Htû̌sò̌htò̌ 119 - Kawyaw New Testament

Cǒmara tûjû̌pwa̤ ta̤sû̌ǐta̤tòwòǐ

¹ Kòyò dǒ a ta̤sǔ ô̌ dǒ Cǒmara tûjû̌pwa̤ alô̤mô̤̌ tô̤̌, a ganǎ̤de Cǒmara tûjû̌pwa̤ ta̤sû̌ǐta̤tòwòǐ tokhlǒnu a nǐ̤bǎ ta̤ǐshôwî̤.

² Kòyò dǒ a gû̌ma̤ pô̤̌ Cǒmara ta̤sû̌ǐta̤tòwòǐ, a kè̌lǎ lû̌û kû̌ sǎphlǒ tômèbò tokhlǒnu a nǐ̤bǎ ta̤ǐshôwî̤.

³ Asî ma̤ ta̤phû̌mò̤̌shǐhtô tôkhò̌ tô̤̌. A gû̌ pô̤̌ Cǒmara aklè̌aklò pwǎ.

⁴ Na hî̌nǎ yô̤̌sǎ kû̌ pa tôbǎ ganǎ̤de tě̤tě̤mè̤̌mè̤̌ bò na ta̤sû̌ǐtòwòǐ.

⁵ He sǎ phlǒshû̌ mî̌ca dǒ he gû̌ma̤ bò na ta̤hî̌bǎlò̤.

⁶ He kè̌ bè̌sû̌bè̌sǎ bò na ta̤mǎlò̤ tokhlǒ mî̌, he gǔ shòwò̤̌ nô̌ tôkhò̌ tô̤̌.

⁷ Bǎ he sî̌ganǎ̤hè na ta̤mǎlò̤ tokhlǒ akhanu, he hî̌bwǐhî̌sîrîhtò̌ na kû̌ ta̤sǎphlǒcǒsǎphlǒtè̤ pě.

⁸ He ganǎ̤de na ta̤mǎlò̤ pě. Khòsǎdô wîkè tǎ̤ he tîkî̌ tǎ̤mǎ̤.

Ganǎ̤de Cǒmara tûjû̌pwa̤ ta̤sû̌ǐta̤tòwòǐ

⁹ Pwa̤nějǎphû̌nu, a glè̌ ô̌htûpwa̤ mṳ̂̌plîjò hětè? A bǎ ganǎ̤de bò nalě̤nayô̤̌.

¹⁰ He kè̌lǎ cǒ na kû̌ he sǎphlǒ lǒ̤bò. No cû̌sǔ cû̌tepheyî̤kè tǎ̤ he kû̌ na ta̤mǎlò̤ tǎ̤mǎ̤.

¹¹ Pô̤̌khô he ma̤sǔma̤plě na tô̤̌ ayanu, he dô̌bǎtûklû̌, he bè̌nṳ̌ nalě̤nayô̤̌ dǒ hesǎphlǒkû hǒ.

¹² Ǒ Cǒmara tûjû̌pwa̤, he htû̌sò̌htò̌ na. Sû̌ǐtòwòǐ he kû̌ na ta̤hî̌bǎlò̤.

¹³ Hekhû̌phě glè shôbǐǐlṳ̌ hî̌le̤le̤ hî̌gege sô̌ bò ta̤mǎlò̤ dǒ na ǐlò̤ nutokhlǒ.

¹⁴ He ô̌htûpwa̤ pô̤̌ na ta̤sû̌ǐnu akhû̌akhî, he sǎlě̤sǎlò̤ khlo pe kû̌ he ta̤dû̌yò̤̌htò̌sa lǒ̤ bò.

¹⁵ He gènè̤tě̤mè̤̌ǐ na ta̤sû̌ǐtòwòǐ. He bè̌sû̌bè̌sǎǐ naklè̌naklò.

¹⁶ He sǎphlǒô̌ na ta̤hî̌bǎlò̤. He shôpe̤ pè̤̌ pe nalě̤nayô̤̌ tô̤̌.

Ta̤sǎlě̤sǎlò̤ dǒ Cǒmara ta̤sû̌ǐta̤tòwòǐ akû

¹⁷ Ma̤mô̤ma̤wô̌ pû najû̌ amè̤̌kû̌ henu. Htodě he ô̌htûpwa̤ jûǎ nayô̤̌.

¹⁸ Pô̤̌khô he kè̌shǐ na ta̤ma̤ cô̌klǐcô̌sè tokhlǒ dǒ na ta̤sû̌ta̤tòwòkû ayanu, bǔmô bǎmò̌ he mǐ̤sǎ.

¹⁹ Bǎ hǎkhû̌ nî̌ he htûpwǎ shǐtèmè̤ pwǎ. Dǐsî̌ganǎ̤ he kû̌ na ta̤mǎlò̤ tokhlǒ nî̌.

²⁰ He sǎyṳ sǎganǎ̤ mî̌ca na ta̤mǎlò̤ tokhlǒ pṳ̂̌꤮ plǎ.

²¹ Na sǎhtǎdû̌da kòyò dǒ a bè̌dû̌bè̌pwǎ̤ anǎ̤ nutokhlǒ. Na ǐsho kòyò dǒ a jûlě̤phǐ na ta̤mǎlò̤ tô̤̌ nutokhlǒ.

²² He jûǎ na ta̤hî̌bǎ akhû̌akhî, ta̤pi̤jî̌ǐsho he bǎbǎ, ta̤hî̌bǎ tukutakǎ he bǎbǎ, no kè̌shǐtṳ̌bǎ tǎ̤ he mǎ̤.

²³ Pwa̤pǒta̤ tokhlǒ hǎnòò̌ plǒbò lû̌û dě a dô̌bò he yô̤. He mî̌ na jû̌ dě he gènè̤tě̤mè̤̌ pwǎ na ta̤hî̌bǎlò̤ tokhlǒ.

