwa̤ nî̌꤮.