Htû̌sò̌htò̌ 121 - Kawyaw New Testament

Cǒmara tûjû̌pwa̤ mî̌ pwa̤takabǐ pa

Bǎ kòyò tokhlǒ ihtǒ lô̌khô dě Wî̤̌yarǔshôle ta̤lṳhtò̌hôkû akhanu, a sǎwǐ lô̌khô ta̤sǎwǐ hotôshǒ.

¹ He kè̌htò̌ dǒ khôlô tokhlǒ alô̤, he ta̤ma̤jè̌ hèlò̤ bǎtè tôkû pě?

² He ta̤ma̤jè̌ hèlò̤ dǒ Cǒmara tûjû̌pwa̤, pwa̤ dǒ a bô̌lò̤ mǒkhû̌ kû̌ hǎkhû̌ nutôpwa̤ a ô̌.

³ A no tǒ̤ nô̌ na dǒ klè̌sǔklè̌tò̤̌ akû tô̤̌. Pwa̤ dǒ a ô̌pǒ̤kè̌ǐ na nutôpwa̤ a hǎmôô̌ tô̤̌.

⁴ Kè̌ hî̌ mî̌ca nî̌, pwa̤ dǒ a ô̌pǒ̤kè̌ǐ Isôrělaphû̌ nutôpwa̤ hǎmôô̌khwe tô̤̌, a hǎmôô̌ nô̌ tôkhò̌꤮ tô̤̌tô̤̌.

⁵ Cǒmara tûjû̌pwa̤ anǎ̤ sanǎ̤tû̌ ô̌pǒ̤kè̌ǐ na. Cǒmara tûjû̌pwa̤ ô̌ dǒ nakòshǐ pô̤̌ ta̤yô̤ǔ dǒ a ahǔbǐǐ na.

⁶ Lṳmṳ̌sha mî̌ lṳmṳ̌ gû̌lû̌ nǒ na tô̤̌. Lṳmṳ̌khǐ mî̌ la ma̤pò̤̌ma̤sha nǒ na tô̤̌tô̤̌.

⁷ Cǒmara tûjû̌pwa̤ takaǐ na dǒ ta̤phû̌mò̤̌shǐhtô pṳ̂̌꤮ tôcǒ akû. A ô̌pǒ̤kè̌ǐ pô̤̌ na ta̤htûpwa̤.

⁸ Na cû̌ bǎtè꤮ bǎbǎ, na ô̌ bǎtè꤮ bǎbǎ, sahtò̌ khònò̤̌ hènè tûjû̌pwa̤ talakhǎ, a ô̌pǒ̤kè̌ǐ pû na.