²⁴ Na ta̤hî̌bǎ tokhlǒnu a ma̤mô̤ mî̌ca he sǎphlǒ. A ǐsî̌yajè̌ he.

Bè̌lò̤ sǎphlǒ dǒ lǎ̤jûǎ Cǒmara ta̤sû̌ǐta̤tòwòǐ

²⁵ He glè̌ si tè̤tè̤̌ hǒ. Pô̤̌ nalě̤nayô̤̌ hî̌nu, dǐ htûpwa̤ pô̤̌ he.

²⁶ He ta̤ô̌htûpwa̤ awe̤akènu he shôbǐǐlṳ̌ bǎ na dě na hî̌shǔ hto he hǒ. Sû̌ǐtòwòǐ he kû̌ na ta̤hî̌bǎlò̤.

²⁷ Pô̤̌khô he sî̌yaphlôphǎ nata̤sû̌ǐtòwòǐ tokhlǒ yô̤̌mûyô̤̌sǎ ayanu, ma̤jè̌mò̌ he. Htodě he gènè̤tě̤mè̤̌ǐ jò na ta̤ma̤ cô̌klǐcô̌sè tokhlǒ pě.

²⁸ He sǎplǎ̤ mî̌ca dě alò̤dô̌lò̤de jî̌ he. Ǐshû̌ ǐshò̌htò̌ sô̌mò̌ he pô̤̌ nata̤mǎlò̤ hî̌nu.

²⁹ No cû̌tephekè he kû̌ ta̤lô̌ǐplò̤ǐ aklè̌. Sû̌ǐtòwòǐ wô̌ he kû̌ na ta̤sû̌ta̤tòwònu.

³⁰ He rû̌htò̌ ta̤cǒ kû̌ yô̤̌ nuhǒ. He bè̌lò̤ sǎphlǒ kû̌ he gû̌ kû̌ na ta̤mǎlò̤.

³¹ Ǒ Cǒmara tûjû̌pwa̤, he pṳ̂̌měǐ na ta̤hî̌bǎ. No htûhtò̌ tǎ̤ ta̤shòwò̤̌ dǒ heya mǎ̤.

³² Na dǐsî̌yaphlôphǎ lǒlǒbebe he akhû̌akhî, he sǎphlǒshû̌ ganǎ̤de na ta̤mǎlò̤.

Ta̤kwicaba dǒ lǎ̤sî̌yaphlôphǎwô̌ aya

³³ Ǒ Cǒmara tûjû̌pwa̤, sû̌ǐ he kû̌ na ta̤hî̌bǎlò̤ aklè̌aklò. Dě he gû̌ ma̤ gutṳ̌tṳ̌ pě.

³⁴ Dǐsî̌yaphlôphǎ wô̌ he dě he ganǎ̤de na ta̤sû̌ta̤tòwò. He jûǎ kû̌ he sǎphlǒ tômèbò.

³⁵ He kè̌lû̌htò̌ǐ ta̤sǎlě̤sǎlò̤ dǒ na ta̤mǎlò̤ akûnu akhû̌akhî, nè̌klè̌nè̌klò he.

³⁶ Na ta̤hî̌bǎnu, no mô̤ǐ khlo he kû̌ he sǎyṳsǎbǎ ruhtanu.

³⁷ No kè̌khô̌kè he kû̌ ta̤ dǒ atṳ̌dè nutokhlǒ. Dǐ ô̌htûpwa̤ tě̤tě̤mè̤̌mè̤̌ he pô̤̌ nalě̤nayô̤̌ ô̌nu.

³⁸ Pô̤̌ na olò̤ hto pwa̤ dǒ a ǐsha bè̌dubè̌nǎ̤ na tokhlǒ ayanu, ma̤lǒbe bǎmò̌ he amè̤̌kû̌ na pwa̤ma̤ta̤phû̌nu.

³⁹ Ta̤ma̤sòwò̤̌ dǒ he ǐshanu ma̤tephe bǎ he. Na ta̤mǎlò̤ tokhlǒnu awô̌ mî̌ca.

⁴⁰ He sǎphlǒshû̌ jûǎ mî̌ca na ta̤sû̌ǐtòwòǐ. Dǒ nacǒnatè̤ akhû̌akhî, ǐ he ta̤ô̌htûpwa̤ dǒ acǒatè̤.

Ta̤nǎla̤ǐ Cǒmara ta̤sû̌ǐta̤tòwòǐ

⁴¹ Ǒ Cǒmara tûjû̌pwa̤, pô̤̌ na olò̤ henu bè̌lṳ̌mò̌ he na ta̤mô̤ dǒ ahǎbòjò tô̤̌ kû̌ na ta̤ma̤hǎplǎgenu.

⁴² He yṳ̌ǎnǎla̤ǐ nalě̤nayô̤̌ akhû̌akhî, he gǔ hî̌shěshu jò sô̌ kòyò dǒ a pî̤jî̌ǐsho he tokhlǒ hǒ.

⁴³ He nǎla̤ǐ na ta̤mǎlò̤ tokhlǒ akhû̌akhî, ma̤jè̌ he dǒ he hî̌bǎ cǒcǒtè̤tè̤ pṳ̂̌꤮ plǎ.

⁴⁴ He glè̌ ganǎ̤de na ta̤sû̌ta̤tòwò tûjû̌pwa̤ talakhǎ.

⁴⁵ He jî̌pwǐ̤ jûǎ na ta̤sû̌ǐtòwòǐ tokhlǒ akhû̌akhî, he cû̌ bǎtè bǎbǎ, ta̤dǐkhû̌dǐdò ô̌ tě̤tṳ nô̌ he tôcǒ꤮ tô̤̌.

