Htû̌sò̌htò̌ 122 - Kawyaw New Testament

Ta̤sǎwǐ htû̌sò̌htò̌ kû̌ ta̤kwicaba dǒ Wî̤̌yarǔshôle aya

Bǎ kòyò tokhlǒ gehtò̌ lô̌khô dǒ Wî̤̌yarǔshôle ta̤lṳhtò̌hôkû akhanu, a sǎwǐ lô̌khô ta̤sǎwǐ nutôshǒ. Khwǐdawi̤ ata̤sǎwǐ htû̌sò̌htò̌.

¹ “Pa cû̌wô̤̌wô̤̌ lû̌û dǒ Cǒmara tûjû̌pwa̤ ahǐ tǎ꤮,” kòyò hî̌ he pô̤̌nu akhanu, he sǎlě̤sǎlò̤.

² Ǒ꤮ Wî̤̌yarǔshôle, pa ihtǒô̌ dǒ na wî̤̌takhadû̌kû.

³ Wî̤̌yarǔshôle mî̌ wî̤̌ dǒ a ô̌měô̌gle dě kòyò ma̤tě̤pro̤ jò lû̌û tô̤̌.

⁴ Isôrě̤la khlilèphû̌ amè̤̌kû̌ Cǒmara tûjû̌pwa̤ a kòyò tokhlǒ hè cubucabahtò̌ lô̌khô bǒo. Pô̤̌khô Cǒmara tûjû̌pwa̤ ahî̌lò̤ ayô̤̌nu, asî hè hî̌bwǐhî̌sîrî htû̌sò̌htò̌ lû̌mi̤.

⁵ Pwa̤hto ikǒlǒkò̌dû̌ hǎnòò̌ dǒ gògǒhtò̌yô̤̌lǒ akhû̌, a pǒǐta̤ pô̤̌ ata̤hî̌lò̤nu. A hǎnòò̌ dǒ khwǐdawi̤ akhlialè tokhlǒ agògǒhtò̌yô̤̌lǒ akhû̌.

⁶ Kwicaba bǎ dǒ Wî̤̌yarǔshale lǎ̤ô̌mô̤ô̌bǎ aya. Kòyò dǒ a mô̤ǐ wî̤̌ nutôwî̤̌ ô̌mô̤ô̌bǎ ô̌lǒô̌be bò nî̌꤮.

⁷ Ta̤ô̌mô̤ô̌phiô̌tû̌ dǒ nawî̤̌we̤dû̌ akû nî̌꤮. Ta̤tugutakabǐ ô̌ gû̌ nawî̤̌we̤dû̌ kònò akû nî̌꤮.

⁸ Dǒ hehǐphû̌phòphû̌, hekhôbǒsû̌ ayanu, he gǔ hî̌ kû̌, “Wî̤̌yarǔshale gǔ ô̌tû̌ kû̌ ta̤ô̌mô̤ô̌phi nî̌꤮.”

⁹ Dǒ Cǒmara tûjû̌pwa̤, pa Cǒmaradû̌ ahǐ ayanu, he gǔ kwicabahtò̌ dǒ Wî̤̌yarǔshôle gǔ ô̌mô̤ô̌bǎ ô̌lǒô̌be.