Htû̌sò̌htò̌ 132 - Kawyaw New Testament

Ta̤htû̌sò̌htò̌ dǒ ta̤lṳhtò̌hô aya

Bǎ kòyò tokhlǒ gehtǒ lô̌khô dǒ Wî̤̌yarǔshôle ta̤lṳhtò̌hôkû akhanu, a sǎwǐ lô̌khô ta̤sǎwǐ nutôshǒ.

¹ Ǒ Cǒmara tûjû̌pwa̤, shôpe̤shônǎ tǎ̤ khwǐdawi̤ kû̌ lǒ̤꤮ bò ata̤khòjî̌khòjû̌ tokhlǒ tǎ̤mǎ̤ nî̌꤮.

² A wṳ̂̌dò ayô̤̌ kû̌ Cǒmara tûjû̌pwa̤, a olò̤ kû̌ Phayakò a Cǒmaradû̌ dǒ apô̤aphǎ nuhǒ.

^3-5 “He kè̌ kè̌shǐ Cǒmara tûjû̌pwa̤ ahǐ khôtô̤̌, htodě he kè̌ shǒǐ bǎ hǐ Phayakò a Cǒmaradû̌ dǒ apô̤aphǎ nutôpwa̤ ahǐ khôtô̤̌ mî̌, he genṳ̌ pe nô̌ dǒ hehǐdǒkû tô̤̌. “He cû̌hǎmôô̌ pe dǒ he lǎ̤môô̌khû̌ tô̤̌, he hǎmôô̌nò pe tô̤̌tô̤̌.”

⁶ Ǒ Cǒmara tûjû̌pwa̤, pa ganǎ̤de ta̤olò̤ atǒplò̌shǐ awe̤akè dǒ Wî̤̌ěphratakû. Pa kè̌shǐ tǒplò̌shǐ nutômè bǎ Wî̤̌jari hǔklakhû̌.

⁷ Pa cû̌ wô̤̌wô̤̌ lû̌û dǒ Cǒmara tûjû̌pwa̤ ahǐ tǎ. Pa cû̌ cabahtò̌ a dǒ agògǒhtò̌yô̤̌lǒ alô̤mô̤̌ tǎ.

⁸ Ǒ Cǒmara tûjû̌pwa̤, ma̤mò̌, hè dǒ nalǎ̤ô̌ agûlǎ̤. Hètǒ̤ kû̌ nata̤olò̤ tǒplò̌shǐ dǒ a ta̤suwi̤sòwò̤.

⁹ Napwa̤lṳhtò̌ta̤ tokhlǒ gǔ ma̤ tûû̌ ta̤cǒta̤tè̤ nî̌. Nakòyò dǒ a cǒtè̤kû̌yô̤̌ tokhlǒ gǔ sǎlě̤sǎlò̤ sǎwǐhtò̌ lô̌khô tûû̌ nî̌.

¹⁰ Pô̤̌ na olò̤ htohǒ napwa̤ma̤ta̤phû̌ khwǐDawi̤ nudě wîkè kèta̤ khwǐ dǒ na rû̌htò̌hto hǒtôpwa̤ tǎ̤mǎ̤.

¹¹ Cǒmara tûjû̌pwa̤ bô̌lò̤ hǒ ayô̤̌ kû̌ khwǐDawi̤. A glè̌ ma̤pî̌ gesô̌ penǒ tôkhò̌ tô̤̌. A hî̌ kû̌, “He no htûhtò̌ nakhlinalè tôpwa̤pwa̤ kû̌ khwǐ dě a gǔ htò̌ pǒnǐ̤ tûû̌ nagûlǎ̤.

¹² “Naphû̌pwa̤khû tokhlǒ kè̌ cǒtè̤ kû̌ heta̤olò̤, heta̤mǎlò̤ dǒ he sû̌ǐlò̤ asî numî̌, asî aphû̌pwa̤khû lò̤tutṳ̌ tokhlǒ gǔ htò̌ hǎnòò̌ nǒ pô̤̌ dǒ nagûlǎ̤ tûjû̌pwa̤.”

¹³ Cǒmara tûjû̌pwa̤ sǎyṳ ma̤htò̌ǐ ahǐ bǎ Wî̤̌sǐû akû nuakhû̌akhî, a rû̌htò̌ htohǒ wî̤̌nutôwî̌.

¹⁴ A hî̌ kû̌, “hǒomî̌ he lǎ̤ô̌ agûlǎ̤ tûjû̌pwa̤. “He sǎyṳ gûlǎ̤ hǒtôkû akhû̌akhî, he gǔ ô̌ bǎo.

¹⁵ “He gǔ ǐshowî̤ wî̤̌ nutôwî̤̌ dě a gǔ ǎbǎô̌bǎ. “He gǔ dǐǎkǒôbe kòyòhǎwě̤shèwè̤ ô̌ bǎ wî̤̌kû nutokhlǒ.

¹⁶ “He gǔ tugutakaǐ apwa̤lṳhtò̌ta̤. “A kòyò dǒ acǒtè̤ kû̌ ayô̤̌ tokhlǒ gǔ sǎlě̤sǎlò̤ sǎwǐsǎshô̌.

¹⁷ “He gǔ no htûhtò̌ khwǐdû̌ dǒ khwǐDawi̤ akhlialè akla tôpwa̤ pě. “He gǔ tiwǐtòwò bǎ khwǐ dǒ he rû̌htò̌ lû̌ nutôpwa̤ nolîhtò̌yǎ sô̌sô̌kû̌ mî̌ko.”

¹⁸ A hî̌bǎhtò̌ kû̌, “He gǔ ma̤sòwò̤kè pwa̤sǎkhě a tokhlǒ. “Ashiagǎ dě a gǔ sîrîshû̌sîrîsho lîkakha asô̌sô̌kû̌ khû̌glohtanu.” pô̤̌nu.