⁴⁶ He glè̌ shôbǐǐlṳ̌ na ta̤hî̌bǎyô̤̌sǎ tokhlǒ dǒ khwǐ tokhlǒ alô̤mô̤̌. He hǎplǎkè pû kû̌ ta̤shòwò̤̌.

⁴⁷ He mô̤ǐ na ta̤mǎlò̤, a ma̤sǎlě̤sǎlò̤ he.

⁴⁸ He bè̌dû̌ jûǎ na ta̤mǎlò̤ dǒ he mô̤nṳ̌nu. He gènè̤tě̤mè̤̌ na ta̤hî̌bǎlò̤.

Ta̤yṳ̌ǎ Cǒmara alě̤ayô̤̌

⁴⁹ Gènè̤̌htò̌ bǎ nayô̤̌ dǒ na hî̌nǎ na pwa̤ma̤ta̤phû̌ amè̤̌kû̌ henu. A ǐ he ta̤kè̌shuǐ mî̌ nayô̤̌ nô̤̌ pwǎ.

⁵⁰ Cǒmara ata̤olò̤ ǐ he ta̤ô̌htûpwa̤ tě̤tě̤mè̤̌mè̤̌ akhû̌akhî, bǎ he kè̌shǐbǎ kû̌ ta̤pò̤̌ta̤sha akhanu, a ma̤mô̤ma̤wô̌ǐ he sǎphlǒ.

⁵¹ Pwa̤ dǒ a bè̌dû̌bè̌pwǎ̤ anǎ̤ nutokhlǒ pî̤jî̌ǐsho jî̌ he bǎbǎkǎlè he cû̌tephekè kû̌ na ta̤sû̌ta̤tòwò tô̤̌.

⁵² Ǒ Cǒmara tûjû̌pwa̤, bǎ he gènè̤htò̌ bǎ na ta̤mǎlò̤ dǒ awǐnu tokhlǒ akhanu, a ma̤mô̤ma̤wô̌ǐ he sǎphlǒ.

⁵³ Kòyòkhu phû̌mò̤̌ tokhlǒ wîkèbò na ta̤sû̌ta̤tòwò akhû̌akhî, he sǎphlǒdû̌ jî̌ asî.

⁵⁴ Bǎ he htû shǐtè̤mè̤ dǒ hǎkhû̌ akhanu, he wě̤htò̌ lî̤sǎwǐ dǒ na ta̤hî̌bǎlò̤ awe̤akè.

⁵⁵ Ǒ Cǒmara tûjû̌pwa̤, bǎ lṳmṳ̌khǐ akhanu, he gènè̤̌htò̌ bǎ nami̤ akhû̌akhî, he jûǎ na ta̤sû̌ta̤tòwò.

⁵⁶ He ganǎ̤de na ta̤sû̌ǐtòwòǐ akhû̌akhî, he nǐ̤bǎ ta̤ǐshôwî̤.

Ta̤ǐlò̤sǎphlǒ dǒ Cǒmara ta̤sû̌ǐta̤tòwòǐ akû

⁵⁷ Ǒ Cǒmara tûjû̌pwa̤, he sǎmǒla̤htò̌ pwǎ na nô̤̌. He olò̤ kû̌ he ganǎ̤de nalě̤nayô̤̌.

⁵⁸ Dǒ na lǎ̤kè̌dû̌ǐ he aya, he kè̌lǎsi kè̌lǎô̌ na. Pô̤̌ na ta̤olò̤wṳ̂̌lò̤ ô̌nǎnu, gwèbǎ ǐ pû he.

⁵⁹ He gènè̤tě̤mè̤̌ he ta̤ô̌htûpwa̤, he tiwǐ gesô̌ dǒ na ta̤hî̌bǎ a ô̌.

⁶⁰ Pô̤̌khô he gǔ jû na ta̤mǎlò̤ ayanu, he jî̌khô̌jî̌yò bǎtô̤̌, he ma̤ phwèphwè pwǎ.

⁶¹ Kòyòphû̌mò̤̌ tokhlǒ coměbò he kû̌ sǒpli̤ tokhlǒ bǎbǎ, he shôpe̤ nô̌ na ta̤sû̌ta̤tòwò tô̤̌.

⁶² Na ta̤hî̌bǎ tokhlǒ nî̌ acǒatè̤ akhû̌akhî, he ihtǒ htû̌sò̌htò̌ na bǎ lṳmṳ̌khǐ klama.

⁶³ He bô̌sû̌khǎkhô kû̌ lǒ̤bò kòyò dǒ a ǐsha bè̌dubè̌nǎ̤ na, a ma̤gû̌ na ta̤sû̌ǐtòwòǐ nutokhlǒ.

⁶⁴ Ǒ Cǒmara tûjû̌pwa̤, na ta̤mô̤ dǒ ahǎbòjò tô̤̌nu, a ô̌ be kû̌ hǎkhû̌. Sû̌ǐtòwòǐ pû he kû̌ na ta̤hî̌bǎlò̤.

Cǒmara ta̤sû̌ta̤tòwò dǒ alě̤dû̌pwî̤dû̌

⁶⁵ Ǒ Cǒmara tûjû̌pwa̤, pô̤̌ na olò̤ htonu na ma̤mô̤ma̤wô̌ pû na pwa̤ma̤ta̤phû̌ amè̤̌kû̌ henu nî̌.

⁶⁶ He yṳ̌ǎnṳ̌ na ta̤mǎlò̤ akhû̌akhî, sû̌ǐtòwòǐ bǎ he ta̤sî̌khû̌sî̌ya kû̌ ta̤sî̌ta̤jò̌ dǒ awô̌.

⁶⁷ Bǎ na shò̌lò̤ he sǎphlǒ khôtô̤̌ akhanu, he cû̌sǔcû̌tò̤̌ taga klè̌. Khònò̤̌ dě he jû nalě̤nayô̤̌ hǒ.

