Htû̌sò̌htò̌ 127 - Kawyaw New Testament

Gû̌ma̤ Cǒmara ta̤sû̌ta̤tòwò

Bǎ kòyò tokhlǒ gehtǒ lô̌khô dǒ Wî̤̌yarǔshôle̤ ta̤lṳhtò̌hôkû akhanu, a sǎwǐ lô̌khô ta̤sǎwǐ nutôshǒ. Khwǐshalûmû ata̤sǎwǐ htû̌sò̌htò̌.

¹ Cǒmara tûjû̌pwa̤ kè̌ bô̌htò̌ hǐ tô̤̌ mî̌, pwa̤ma̤htò̌ hǐnu, a ma̤ tônô̤ pwǎ. Cǒmara tûjû̌pwa̤ kè̌ ô̌pǒ̤kè̌ǐ wî̤̌ tô̤̌ hî̌mî̌, pwa̤ dǒ a ô̌pǒ̤kè̌ǐ tokhlǒ nu, a ô̌pǒ̤kè̌ǐ tônô̤ pwǎ.

² Ihtǒwṳ̂ hǎmôô̌ salakhǐ dě ǎwè̤ shèwè̤ pwǐtè̌ bǎbǎ, a tṳ̌dèbò pwǎ. Kòyò dǒ Cǒmara mô̤nṳ̌ lû̌ûnu, bǎ a hǎmôô̌ akhanu, Cǒmara kè̌ǐ lû̌û.

³ Phû̌mǒ̤phû̌khû tokhlǒ mî̌ û̌tě̤û̌ca dǒ Cǒmara tûjû̌pwa̤ ǐlò̤. Asî mî̌ Cǒmara asû.

⁴ Bǎ nějǎ pe akha nǐ̤bǎ phû̌ tokhlǒnu, asô̌sô̌kû̌ plǎ̤ ô̌dû̌wî̤ dǒ khli ikǒdû̌ acǔdekû.

⁵ Kòyò dǒ a ô̌lǒô̌beǐ plǎ̤ dǒ amòkû tokhlǒnu a nǐ̤bǎ ta̤ǐshôwî̤. Bǎ asî kè̌shǐshî̌shu kû̌ pwa̤sǎkhě asî tokhlǒ bǎ wî̤̌we̤dû̌ takhahtu akhanu, a sòwò̤̌ nô̌ tôkhò̌꤮ tô̤̌.