Htû̌sò̌htò̌ 130 - Kawyaw New Testament

Ta̤kwicaba dǒ ta̤ma̤jè̌ aya

Bǎ kòyò tokhlǒ gehtǒ lô̌khô dǒ Wî̤̌yarǔshôle ta̤lṳhtò̌hôkû akhanu, a sǎwǐ lô̌khô ta̤sǎwǐ nutôshǒ.

¹ Ǒ Cǒmara tûjû̌pwa̤, he kè̌shǐbǎ dû̌wî̤ ta̤pò̤̌ta̤sha akhû̌akhî, he kwisǎyṳhtò̌ na ta̤ma̤jè̌.

² Ǒ Běcǎdû̌, ganǎ̤de mò̌ he ta̤kwigwèbǎhtò̌. He kwisǎyṳhtò̌ na nî̌ dò̌ mò̌ he na nò̌ku.

³ Ǒ Běcǎ Cǒmara tûjû̌pwa̤, na kè̌ wě̤mǎnǎ bò ta̤sǔta̤plě tokhlǒ mî̌, Mò̌pè tôpwa̤ khòbò̌ jò na ta̤cî̌htò̌ ya?

⁴ Pô̤̌khô pa ǐsha dě bè̌dubè̌nǎ̤nǐ̤ na nudě na plûkè hto ta̤sǔta̤plě hǒ.

⁵ He ô̌pǒ̤ Cǒmara tûjû̌pwa̤ ata̤ma̤jè̌. He ô̌yṳ̂̌ yṳ̌ǎnǎla̤ǐ alě̤ayô̤̌.

⁶ He ô̌pǒ̤kè̌shuǐ Běcǎdû̌nu a lǒkhlo pe kû̌ pwa̤ô̌pǒ̤ô̌shu ta̤ tokhlǒ kè̌shu lṳ̌mṳ̌lîbû. A lǒkhlo pe kû̌ pwa̤ô̌pǒ̤ô̌shu ta̤ tokhlǒ kè̌shu lṳ̌mṳ̌lîbû.

⁷ Ǒ Isôrě̤laphû̌ sî, Cǒmara ata̤mô̤ numî̌ ahǎbòjò tô̤̌. A sǎphlǒô̌ ma̤hǎplǎkè kòyò pṳ̂̌ tôplǎ akhû̌akhî, kè̌shǔǐ mò̌ Cǒmara tûjû̌pwa̤.

⁸ A gǔ ma̤hǎplǎge a kòyò Isôrě̤laphû̌ dǒ asî ata̤sǔta̤plě lǒ̤bò akû.