⁶⁸ Na wô̌ mî̌ca, na ma̤ ta̤ tokhlǒ mî̌ awô̌ bò. Sû̌ǐtòwòǐ he kû̌ na ta̤hî̌bǎlò̤.

⁶⁹ Kòyò bè̌dû̌bè̌pwǎ̤ anǎ̤ tokhlǒ dô̌ lòhǎlòhô bò heyô̤. He khû̌dayadě he ganǎ̤de tǒ̤ na ta̤sû̌ǐtòwòǐ tokhlǒ kû̌ he sǎphlǒ tômèbò.

⁷⁰ Asî mî̌ kòyò ǒò̌phuhtò, a sî̌yaphlôphǎ na ta̤sû̌ǐtòwòǐ tô̤̌. He khû̌dayadě he mô̤ǐ mî̌ca na ta̤sû̌ta̤tòwò.

⁷¹ Pô̤̌khô he phî̌nṳ̌ ta̤sû̌ǐ dǒ na ta̤hî̌bǎlò̤ akû nu, na shò̌lò̤ hesǎphlǒ nî̌ awô̌ dǒ heya pwǎ.

⁷² Dǒ heya na ta̤sû̌ta̤tòwò mî̌ alě̤dû̌pwî̤dû̌ khlo pe kû̌ ruhta lǒ̤bò.

Cǒmara ta̤sû̌ta̤tòwò dǒ atôabǎ

⁷³ Na bô̌lò̤tèlò̤ he kû̌ na cǔde. Pô̤̌khô he gǔ ma̤lû̌ǐ na ta̤sû̌ta̤tòwò ayanu, ǐ he ta̤sî̌yaplôphǎ.

⁷⁴ Bǎ kòyò dǒ a ǐsha bè̌dubè̌nǎ̤ na tokhlǒ kè̌shǐ kû̌ he kè̌shu nǎla̤ǐ nalě̤nayô̤̌ akhanu, asî gǔ sǎlě̤sǎlò̤ lô̌khô pě.

⁷⁵ Ǒ Cǒmara tûjû̌pwa̤, he sî̌ganǎ̤ kû̌ na cî̌htò̌cǒ cî̌htò̌tè̤. Na cǒkû̌ nayô̤̌ akhû̌akhî, na shò̌lò̤ he sǎphlǒ.

⁷⁶ Pô̤̌ na olò̤ hto na pwa̤ma̤ta̤phû̌ amè̤̌kû̌ he hǒo, ma̤mô̤ma̤wô̌ǐ he kû̌ na ta̤mô̤ dǒ ahǎbòjò tô̤̌ hǒo.

⁷⁷ He mô̤nṳ̌ na ta̤sû̌ta̤tòwò akhû̌akhî, pô̤̌khô he gǔ ô̌htûpwa̤bò̌ ayanu, gwèbǎǐ he.

⁷⁸ Kòyò dǒ a bè̌dû̌bè̌pwǎ̤ anǎ̤ nutokhlǒ ma̤jî̌ma̤jû̌ bò he akhû̌akhî, no sòwò̤bò asî. He khû̌dayadě he gènè̤tě̤mè̤̌ nata̤sû̌ǐtòwòǐ tokhlǒ.

⁷⁹ Pô̤̌khô kòyò dǒ a ǐsha bè̌dû̌bè̌htûǐ na tokhlǒ sî̌ganǎ̤ na ta̤hî̌bǎ aya, no getîkhîtô asî dǒ he ô̌.

⁸⁰ Pô̤̌khô he gǔ hǎplǎge kû̌ ta̤shòwò̤̌ ayanu, he ganǎ̤de tě̤tě̤mè̤̌mè̤̌ bò nata̤hî̌bǎlò̤ pě nî̌.

Ta̤kwicaba dǒ ta̤ma̤hǎplǎge aya

⁸¹ He kè̌shǔǐ na ta̤ma̤hǎplǎge, alòdô̌lòde mî̌ca he. He sǎmǒla̤ǐ nalě̤nayô̤̌.

⁸² He ô̌pǒ̤kè̌shuǐ na ta̤olò̤ lǒbehtò̌ aya, agayǎ̤ bò he mi̤sǎphlǒ hǒ. He gwè̌ kû̌, “Na ma̤mô̤ǐ he sǎphlǒ bǎkhò̌tè pě?”

⁸³ He ô̌lǒô̌khlo sô̌sô̌kû̌ shiôkobě dǒ kòyò wîkè yǎ nupwǎ bǎbǎkǎlè he shôpe̤ kè na ta̤hî̌bǎlò̤ tô̤̌.

⁸⁴ He mî̌ na pwa̤ma̤ta̤phû̌ bǎ ô̌pǒ̤ yî̤ pô̤̌ pwǐtè pě? Na glè̌ cî̌htò̌ kòyò dǒ a ma̤jî̌ he nutokhlǒ bǎ khòtèpě?

⁸⁵ Kòyò dǒ a phǐhtò̌yô̤̌ǐ anǎ̤, a ganǎ̤de na ta̤sû̌ta̤tòwò tô̤̌ tokhlǒnu, a pho lô̌khô hǎkûyô̤̌ dǒ he lǎ̤lò̤tě̤ aya.

⁸⁶ Nata̤mǎlò̤ lǒ̤bò tokhlǒnu lǎ̤yṳ̌ǎ nǎla̤ǐ lǒ̤bò. Ma̤jè̌mò̌ he nî̌, he ma̤si nô̌ tôcǒ tô̤̌ bǎbǎkǎlè asî ma̤ jî̌ma̤jû̌ lǒ̤bò he.

⁸⁷ Asî glè̌ ma̤si tè̤tè̤̌kè he. He dě he wîkè nô̌ na ta̤sû̌ǐtòwòǐ tô̤̌.

⁸⁸ Dǐ htûpwa̤ pô̤̌ he kû̌ na ta̤mô̤ dǒ ahǎbòjò tô̤̌ akûnu. He gû̌ma̤ pô̤̌ nata̤mǎlò̤ nupě.

Ta̤yṳ̌ǎnǎla̤ǐ Cǒmara ta̤mǎlò̤

⁸⁹ Ǒ Cǒmara tûjû̌pwa̤, nalě̤nayô̤̌nu aô̌měô̌gle tûjû̌pwa̤, a ô̌měô̌gle tǒ̤dǒ mǒkhû̌.

⁹⁰ Na ta̤cǒ kû̌ yô̤̌ nî̌, a ô̌měô̌gle tôhtu hto tôhtu. Na no ô̌htûhtò̌ hǎkhû̌ dě a ô̌měô̌gle pṳ̂̌꤮ plǎ.

⁹¹ Hǎkhû̌ gû̌ma̤ bò pô̤̌ na ta̤hî̌bǎlò̤nu. Na ta̤mǎlò̤nu a ô̌měô̌glebò tǒ̤ lṳmṳ̌ khò̌tini̤.

⁹² Na ta̤sû̌ta̤tòwò tokhlǒ kè̌ ma̤sǎlě̤sǎlò̤ he tô̤̌ hî̌mî̌, he sikè bǎ he kè̌shǐbǎ kû̌ ta̤pò̤̌ta̤sha akha.

⁹³ He shôpe̤shônǎ nô̌ na ta̤sû̌ǐtòwòǐ nutokhlǒ tîkî̌꤮ tô̤̌. Dǒ na ta̤sû̌ǐtòwòǐ akhû̌akhîdě na ǐ he ta̤ô̌htûpwa̤ dǒ atě̤amè̤̌.

⁹⁴ He mî̌ na pwa̤ma̤ta̤phû̌ tôpwa̤. He jî̌pwǐ̤ kè̌lǎ na ta̤sû̌ǐtòwòǐ akhû̌akhî, ma̤hǎplǎkè mò̌ he.

⁹⁵ Kòyòkhu phû̌mò̤̌ ô̌pǒ̤ ma̤si he. He khû̌dayadě he gènè̤tě̤mè̤̌ na ta̤mǎlò̤ tokhlǒ.

⁹⁶ He kè̌shǐ sî̌ya kû̌ ta̤pṳ̂̌꤮ tôcǒ mî̌ a gutṳ̌ bòjò, bǎbǎkǎlè na ta̤mǎlò̤nu agutṳ̌ tô̤̌.

Mô̤nṳ̌ Cǒmara ta̤sû̌ta̤tòwò

⁹⁷ He mô̤nǐ jî̌jî̌ na ta̤sû̌ta̤tòwò tokhlǒ. He gènè̤tě̤mè̤̌ǐ lû̌û tônǐ̤mṳ̌hǎ

⁹⁸ He sî̌yaphlôǐ na ta̤mǎlò̤ pṳ̂̌tôplǎ akhû̌akhî, he sî̌jò̌ khlo kû̌ pwa̤sǎkhě henu.

⁹⁹ He gènè̤ tě̤tě̤mè̤̌mè̤̌ǐ na ta̤hî̌bǎlò̤nu akhû̌akhî, he gènè̤phlô gènè̤phǎ khlo kû̌ he sara lǒ̤bò tokhlǒ.

¹⁰⁰ He jû na ta̤sû̌ǐtòwòǐ akhû̌akhî, he bè̌yòjò khlo ta̤ kû̌ mǒ̤phimǒ̤pwǎ̤ tokhlǒ.

¹⁰¹ Pô̤̌khô he glè̌ jûǎ nalě̤nayô̤̌ tokhlǒ ayanu, lǒ̤bò ta̤phû̌mò̤̌shǐhtô tokhlǒnu he cû̌ tephe kèbò.

¹⁰² Na sû̌ǐtòwòǐ tě̤tě̤mè̤̌mè̤̌ wô̌ mî̌ca he akhû̌akhî, he cû̌ tephekè nô̌ na ta̤mǎlò̤ tô̤̌.

¹⁰³ Nalě̤nayô̤̌nu ashukuu. Ashukhlo pe kû̌ wè̌khû̌shi.

¹⁰⁴ Na ta̤sû̌ǐtòwòǐ ma̤jè̌ he dě he bè̌yòjòta̤ akhû̌akhî, he sǎkhî̌ kè bò klè̌sǔ nutokhlǒ.

Ta̤lî ô̌ dǒ Cǒmara ta̤sû̌ta̤tòwò ahè

¹⁰⁵ Nalě̤nayô̤̌ mî̌ asô̌sô̌kû̌ mî̌ko tômè dǒ a shělî cû̌ bǎ helǎ̤kha. Asô̌sô̌kû̌ ta̤lî tôcǒ dǒ a gǔ ma̤lî bǎ heklè̌.

¹⁰⁶ Pô̤̌ he olò̤ hto heyô̤̌nu he ganǎ̤de tě̤tě̤mè̤̌mè̤̌ nata̤mǎlò̤ dǒ acǒatè̤ pě.

¹⁰⁷ Ǒ Cǒmara tûjû̌pwa̤, he khòbǎjî̌ khòbǎjû̌ mî̌ca ta̤pò̤̌ta̤sha. Pô̤̌ na olò̤ hto nayô̤̌nu ma̤hǎplǎkèmò̌ he.

¹⁰⁸ Ǒ Cǒmara tûjû̌pwa̤, phî̌shǔ he ta̤htû̌sò̌htò̌ na kû̌ he sǎphlǒtômèbònu. Sû̌ǐtòwòǐ he kû̌ na ta̤mǎlò̤.

¹⁰⁹ He kè̌shǐtṳ̌bǎ kû̌ ta̤sita̤hǎmǎ pṳ̂̌tôplǎ bǎbǎkǎlè he shôpe̤shônǎ bǎ na ta̤sû̌ta̤tòwò tô̤̌.

¹¹⁰ Kòyòkhu phû̌mò̤̌ dò he kû̌ sumṳ bǎbǎkǎlè he cû̌tûlû̌ khatili̤ nô̌ na ta̤sû̌ǐtòwòǐ tô̤̌.

¹¹¹ Na ta̤hî̌bǎlò̤ tokhlǒnu, a ma̤ sǎlě̤sǎlò̤ he sǎphlǒ. A htû he û̌tě̤û̌ca tûjû̌pwa̤.

¹¹² He olò̤ hesǎphlǒ kû̌ he jû na ta̤hî̌bǎlò̤ tǒ̤ he si.

¹¹³ He sǎkhě kòyò dǒ asǎphlǒ wò̌wè̌ lûhtôlûlò̤nu. He mô̤nṳ̌ na ta̤sû̌ta̤tòwò.

¹¹⁴ Na mî̌ he lǎ̤ô̌tûdû agûlǎ̤, he lǎ̤taka. He kè̌shu pwǎ tǒ̤ nalě̤nayô̤̌ nô̤̌.

¹¹⁵ Ǒ kòyòkhu phû̌mò̤̌ sî, cû̌tephe yî̤kè kû̌ he. He ganǎ̤de he Cǒmaradû̌ ata̤mǎnǎlò̤ pě.

¹¹⁶ Pô̤̌ na ta̤olò̤ ô̌nu, ǐ he ta̤khû̌ta̤ǎ dě he ô̌htûpwa̤ pě. Dǒ he ta̤kè̌shuǐnu akhû̌akhî, no htûhtò̌ tǎ̤ ta̤shòwò̤̌ dǒ heya mǎ̤.

¹¹⁷ Pô̤̌khô he glè̌ hǎplǎ ayanu, ma̤jè̌ he. He gǔ bè̌dubè̌nǎ̤ na ta̤hî̌bǎlò̤ pṳ̂̌꤮ tôplǎ.

¹¹⁸ Na wîkè bò kòyò dǒ a cû̌tûlû̌ khati̤li̤kè na ta̤hî̌bǎlò̤. Asî tili̤tôlô̌ tokhlǒnu, lǎ̤nǎla̤ǐ tôcǒ tô̤̌.

¹¹⁹ Na wîkèbò kòyòkhu phû̌mò̤̌ asô̌sô̌kû̌ kòyò wîkè ta̤wè̤̌ta̤sô̌. He mô̤ǐ na ta̤mǎlò̤.

¹²⁰ He ǐsha mî̌ca nalǎ̤ dě he gònò̤̌gòglè. He ǐsha mî̌ca na ta̤cî̌htò̌.

Ta̤jûlě̤phǐ Cǒmara alě̤ayô̤̌

¹²¹ He ma̤pwǎ ta̤ dǒ atôabǎ, acǒatè̤. Wîkè tǎ̤ he dǒ pwa̤ma̤jî̌ma̤jû̌ acǔdekû mǎ̤.

¹²² Olò̤mò̌ he mî̌ na pwa̤ma̤ta̤phû̌nu kû̌ na glè̌ tugǔtaka ma̤jè̌ǐ he. No ma̤jî̌ma̤jû̌ tǎ̤ he kû̌ kòyò bè̌dû̌bè̌htò̌lǒ anǎ̤ nutokhlǒ tǎ̤mǎ̤ nî̌.

¹²³ He ô̌pǒ̤kè̌shuǐ mî̌ca na ta̤ma̤hǎplǎge, na ta̤olò̤ cǒtè̤ nudě a gayǎ̤bò he gô̌bô.

¹²⁴ Ma̤mô̤ma̤wô̌ǐ na pwa̤ma̤ta̤phû̌ kû̌ na ta̤mô̤ dǒ ahǎbòjò tô̤̌. Sû̌ǐtòwòǐ he kû̌ na ta̤hî̌bǎlò̤.

¹²⁵ He mî̌ na pwa̤ma̤ta̤phû̌ tôpwa̤. Pô̤̌khô he sî̌ganǎ̤ na ta̤mǎlò̤ ayanu, ǐ he ta̤sî̌yaphlôphǎ.

¹²⁶ Ǒ Cǒmara tûjû̌pwa̤, kòyò hǎkhû̌phû̌ ganǎ̤de pe na ta̤sû̌ta̤tòwò tô̤̌ akhû̌akhî, ashěakhǎ tô dǒ na tô ma̤ta̤ tôcǒcǒ.

¹²⁷ Na ta̤mǎlò̤ hǒonu, he mô̤ǐ jî̌jî̌ khlo pe lû̌û kû̌ htacè̌.

¹²⁸ He gû̌ mè̤̌caca bò na ta̤sû̌ǐtòwòǐ. He sǎkhě bò ta̤lòhǎlòhô aklè̌aklò.

Sǎyṳ ganǎ̤de Cǒmara ta̤sû̌ta̤tòwò

¹²⁹ Na ta̤mǎlò̤nu acô̌klî̌cô̌sè mî̌ca, he jû ganǎ̤de lǒ̤bò.

¹³⁰ Nalě̤nayô̤̌ ata̤sû̌ǐtòwòǐ ǐ kòyò ta̤lî. A ǐphlôǐphǎ kòyò ǒò̌phuhtò tokhlǒ.

¹³¹ He sǎmǒlaǐ mî̌ca na ta̤mǎlò̤ dě he lò̤dô̌lò̤de hǒ.

¹³² Pô̤̌ na lǎ̤klô ma̤jè̌ kòyò dǒ a mô̤nṳ̌ nami̤nu, htû̌ti̤wǐ̤ kè̌tô pû he, ma̤bwǐma̤sîrî he.

¹³³ Pô̤̌ nalě̤nayô̤̌ ô̌nu, nè̌klè̌nè̌klò bǎ he khǎlǎlǎ̤kha. No tǒ̤ tǎ̤ he dǒ ta̤sǔta̤plě akû tǎ̤mǎ̤.

¹³⁴ Pô̤̌khô he jûǎbò̌ na ta̤sû̌ǐtòwòǐ ayanu, ma̤hǎplǎmò̌ he dǒ pwa̤ma̤jî̌ma̤jû̌ acǔdekû.

¹³⁵ Kè̌wî̤kè̌wô̌ na pwa̤ma̤ta̤phû̌ amè̤̌kû̌ henu. Sû̌ǐtòwòǐ he kû̌ na ta̤hî̌bǎlò̤.

¹³⁶ Kòyò ganǎ̤de na ta̤sû̌ta̤tòwò tô̤̌ akhû̌akhî, he hǎ mǐ̤sǎshilò̤ asô̌sô̌kû̌ shilô̤̌mǒ̤ lò̤.

Cǒmara alě̤ayô̤̌ ata̤cǒta̤tè̤

¹³⁷ Ǒ Cǒmara tûjû̌pwa̤, na mî̌ pwa̤cǒpwa̤tè̤. Nata̤hî̌bǎlò̤ mî̌ atôabǎbò.

¹³⁸ Na ta̤mǎlò̤nu, atôabǎ, atô yṳ̌ǎ nǎla̤ǐ.

¹³⁹ Pwa̤sǎkhě he tokhlǒ shôpe̤ kèbò nalě̤nayô̤̌ akhû̌akhî, he sǎphlǒdû̌ gû̌gè̌ mî̌ca.

¹⁴⁰ Nalě̤nayô̤̌nu kòyò ma̤kè̌kè̌ dě acǒatè̤ mî̌ca akhû̌akhî, napwa̤ma̤ta̤phû̌ amè̤̌kû̌ he nî̌ mô̤nǐ̤ mî̌ca yǎ.

¹⁴¹ Kòyò kè̌tô he tô̤̌, kòyò gènè̤pî̌tî̌ he. Bǎbǎkǎlè he shôpe̤ nô̌ na ta̤sû̌ǐtòwòǐ tô̤̌.

¹⁴² Na ta̤cǒta̤tè̤nu acǒatè̤ tûjû̌pwa̤. Na ta̤sû̌ta̤tòwònu atě̤amè̤̌.

¹⁴³ Ta̤pò̤̌ta̤sha, ta̤gû̌ta̤gè̌ hèbǎ he bǎbǎkǎlè na ta̤mǎlò̤ ama̤ sǎlě̤sǎlò̤ he.

¹⁴⁴ Na ta̤mǎlò̤nu acǒatè̤ tûjû̌pwa̤. Ǐ he ta̤sî̌yaphlôphǎ dě he ô̌htûpwa̤ tě̤tě̤mè̤̌mè̤̌.

Ta̤kwicaba dǒ ta̤hǎplǎ aya

¹⁴⁵ Ǒ Cǒmara tûjû̌pwa̤, he kwisǎyṳhtò̌ na kû̌ he sǎphlǒ tômèbò, kǒshǔmò̌ he. He ganǎ̤de na ta̤hî̌bǎlò̤.

¹⁴⁶ Pô̤̌khô he ganǎ̤de gû̌ma̤ na ta̤mǎlò̤ ayanu, he kwisǎyṳhtò̌ na dǒ na glè̌ ma̤hǎplǎ he.

¹⁴⁷ Bǎ lṳ̌mṳ̌lîbû khôtô̤̌ akhanu, he ihtǒ kwihtò̌ na ta̤ma̤jè̌. He nǎla̤ǐ tǒ̤ nalě̤nayô̤̌ nô̤̌.

¹⁴⁸ He sòklò tônǎ̤mṳ̌shǐ, he gènè̤tě̤mè̤̌ nalě̤nayô̤̌ awe̤akè.

¹⁴⁹ Ǒ Cǒmara tûjû̌pwa̤, na ta̤mô̤nu ahǎbòjò tô̤̌ akhû̌akhî, ganǎ̤de he ta̤kwisǎyṳhtò̌. Dǒ na ma̤tôma̤bǎ ma̤cǒma̤tè̤ akhû̌akhî, dǐ ô̌htûpwa̤ pô̤̌ he.

¹⁵⁰ Kòyò dǒ a sǎyṳma̤ ta̤phû̌mò̤̌ tokhlǒ glè̌ hèshě he hǒ. Kòyò nutokhlǒ ô̌ tepheyî̤kè kû̌ na ta̤sû̌ta̤tòwò.

¹⁵¹ Ǒ Cǒmara tûjû̌pwa̤, na ô̌phǔ kû̌ he. Lǒ̤bò na ta̤mǎlò̤nu, atôabǎbò.

¹⁵² Na ta̤mǎlò̤ ô̌měô̌gle tûjû̌pwa̤nu, he sî̌ganǎ̤ dǒněhǎlau pe hǒ.

Ta̤kwisǎyṳhtò̌ ta̤ma̤jè̌ aya

¹⁵³ He shôpe̤shônǎ nô̌ na ta̤sû̌ta̤tòwò tô̤̌ akhû̌akhî, kè̌mò̌ he ta̤pò̤̌ta̤sha dě ma̤hǎplǎkèmò̌ he.

¹⁵⁴ Tugutakaǐ he dě ô̌cu dǒ he tôkhô. Pô̤̌ na olò̤ hto nayô̤̌nu ma̤hǎplǎkèmò̌ he.

¹⁵⁵ Kòyòkhu phû̌mò̤̌ ganǎ̤de yṳ̌ǎ Cǒmara ata̤hî̌lò̤yô̤̌ tô̤̌ akhû̌akhî, a ma̤hǎplǎge asî tô̤̌.

¹⁵⁶ Ǒ Cǒmara tûjû̌pwa̤, na gwèbǎǐ jî̌ kòyò. Pô̤̌ nata̤mǎlò̤ ô̌nu ma̤hǎplǎge he ta̤ô̌htûpwa̤.

¹⁵⁷ Pwa̤ma̤jî̌ma̤jû̌ he tokhlǒ bǎbǎ, pwa̤sǎkhě he tokhlǒ bǎbǎ, a ô̌ dû̌wî̤ jî̌jî̌. He htû̌tiwǐkhô̌kè nô̌ na ta̤hî̌bǎlò̤yô̤̌ tô̤̌.

¹⁵⁸ Kòyò dǒ a cǒ kû̌ ayô̤̌ tô̤̌ tokhlǒ jûǎ nalě̤nayô̤̌ tô̤̌ akhû̌akhî, he kè̌ dě he ma̤yǒ̤ asî.

¹⁵⁹ Ǒ Cǒmara tûjû̌pwa̤, kè̌mò̌, he mô̤nṳ̌ wô̌ na ta̤sû̌ǐtòwòǐ. Nata̤mô̤nu a hǎbòjò tô̤̌ akhû̌akhî, dǐ ô̌htûpwa̤ pô̤̌ he.

¹⁶⁰ Nalě̤nayô̤̌ lǒ̤bò mî̌ acǒatè̤. Lǒ̤bò na ta̤hî̌bǎlò̤nu acǒatè̤, a ô̌měô̌gle tûjû̌pwa̤ talakhǎ.

Ta̤bè̌plò̌shǐ dǒ Cǒmara ta̤sû̌ta̤tòwò aya

¹⁶¹ He ma̤sǔma̤bǎ pwa̤pǒta̤ tôcǒ tô̤̌ bǎbǎkǎlè asî ma̤jî̌ma̤jû̌ he. He ǐsha bè̌dubè̌nǎ̤ nalě̤nayô̤̌ pwǎ.

¹⁶² Dǒ nalě̤nayô̤̌ akhû̌akhî, he sǎlě̤sǎlò̤ jî̌, asô̌sô̌kû̌ kòyò kè̌shǐ ta̤lě̤dû̌pwî̤htû.

¹⁶³ He mô̤nṳ̌ na ta̤sû̌ta̤tòwò akhû̌akhî, he sǎkhěkhû̌khwè mî̌ca ta̤hî̌bǎ lòhǎlòhô.

¹⁶⁴ Na ta̤hî̌bǎlò̤nu acǒatè̤ akhû̌akhî, he htû̌sò̌htò̌ na tôni̤ mî̌ susô̌tôplǎ.

¹⁶⁵ Kòyò dǒ a mô̤nṳ̌ na ta̤sû̌ta̤tòwònu, a nǐ̤bǎ mè̤̌mî̌ca ta̤ô̌mô̤ô̌bǎ. Ta̤tôcǒ sûcû̌jò asî dǒ klè̌sǔklè̌bǎ akû tô̤̌.

¹⁶⁶ Ǒ Cǒmara tûjû̌pwa̤, he ô̌pǒ̤kè̌shuǐ na ta̤ma̤hǎplǎge. He ganǎ̤de na ta̤mǎlò̤.

¹⁶⁷ He jû mô̤nṳ̌ mî̌ca na ta̤hî̌bǎlò̤yô̤̌.

¹⁶⁸ He jûǎ na ta̤sû̌ta̤tòwò kû̌ na ta̤mǎlò̤. He ma̤kwè̌ mî̌titènu na sî̌ganǎ̤ lǒ̤bò.

Ta̤kwicaba dǒ ta̤ma̤jè̌ aya

¹⁶⁹ Ǒ Cǒmara tûjû̌pwa̤, he ta̤kwisǎyṳhtò̌ na dě a htò̌ tǒ̤dǒ na ô̌. Pô̤̌ na ta̤olò̤ ô̌ htohǒnu, ǐ he ta̤sî̌yaphlôphǎ.

¹⁷⁰ Ganǎ̤de he ta̤kwicabahtò̌ na. Pô̤̌ na olò̤ htohǒnu, ma̤hǎplǎmò̌ he.

¹⁷¹ Na sû̌ǐtòwòǐ he kû̌ na ta̤hî̌bǎlò̤ akhû̌akhî, he gǔ htû̌sò̌htò̌ na pṳ̂̌plǎ.

¹⁷² Nata̤mǎlò̤nu atôabǎ lǒ̤bò akhû̌akhî, he gǔ sǎwǐhtû̌sò̌ǐ nalě̤nayô̤̌.

¹⁷³ He gû̌ma̤ na ta̤sû̌ǐtòwòǐ akhû̌akhî, tiwǐtòwò nǎ dǒ na gǔ ma̤jè̌ he.

¹⁷⁴ Ǒ Cǒmara tûjû̌pwa̤, he kè̌shu nǎla̤ǐ na ta̤ma̤hǎplǎge. Nata̤sû̌ta̤tòwò ma̤ sǎlě̤sǎlò̤ he.

¹⁷⁵ Pô̤̌khô he htû̌sò̌htò̌ bò̌ na ayanu, dǐ ô̌htûpwa̤ pô̤̌ he. Nata̤hî̌bǎlò̤ ma̤jè̌ pû he nî̌.

¹⁷⁶ He sô̌sô̌kû̌ sû̌phû̌ dǒ shôpe̤ dě a cû̌sǔklè̌ nu. He shôpe̤shônǎ nô̌ na ta̤mǎlò̤ tôkhò̌ tô̤̌ akhû̌akhî, cû̌ kè̌lǎgesô̌ na pwa̤ma̤ta̤phû̌ amè̤̌kû̌ henu.